31 Maart 2023
JESAJA 43:1 AFR53
“Maar nou, so sê die Here, jou Skepper, o Jakob, en jou Formeerder, o Israel: Wees nie bevrees nie, want Ek het jou verlos; Ek het jou by jou naam geroep; jy is myne!”
God praat direk met Sy volk as hul Skepper en Formeerder. Sy volk wat Hy aanspreek as Jakob en Israel.
Die volk ontvang ‘n opdrag om nie te vrees nie, want hulle word vasgehou in God se hand. God herinner Sy volk dat Hy hulle uit Egipteland verlos het en dat Hy deur Sy vriend Abraham hulle by die naam geroep het en dat hulle aan Hom behoort.
Hierdie gedeelte is vol beelde van die uittog uit Egipte. God hou daarvan om Sy volk te herinner aan die tye wat Hy hulle gehelp het.
“As jy deur die water gaan, is Ek by jou; en deur die riviere — hulle sal jou nie oorstroom nie; as jy deur vuur gaan, sal jy jou nie skroei nie, en die vlam sal jou nie brand nie.” JESAJA 43:2 AFR53
Weliswaar was God met Sy volk toe hulle deur water moes gaan.
“Toe steek Moses sy hand oor die see uit, en die Here het deur 'n sterk oostewind die see laat wegvloei, die hele nag deur, en die see droog gemaak; en die waters is gekloof. En die kinders van Israel het midde-in die see getrek op droë grond. En die waters was vir hulle 'n muur aan hul regter- en aan hul linkerkant.” EXODUS 14:21-22 AFR53
Daniel se vriende sou in Babilon in die vuur gegooi word, en met God se beskerming is hulle nie geskroei nie, en die vlamme het hulle nie gebrand nie.
“Hy antwoord en sê: Kyk, ek sien vier manne los binne-in die vuur wandel sonder dat daar 'n letsel aan hulle is; en die voorkoms van die vierde lyk soos dié van 'n godeseun.” DANIËL 3:25 AFR53
‘Ek is die Here, jou God’ herinner elke Joodse leser (en ons) aan God wat Sy volk uit Egipteland uit die slawehuis uitgelei het.
“Want Ek is die Here, jou God, die Heilige van Israel, jou Heiland; Ek het Egipte gegee as losprys vir jou, Kus en Seba in jou plek.” JESAJA 43:3 AFR53
Die volk kan dus uit die bemoediging van hierdie eerste drie verse rus in God se belofte om hulle weer in hul eie land te bring, na hul Babeloniese ballingskap en in die toekoms na die Groot Verdrukking.
“Toe het God al hierdie woorde gespreek en gesê: Ek is die Here jou God wat jou uit Egipteland, uit die slawehuis, uitgelei het.” EXODUS 20:1-2 AFR53
1 April 2023
JESAJA 43:4 AFR53
“Omdat jy kostelik is in my oë, hooggeag is, en Ek jou liefhet, daarom gee Ek mense in jou plek en volke vir jou lewe.”
God praat met Sy volk en sê dat hulle vir Hom kosbaar is. Hy het Sy volk lief en is gewillig dat ander nasies oorwin moet word vir Sy volk om gered te word.
Die uiteindelike doel van God is om die volk Israel terug te bring na die Heilige Land van hul verstrooiing oor die ganse wêreld. Hierdie profesie is gedeeltelik vervul met die volk wat na hul Babiloniese ballingskap terugkeer na die Heilige Land, maar sal eers met Jesus se tweede koms totaal vervul wees.
“Wees nie bevrees nie, want Ek is met jou; Ek sal jou geslag van die ooste af aanbring en jou versamel van die weste af. Ek sal sê aan die noorde: Gee! en aan die suide: Hou nie terug nie! Bring my seuns van ver, en my dogters van die einde van die aarde af,” JESAJA 43:5-6 AFR53
In die laaste eeu alleen het miljoene Jode begin terugkeer na Israel en wel in die volgorde soos Jesaja geprofeteer het. Ons lewe in ‘n tyd wat profesie letterlik vervul word!
Oos – 1930 tot 1940 (vanaf Sirië, Irak en Jordanië)
Wes – Wes Europa na die 2de wêreld oorlog
Noord – Rusland vanaf 1988
Suid – Etihopië
Operasie Solomon was ‘n Israeliese militêre operasie wat op 24 en 25 Mei 1991, 14 325 Joodse Etihopiërs na Israel gevlieg het. Die vliegtuie se sitplekke is uitgehaal om meer passasiers te akkommodeer en een van die laaste vlugte het 1,122 passasiers ingepas.
“Dit moet die verlostes van die Here sê, wat Hy uit die nood verlos het en uit die lande versamel het, van die ooste en die weste, van die noorde en van die see af.” PSALMS 107:2-3 AFR53
God sluit almal, wat na Sy Naam genoem is, wat Hy geskape het tot Sy eer, wat Hy geformeer het en gemaak het, by hierdie profesie in.
“elkeen wat na my Naam genoem is en wat Ek geskape het tot my eer, wat Ek geformeer, wat Ek ook gemaak het.” JESAJA 43:7 AFR53
2 April 2023
JESAJA 43:8 AFR53
“Bring uit die volk wat blind is en tog oë het, en die dowes wat ore het.”
Die nasies en die volk Israel word geroep om óf hul saak te bewys óf God se saak te aanvaar.
Voorheen, in Jesaja 42:19, het God gepraat van Sy blinde en dowe diensknegte, wat gewillig hulle oë en ore toegemaak het vir Sy waarheid en weë.
“Wie is blind buiten my kneg en doof soos my boodskapper wat Ek stuur? Wie is blind soos die vertroude vriend, en blind soos die kneg van die Here?” JESAJA 42:19 AFR53
Nou sê God vir hierdie blinde en dowe diensknegte van Hom om na vore te kom met al die nasies wat saam vergader sal word. Wie van hulle kan dit verklaar en ons vorige dinge wys? Laat hulle hul getuies na vore bring. God nooi sy volk (wat blind en doof is) en die nasies om te getuig: om te bewys dat Hy verkeerd is of om te bewys dat hulle geregverdig is in hul verwerping van Hom.
“Al die nasies het saam vergader, en die volke is versamel. Wie onder hulle kan sulke dinge verkondig? En laat hulle ons die vorige dinge bekend maak! Laat hulle hul getuies bring, dat hulle in die gelyk gestel kan word; en laat hulle hoor en sê: Dit is die waarheid!” JESAJA 43:9 AFR53
Julle (die Israeliete) is my getuies en my dienaar (die profeet) wat Ek uitverkies het. Dat alles wat vantevore oor Sanherib gesê is, letterlik vervul is. Die profeet het dit voorspel, en die Israeliete het gesien hoe die profesie volbring is.
“Júlle is my getuies, spreek die Here, en my kneg wat Ek uitverkies het, sodat julle kan weet en My kan glo en insien dat dit Ek is — voor My is geen God geformeer nie, en ná My sal daar geeneen wees nie.” JESAJA 43:10 AFR53
Behalwe God, is daar geen ander redder nie.
“Ek, Ek is die Here, en daar is geen Heiland buiten My nie.” JESAJA 43:11 AFR53
Daar is slegs een God!
“Want daar is een God en een Middelaar tussen God en die mense, die mens Christus Jesus, wat Homself gegee het as 'n losprys vir almal, as die getuienis op die regte tyd,” I TIMÓTHEÜS 2:5-6 AFR53
En geen persoon kom na die Vader behalwe deur Jesus nie.
“Jesus antwoord hom: Ek is die weg en die waarheid en die lewe; niemand kom na die Vader behalwe deur My nie.” JOHANNES 14:6 AFR53
3 April 2023
JESAJA 43:12 AFR53
“Ék het verkondig en verlos en dit laat hoor, en daar was geen ander god onder julle nie; en julle is my getuies, spreek die Here, en Ek is God.”
God praat hier in die eerste persoon. Ek het verkondig of verklaar - Ek het toekomstige gebeure aangekondig of geprofeteer. God het dus gewys dat Hy die ware God is.
En verlos - God het Sy volk in vorige tye van gevaar verlos, en so gewys dat Hy hulle sou beskerm.
En dit laat hoor - God het toekomstige gebeure bekend gemaak, en het sodoende gewys dat Hy God is.
Daarom is julle my getuies - die julle is God se volk wat Hy so dikwels verdedig. God se volk wat profesie op profesie gehoor het, en elke keer sonder uitsondering gesien het hoe die profesieë tot vervulling kom.
Voor die tyd toe daar enige afgod in die volk was, en toe daar dus nie voorgegee kon word dat die verlossing na enigiemand anders as na God teruggevoer kon word nie.
Ja, voor die dag was - Voor die eerste dag, of voor die begin van die tyd, van ewigheid af. Ek is Hy - Ek is dieselfde. Ek sal werk - Wie kan dit verhinder?
“Ook van vandag af is Ek dit, en niemand red uit my hand nie; Ek werk, en wie kan dit keer?” JESAJA 43:13 AFR53
“Yea, before the day was I am he; and there is none that can deliver out of my hand: I will work, and who shall let it?” Isaiah 43:13 KJV
Die leerstelling wat hier geleer word, is:
1. Dat God van ewigheid af is, want as Hy voor tyd was, moes Hy ewig gewees het.
2. Dat God onveranderlik dieselfde is - 'n leerstelling wat, soos dit hier ontwerp is om gebruik te word, die enigste seker fondament vir die veiligheid van Sy volk is - want wie kan 'n wese vertrou wat wispelturig, veranderlik, wankelend is?
3. Dat God Sy mense altyd kan verlos, maak nie saak wat hulle omstandighede is nie.
4. Dat God al Sy planne sal volbring; maak nie saak of om Sy mense te red, of om Sy vyande te vernietig nie.
5. Dat niemand – mens of duiwel – God kan verhinder nie.
6. Teenstand teen God is so vrugteloos as wat dit goddeloos is.
4 April 2023
JESAJA 43:14 AFR53
“So sê die Here, jou Losser, die Heilige van Israel: Om julle ontwil het Ek na Babel gestuur, en Ek sal hulle almal as vlugtelinge laat afdaal, naamlik die Chaldeërs, in die skepe waarop hulle gejuig het.”
Jesaja praat in die verlede tyd oor 'n toekomstige gebeurtenis. God belowe om Sy volk uit Babilon te verlos van hul ballingskap. Die Babiloniërs sal self vlugtelinge word en in 536 v.C. word Babilon deur die Meders en Perse aangeval en oorwin.
Babilon was baie sentraal geleë, beide met betrekking tot handel en as 'n vlootmoondheid. Hul skepe kon vanaf die Eufraat toegang kry tot die Persiese Golf, en vanaf die Tigris tot by die Kaspiese See.
Die Persiese monarge, wat in hul eie land gewoon het, het doelbewus die navigasie van beide riviere belemmer om enige inval vanaf die see op daardie deel van hul ryk te voorkom.
Die skepe wat vroeër weerklink het met die uitbundige vreugde van matrose word radikaal verander - die woord gejuig is doelbewus gekies om die gedagte te suggereer dat daar 'n geroep van 'n ander soort sal wees, selfs die huilkreet van wanhoop.
Die volk se verlossing uit Babilon sal weereens demonstreer dat die Here, die enigste ware God is.
“Ek is die Here, julle Heilige; die Skepper van Israel, julle Koning.” JESAJA 43:15 AFR53
God vergelyk die komende redding uit Babilon met die redding wat Hy vroeër tydens die uittog uit Egipte gedoen het. Hy het 'n pad deur die water gemaak vir Sy mense om op deur te trek en het die Egiptiese strydwaens en magtige manne ook deur die pad laat trek, maar hulle is deur die water verswelg en het nie weer opgestaan nie.
“So sê die Here wat in die see 'n weg en in die sterk waters 'n pad gemaak het, wat waens en perde, leërmag en held laat uittrek het; tesame lê hulle, hulle sal nie opstaan nie; hulle is uitgeblus, soos 'n lamppit uitgedoof.” JESAJA 43:16-17 AFR53
God se opdrag nou is vir die volk om nie terug te kyk nie, maar te fokus op die wonderwerke wat nog kom. Met die volk se terugkeer na Jerusalem is vele wonderwerke vir hulle gedoen.
“Dink nie aan die vorige dinge nie, en slaan geen ag op wat vroeër gebeur het nie. Kyk, Ek gaan iets nuuts maak; nou sal dit uitspruit; sal julle dit nie merk nie? Ja, Ek maak 'n pad in die woestyn, riviere in die wildernis. Die wilde diere van die veld sal My eer, die jakkalse en die volstruise; want Ek gee waters in die woestyn, riviere in die wildernis om my volk, my uitverkorene, te laat drink.” JESAJA 43:18-20 AFR53
God se volk sal Sy lof verkondig!
“Die volk wat Ek vir My geformeer het, hulle sal my lof verkondig.” JESAJA 43:20-21 AFR53
5 April 2023
JESAJA 43:22 AFR53
“Nogtans het jy Mý nie aangeroep, o Jakob, dat jy jou vir My sou vermoei het nie, o Israel!”
God herinner Sy volk aan hul sondes onder die verbond, maar Hy belowe redding op grond van genade, nie hulle verdienste nie. Hulle het niks gedoen om Sy redding te verdien nie en Hy sal dit dus geheel en al op grond van genade voorsien.
“Jy het vir My nie gebring die kleinvee van jou brandoffers nie, en met jou slagoffers het jy My nie geëer nie; Ek het jou geen oorlas aangedoen met spysoffers en jou nie vermoei met wierook nie. Jy het vir My geen kalmoes met geld gekoop en met die vet van jou slagoffers My nie verkwik nie; maar jy het My oorlas aangedoen met jou sondes, jy het My vermoei met jou ongeregtighede.” JESAJA 43:23-24 AFR53
God verduidelik dat Hy Sy volk hul opstandigheid vergewe. Omdat God getrou bly aan Homself, dink Hy nie meer aan die volk se sondes nie.
“Ek, Ek is dit wat jou oortredinge uitdelg om My ontwil, en aan jou sondes dink Ek nie.” JESAJA 43:25 AFR53
Interessant dat ons in die Ou Testament van die Nuwe Testament se genade leer!
“Want uit genade is julle gered, deur die geloof, en dit nie uit julleself nie: dit is die gawe van God; nie uit die werke nie, sodat niemand mag roem nie.” EFÉSIËRS 2:8-9 AFR53
God daag Sy volk uit om ‘n voorbeeld te gee waar die volk Sy guns verdien het.
“Maak My indagtig; laat ons teen mekaar pleit; vertel jy, dat jy in die gelyk gestel kan word.” JESAJA 43:26 AFR53
Selfs die volk se eerste vader, Jakob het gesondig, en hul leiers die profete, konings, priesters, regters, ens. het teen God in opstand gekom.
“Jou eerste vader het gesondig, en jou tolke het teen My oortree.” JESAJA 43:27 AFR53
Die heilige vorste is die priesters wat in die tempel diens doen. Omdat hulle teen God in opstand gekom het was hul straf om ontheilig te word. Die ballingskap na Babilon het hul uit hul amp onthef, van hul klere en eerbewyse gestroop, en tot dieselfde vlak as gewone mense gereduseer.
Jakob en Israel, die gewone mense is gestraf deurdat hulle as gevangenes na Babilon geneem is en in slawerny geplaas is.
Maar, God gaan voort om genade en verlossing met oordeel te verbind. Al bring Hy oordeel oor Israel vir sy sondes, sal God nie die nasie vernietig nie en Hy sal hulle verlos.
“So het Ek dan heilige vorste ontheilig en Jakob aan die banvloek oorgegee en Israel aan beskimpinge.” JESAJA 43:28 AFR53
6 April 2023
JESAJA 44:1 AFR53
“Maar luister nou, my kneg Jakob, en Israel wat Ek uitverkies het!”
God praat met Sy dienskneg Jakob en Israel wat Hy uitverkies het, en sê hulle moet luister.
God bevestig dat Hy Israel se Maker en Formeerder was van die moederskoot af, en Hy gaan hulle help. Wees nie bevrees vir die oordeel van Babilon wat oor julle gaan kom nie.
“So sê die Here, jou Maker en jou Formeerder van die moederskoot af, wat jou help: Wees nie bevrees nie, Jakob, my kneg, en Jesúrun wat Ek uitverkies het!” JESAJA 44:2 AFR53
Darem ’n ongelooflike vertroosting dat God nie die werk wat Hy in ons begin het, versaak nie. Dit is betekenisvol dat Jakob, die Bedrieër, hier Jesurun, die Opregte, genoem word, ’n eretitel wat die verandering wat God bring, simboliseer. Die woord Jesurun word slegs in Deuteronomium ook gebruik. God se genade word hier uitgebeeld, want die klem lê nie op Israel se sonde nie, maar op God se genade ten spyte van Sy volk se minagting.
“Toe het Jesúrun vet geword en agterop geskop — jy het vet geword, dik geword, spekvet geword — en hy het God verwerp wat hom gemaak het, en die steenrots van sy heil geminag.” DEUTERONÓMIUM 32:15 AFR53
“Niemand is daar soos God, o Jesúrun, wat oor die hemel ry as jou hulp, en oor die wolke in sy hoogheid. Die ewige God is 'n woning, en onder — ewige arms; en Hy het die vyand voor jou uit verdrywe en gesê: Verdelg!”
DEUTERONÓMIUM 33:26-27 AFR53
Die Babiloniese oordeel het gekom as gevolg van Juda se sondes onder die Ou Verbond en was bedoel om 'n einde te maak aan afgodsaanbidding in Israel. Die verwydering van afgode uit Israel was God die Vader se manier om 'n pad vir Sy Seun voor te berei.
“Want Ek sal water giet op die dorsland en strome op die droë grond; Ek sal my Gees op jou kroos giet en my seën op jou nakomelinge.” JESAJA 44:3 AFR53
En soos water op die grond sal Ek my Gees op jou nageslag uitstort, en jou nageslag seën, en hulle sal reageer met geloof en toewyding aan God. ’n Geslag wat na die Here terugkeer, sal ná hierdie geslag opkom.
Soos plante en bome wat by waterlope geplant is, en in goed besproeide velde groei en floreer, so sal hulle kinders, die volgende geslag, groei in deug, hoop, vroomheid en ywer.
“En hulle sal uitspruit tussen die gras in, soos wilgerbome by waterlope.” JESAJA 44:4 AFR53
Onder die volk sal daar ‘n gesindheid heers om naby God te leef, wat ‘n direkte gevolg is van die Gees van God wat op Sy volk uitgestort word. Hierdie profesie is nie van toepassing op die Jode wat na die Babeloniese ballingskap na Jerusalem teruggekeer het nie, maar sal gebeur wanneer Babilon in die toekoms tot niet gemaak word, en die Gees van God oor Israel uitgestort word net voor die begin van die Millenium.
“Die een sal sê: Ek behoort aan die Here; en die ander sal die naam van Jakob uitroep; en die ander sal met sy hand skrywe: Ek behoort aan die Here, en hom met die erenaam Israel noem.” JESAJA 44:5 AFR53
7 April 2023
JESAJA 44:6 AFR53
“So sê die Here, die Koning van Israel en sy Losser, die Here van die leërskare: Ek is die Eerste, en Ek is die Laaste, en buiten My is daar geen God nie.”
Jesaja sê vir ons presies wie hier praat: Die Here, die Koning van Israel en sy Losser, die Here van die leërskare. Ons hoef nie te wonder of dit een of ander afgod is nie, ons weet dit is die enigste ware God van die heelal wat hier praat. God, die Koning van Israel en die Koning van die engele.
Die Here het reeds hierdie unieke titel in Jesaja 41:4 geneem, in dieselfde konteks van die verkondiging van Sy heerlikheid teenoor die swak valse gode.
“Wie het dit gedoen en tot stand gebring? Hy wat die geslagte roep van die begin af; Ek, die Here, die Eerste, en by die laaste is Ek dieselfde.” JESAJA 41:4 AFR53
'n Afgod kan nooit die Eerste wees nie, want 'n afgod het iemand nodig om hom te maak. 'n Afgod kan ook nooit die Laaste wees nie, want hulle verslyt en breek. Maar die Here God van Israel is die Eerste sowel as die Laaste; Hy is heeltemal uniek, en buiten Hom is daar geen God nie.
“En toe ek Hom sien, val ek soos 'n dooie aan sy voete; en Hy het sy regterhand op my gelê en vir my gesê: Moenie vrees nie; Ek is die eerste en die laaste” OPENBARING 1:17 AFR53
“Ek is die Alfa en die Oméga, die begin en die einde, die eerste en die laaste. OPENBARING 22:13 AFR53
Omdat God die Eerste en die Laaste is, leef Hy buite ons tydsdomein en kan Hy dinge verkondig voordat dit gebeur. Hy kan die dinge verkondig wat kom en sal kom.
“En wie roep soos Ek — laat hom dit dan te kenne gee en aan My voorlê — vandat Ek die volk van die ou tyd gegrond het? En laat hulle die toekomstige dinge en wat sal gebeur, te kenne gee.” JESAJA 44:7 AFR53
Wanneer ons werklik weet wie God is, en Sy groot wysheid en gesag oor alle dinge, wis dit alle vrees in ons lewens uit. Daarom hoef geeneen te vrees of verskrik te wees nie.
Daar is valse gode, simboliese gode, en die ware God – en die enigste ware God is Yahweh, die Here. Daar is inderdaad geen ander Rots nie. Aangesien God die enigste God is, is Hy die enigste vaste Rots waarop ons ons lewe kan bou.
“Wees nie verskrik nie, en moenie bewe nie! Het Ek jou dit nie lank tevore laat hoor en te kenne gegee nie? En júlle is my getuies! Is daar 'n God buiten My? Ja, daar is geen rotssteen nie; Ek ken geeneen nie.” JESAJA 44:8 AFR53
8 April 2023
JESAJA 44:9 AFR53
“Hulle wat gesnede beelde maak, is almal nietigheid, en hulle lieflinge bring geen voordeel nie; en hulle getuies — dié sien niks en weet niks, sodat hulle beskaamd staan.”
Jesaja verduidelik goedig-neerhalend hoe die dierbare afgode – wat nie kan help nie – gemaak word. Hulle kan nie sien of hoor nie, en kan dus nie help nie. Wie mors hul tyd om ‘n god te maak wat niks kan doen nie?
“Wie maak 'n god en giet 'n beeld wat geen voordeel aanbring nie?” JESAJA 44:10 AFR53
Die deler is so goed soos die steler. Die wat die beelde maak om te aanbid en hulle wat die beelde aanbid word onder dieselfde kam geskeer, en elkeen sal beskaamd staan wanneer hulle besef dat geeneen van die gode ooit of enigsins kan help nie.
“Kyk, al sy aanhangers sal beskaamd staan; en die ambagsmanne is uit die mense! Laat hulle almal bymekaarkom, gaan staan, verskrik wees, tesame beskaamd staan!” JESAJA 44:11 AFR53
Die ystersmid werk met sy gereedskap in die gloeiende kole en vorm sy beeld met hamers. Sy werk maak hom honger en uitgeput.
“Die ystersmid het 'n byl en werk in die gloed; en hy maak hom met hamers en bewerk hom met sy sterk arm; daarby word hy honger en het geen krag nie; drink hy geen water nie, dan word hy moeg.” JESAJA 44:12 AFR53
Die houtwerker meet en skaaf en gebruik bytels om sy beeld te maak wat soos ‘n mens lyk en in sy huis moet woon.
“Die timmerman span 'n lyn; hy trek hom af met 'n potlood; hy bewerk hom met skawe en teken hom met 'n passer en maak hom na die beeltenis van 'n man, na die skoonheid van 'n mens, om in 'n huis te woon.” JESAJA 44:13 AFR53
‘n Ander ambagsman plant ‘n sederboom, sipres, eikeboom of ‘n lourierboom en wag vir die reën om die boom te laat groei.
“Een gaan sederbome afkap, en hy neem 'n steeneik of 'n eikeboom en laat een vir hom opgroei onder die bome van die bos. Hy het 'n pynboom geplant, en die reën het dit grootgemaak.” JESAJA 44:14 AFR53
Let nou op hoe skreiend ironies die dwaasheid beskryf word om dieselfde hout of vir ’n braaivleisvuur of vir die maak van ’n afgod te gebruik en dan die afgod te aanbid.
“Dan dien dit die mens as brandhout, en hy neem daarvan en maak hom warm; ook steek hy dit aan die brand en bak brood; ook maak hy daar 'n god van en buig hom daarvoor neer; hy maak daar 'n gesnede beeld van en kniel daarvoor neer. Die helfte daarvan het hy in die vuur verbrand: by die een helfte eet hy vleis, hy maak braaivleis klaar en word versadig; ook maak hy hom warm en sê: Ha, ek het warm geword, ek het vuur gesien! En van wat oor is, maak hy 'n god, sy gesnede beeld; hy kniel daarvoor neer en buig hom en aanbid dit en sê: Red my, want u is my god!” JESAJA 44:15-17 AFR53
9 April 2023
JESAJA 44:18 AFR53
“Hulle weet nie en verstaan nie, want hulle oë is toegesmeer, sodat hulle nie sien nie, hulle harte, sodat hulle nie verstaan nie;”
Jesaja beklemtoon dat sulke mense, die wat afgode aanbid, se oë toegepleister is en hulle het geen begrip nie.
Hulle het te min kennis of verstand om te besef dat hulle dieselfde stuk hout gebruik vir vuurmaak, braaivleis en dan in aanbidding voor dit kniel.
“en niemand neem dit ter harte nie, en daar is geen kennis of verstand om te sê nie: Die helfte daarvan het ek verbrand in die vuur, en ook het ek op die kole daarvan brood gebak; ek het vleis gebraai en geëet; en sal ek van die oorblyfsel daarvan 'n gruwel maak? Sal ek neerkniel voor 'n stuk hout?” JESAJA 44:19 AFR53
As is verbrande hout en dit is wat afgodedienaars hul eie maak. Die hart is die probleem, dit is die bron van die sonde, en bring hul siele in gevaar! Die werk van hulle regterhand - die vrug van hulle vaardigheid en moeite, is bedrieglik, en kan hulle nie red nie.
“Hy wat hom besig hou met as, 'n bedroë hart het hom verlei; sodat hy sy siel nie kan red, of kan sê nie: Is daar geen leuen in my regterhand nie?” JESAJA 44:20 AFR53
Onthou hierdie dinge wat gesê word oor die dwaasheid van afgodery en die nietigheid van die aanbidding van afgode. Vestig eerder jul aandag op God en plaas jul vertroue net in Hom, want Hy gaan Sy volk nooit vergeet nie.
“Dink aan hierdie dinge, o Jakob en Israel! Want jy is my kneg; Ek het jou geformeer; jy is my kneg, Israel! Jy sal deur My nie vergeet word nie.” JESAJA 44:21 AFR53
Soos ‘n sterk wind 'n dik donker wolk verdryf, en net ‘n helder en skoon blou hemel tot gevolg het, so laat God hulle sondes verdwyn.
“Ek delg jou oortredinge uit soos 'n newel en jou sondes soos 'n wolk; keer terug na My, want Ek het jou verlos.” JESAJA 44:22 AFR53
Jubel, o hemel en juig, die dieptes van die aarde en alle geskape dinge. Juig en breek uit in gejubel want die Here het dit gedoen. Hy het Sy volk uit hul ballingskap verlos.
“Jubel, o hemele, want die Here het dit gedoen. Juig, dieptes van die aarde! Breek uit in gejubel, o berge, bosse en al die bome daarin! Want die Here het Jakob verlos, en Hy sal Homself verheerlik aan Israel.” JESAJA 44:23 AFR53
10 April 2023
JESAJA 44:24 AFR53
“So sê die Here, jou Verlosser, en Hy wat jou geformeer het van die moederskoot af: Ek is die Here wat alles volbring, wat die hemel uitspan, Ek alleen, en wat die aarde uitsprei — wie was met My? —”
God bevestig deur Sy profeet Jesaja dat Hy die Here, Sy volk se Verlosser is en dat Hy hulle van die moederskoot, van die begin af, geformeer het.
God bevestig vêrder dat Hy, anders as die nietige afgode, alles volbring. Die afgode is uitgedaag om enige iets te doen, goed of sleg, maar niks het daarvan gekom nie. Goed het die leuenprofete en waarseêrs almal tot dwase gemaak.
Daarteen gaan God nou begin inligting deurgee van gebeure wat 150 jaar + in Jesaja se toekoms gaan gebeur, en die geskiedenis leer vir ons dat die gebeure wel plaasgevind het.
God wat die ganse hemel en aarde alleen geskape het gaan Sy Almag vir ons tentoonstel!
“wat die tekens van die leuenprofete vernietig en die waarsêers tot dwase maak; wat die wyse agteruit laat wyk en hulle kennis domheid maak;” JESAJA 44:25 AFR53
God gebruik Sy kneg Jesaja en al Sy ander boodskappers of profete om Sy Woord te volbring. Toe God se profete hierdie woorde gespreek het, het hulle nog in Jerusalem en die omliggende stede van Juda gewoon. Min wetend (omdat hulle nie vir die profete wou luister nie) dat Nebukadneser Jerusalem en die tempel sou verbrand en sou vernietig.
Nou openbaar God gebeure wat gaan plaasvind na hul Babeloniese ballingskap voltooi is. Jerusalem moet weer bewoon word en die stede van Juda moet weer herbou word. God sal die puinhope weer oprig.
“wat die woord van sy kneg vervul en die voorsegging van sy boodskappers volbring; wat van Jerusalem sê: Dit moet bewoon word; en van die stede van Juda: Hulle moet herbou word, en Ek sal sy puinhope oprig;” JESAJA 44:26 AFR53
Wat God spreek gebeur, en wanneer God ‘n rivier opdrag gee om te verdroog sal dit gebeur. Koning Kores van die Mede en Perse se generaal het op 12 Oktober 539 v.C. Babilon sonder ‘n geveg ingeval. Die generaal het die water van die Eufraatrivier stroomop afgelei na ‘n kanaal sodat die vlak van die water wat onder Babilon se muur deurgeloop het, gesak het tot die hoogte van die middel van ‘n man se bobeen. Die stad se waterverdedeging is hierdeur nutteloos gemaak en die Mede en Perse het daardie nag onderdeur die stadsmuur op die rivierbedding deurgeloop en die stad oorgeneem.
“wat vir die diepte sê: Verdroog! en jou riviere sal Ek laat verdroog;” JESAJA 44:27 AFR53
God kies Kores, die koning van die Mede en die Perse, spesiaal om Sy werk vir Hom te doen. Koning Kores sal vir God se volk opdrag gee om terug te keer na Jerusalem om sodoende die stad self en die tempel te herbou.
“wat van Kores sê: Hy is my herder, en hy sal alles volbring wat My behaag deurdat hy van Jerusalem sê: Dit moet gebou word, en die tempel moet gegrond word.” JESAJA 44:28 AFR53
11 April 2023
JESAJA 45:1 AFR53
“So sê die Here aan sy gesalfde, aan Kores, wie se regterhand Ek gevat het om nasies voor hom neer te werp, terwyl Ek die lendene van konings losgord; om voor hom deure oop te maak, en poorte sal nie gesluit bly nie:”
God gebruik die titel gesalfde vir ‘n nie-Joodse koning. God kan gebruik wie Hy wil en doen ook so.
God het inderdaad Kores se regterhand gevat en nasies voor hom neergewerp. Hy was ‘n magtige koning en het sowat 46 nasies gedurende sy koningskap oorwin.
Die lendene van konings losgord is ‘n verhaal wat ons in Daniel lees. Koning Belsasar, die kleinseun van Nebukadneser, berei ‘n groot feesmaal voor vir sy duisend maghebbers. Hy besluit toe om die goue en silwer voorwerpe wat sy oupa Nebukadneser van die Joodse tempel gebuit het, te gebruik tydens hierdie feesmaal.
“Koning Bélsasar het 'n groot maaltyd berei vir sy duisend maghebbers, en in teenwoordigheid van die duisend het hy wyn gedrink. By die genot van die wyn het Bélsasar bevel gegee om die goue en silwervoorwerpe te bring wat sy vader Nebukadnésar uit die tempel van Jerusalem weggevoer het, sodat die koning en sy maghebbers, sy vroue en sy byvroue daaruit kon drink.” DANIËL 5:1-2 AFR53
Die partytjie raak te lekker en almal drink heerlik uit die tempel se goue en silwer bekers. Asof dit nie sleg genoeg was nie, prys die klomp heidene die gode van goud, silwer, koper, yster, hout en klip terwyl hulle lekker partytjie hou.
“Toe het hulle die goue voorwerpe gebring wat uit die tempel, uit die huis van God in Jerusalem weggevoer was, en die koning en sy maghebbers, sy vroue en sy byvroue het daaruit gedrink. Hulle het wyn gedrink en die gode van goud en silwer, koper, yster, hout en klip geprys.” DANIËL 5:3-4 AFR53
Ons weet nou al dat God nie tyd het vir sulke gedrag nie, en Hy besluit om die klompie ‘n les te leer. Skielik verskyn daar ‘n mens se hand wat op die muur van die koninklike paleis skryf. Die koning en die mense sien die hand wat skryf in die skaduwee wat die kandelaar op die kalk van die muur gooi.
“Op dieselfde oomblik het daar vingers van 'n mens se hand te voorskyn gekom en teenoor die kandelaar op die kalk van die muur van die koninklike paleis geskrywe, en die koning het die deel van die hand gesien wat geskrywe het.” DANIËL 5:5 AFR53
En net daar verander die koning se gelaatskleure en God laat die lendene van die koning losgord. Dit beteken dat hy letterlik sy broek vuilgemaak het, en hy is so bang dat sy knieë teen mekaar slaan.
“Toe het die gelaatskleur van die koning verander, en sy gedagtes het hom verskrik, en die gewrigte van sy heupe het losgeraak, en sy knieë het teen mekaar geslaan.” DANIËL 5:6 AFR53
Die laaste van Jesaja se vers 1 sê dat die poorte nie gesluit was nie. Naas die water wat onder deur die muur van Babilon geloop het, was daar ook ‘n hek wat die opening bewaak het. Hierdie hek was die aand van die inname nie gesluit nie. Toeval? Nee glad nie, net God wat ‘under cover’ werk!
“Ek self sal voor jou uit gaan en hoogtes gelykmaak; koperdeure sal Ek verbreek en ystergrendels stukkend slaan.” JESAJA 45:2 AFR53
12 April 2023
JESAJA 45:3 AFR53
“En Ek sal jou die skatte gee wat in die donkerheid is en die verborge rykdomme, sodat jy kan weet dat Ek die Here is wat jou by jou naam roep, die God van Israel;”
Die nag wat Babilon geval het, het koning Kores geen besef gehad van God se leiding of teenwoordigheid nie. Hy het waarskynlik gedink hy is beide briljant en gelukkig. Dikwels slaag ons in iets, en sien nooit die wonderbaarlike hand van God agter alles nie.
Dat jy kan weet dat Ek, die Here, wat jou by jou naam roep, die God van Israel is: God het dit alles aangekondig meer as 150 jaar voor die vervulling daarvan, sodat Kores die Here sou ken en verheerlik.
“ter wille van Jakob, my kneg, en Israel, my uitverkorene, het Ek jou by jou naam geroep; Ek het jou 'n erenaam gegee, hoewel jy My nie geken het nie.” JESAJA 45:4 AFR53
Maar God het dit ook gedoen sodat Kores goedhartigheid aan Sy volk sou betoon, deur aan hulle toestemming te gee om terug te keer na die Beloofde Land uit die ballingskap wat deur die Babiloniërs aan hulle opgelê is.
Josephus wat ‘n Joodse geskiedkundige was het hierdie neergeskryf oor Jesaja se profesie en Kores (Cyrus) se kennis daarvan.
1. In the first year of the reign of Cyrus which was the seventieth from the day that our people were removed out of their own land into Babylon, God commiserated the captivity and calamity of these poor people, according as he had foretold to them by Jeremiah the prophet, before the destruction of the city, that after they had served Nebuchadnezzar and his posterity, and after they had undergone that servitude seventy years, he would restore them again to the land of their fathers, and they should build their temple, and enjoy their ancient prosperity. And these things God did afford them; for he stirred up the mind of Cyrus, and made him write this throughout all Asia: “Thus saith Cyrus the king: Since God Almighty hath appointed me to be king of the habitable earth, I believe that he is that God which the nation of the Israelites worship; for indeed he foretold my name by the prophets, and that I should build him a house at Jerusalem, in the country of Judea.“
2. This was known to Cyrus by his reading the book which Isaiah left behind him of his prophecies; for this prophet said that God had spoken thus to him in a secret vision: “My will is, that Cyrus, whom I have appointed to be king over many and great nations, send back my people to their own land, and build my temple.” This was foretold by Isaiah one hundred and forty years before the temple was demolished. Accordingly, when Cyrus read this, and admired the Divine power, an earnest desire and ambition seized upon him to fulfill what was so written; so he called for the most eminent Jews that were in Babylon, and said to them, that he gave them leave to go back to their own country, and to rebuild their city Jerusalem, and the temple of God, for that he would be their assistant, and that he would write to the rulers and governors that were in the neighborhood of their country of Judea, that they should contribute to them gold and silver for the building of the temple, and besides that, beasts for their sacrifices. (Josephus, Antiquities, 11.1.1-2)
Kores, die koning van Persië, het ere aan die Here die God van die hemel gegee, en bevestig dat God hom gekies het om Sy volk uit te stuur om God se tempel te bou in Jerusalem.
“So sê Kores, die koning van Persië: Al die koninkryke van die aarde het die Here, die God van die hemel, aan my gegee, en Hý het my opgedra om vir Hom 'n huis te bou in Jerusalem wat in Juda is. Enigeen onder julle wat aan sy volk behoort — mag die Here sy God met hom wees, en laat hom optrek!” II KRONIEKE 36:23 AFR53
13 April 2023
ESRA 1:1 AFR53
“En in die eerste jaar van Kores, die koning van Persië, het die Here — sodat die woord van die Here uit die mond van Jeremia vervul sou word — die gees van Kores, die koning van Persië, opgewek, dat hy 'n oproep deur sy hele koninkryk laat gaan het, selfs ook skriftelik, om te sê:”
Daniel het in die eerste jaar van die Meders se regering, in die geskrifte gelees en gesien dat die profeet Jeremia geskryf het, dat hulle sewentig jaar in ballingskap sou wees. Daniel het besef dat hulle in die sewentigste jaar van hul ballingskap was en tot God gebid vir wysheid.
“In die eerste jaar van Daríus, die seun van Ahasvéros, uit die geslag van die Meders, wat koning gemaak was oor die koninkryk van die Chaldeërs, in die eerste jaar van sy regering het ek, Daniël, in die boeke gemerk dat die getal jare waaroor die woord van die Here tot die profeet Jeremia gekom het met betrekking tot die puinhope van Jerusalem, sewentig volle jare was. En ek het my aangesig tot die Here God gerig om met vas, en in roukleed en as, my aan gebed en smekinge te wy.” DANIËL 9:1-3 AFR53
Hiermee Jeremia se profesie waarna Daniel verwys.
“En hierdie hele land sal 'n puinhoop, 'n woesteny word; en hierdie nasies sal die koning van Babel sewentig jaar lank dien. En as sewentig jaar vol is, sal Ek oor die koning van Babel en oor dié nasie, spreek die Here, hulle ongeregtigheid besoek, en oor die land van die Chaldeërs, en sal dit ewige wildernisse maak. En Ek sal oor dié land bring al my woorde wat Ek daaroor gespreek het — alles wat geskrywe is in hierdie boek, wat Jeremia geprofeteer het oor al die nasies.” JEREMIA 25:11-13 AFR53
Esra beskryf die gebeure nadat Kores eerstens Jesaja se profesie gelees het wat hom by die naam geroep het, en tweedens Jeremia se profesie wat bepaal het hoeveel jaar die volk se ballingskap sou duur.
“So sê Kores, die koning van Persië: Al die koninkryke van die aarde het die Here, die God van die hemel, aan my gegee; en Hý het my opgedra om vir Hom 'n huis te bou in Jerusalem wat in Juda is.” ESRA 1:2 AFR53
Hoekom sou die volk spesifiek vir sewentig jaar in ballinskap moes wees? Die antwoord vir die vraag is in die volgende vers.
“sodat die woord van die Here deur die mond van Jeremia vervul sou word: totdat die land vir sy sabbatte vergoeding gekry het; al die dae van die verwoesting het dit gerus om sewentig jaar vol te maak.” II KRONIEKE 36:21 AFR53
Die sabatsjaar wet word in Levitikus vir die volk gegee.
“Verder het die Here met Moses gespreek by die berg Sinai en gesê: Spreek met die kinders van Israel en sê vir hulle: As julle in die land inkom wat Ek julle gee, moet die land 'n sabbat hou vir die Here. Ses jaar lank mag jy jou land saai en ses jaar lank jou wingerd snoei en die opbrings daarvan insamel; maar in die sewende jaar moet daar vir die land volkome rus wees, 'n sabbat vir die Here; jou land mag jy nie saai en jou wingerd nie snoei nie.” LEVÍTIKUS 25:1-4 AFR53
Die volk het dus vir 490 jaar (70 jaar x 7 jaar tydperke) nie hul sabatsjare gehou nie, en God het besluit om Sy sewentig sabatsjare terug te neem deur die volk uit die land te verwyder.
14 April 2023
JESAJA 45:5 AFR53
“Ek is die Here, en daar is geen ander nie; buiten My is daar geen God nie; Ek omgord jou, hoewel jy My nie geken het nie,”
Kores het nie die Here geken nie, tog kon God hom salf, lei, seën en gebruik.
“Die koning se hart is in die hand van die Here soos waterstrome: Hy lei dit waarheen Hy wil.” SPREUKE 21:1 AFR53
Kores se proklamasie in Esra 1 het uitgegaan na die hele wêreld van daardie tyd van die ooste tot die weste, uitgebeeld van waar die son opkom tot by sy ondergang. Kores het aan die hele wêreld die grootheid en uniekheid van die Here God van Israel erken.
“sodat hulle kan weet van die opgang van die son en van sy ondergang af dat daar buiten My geeneen is nie; Ek is die Here, en daar is geen ander nie;” JESAJA 45:6 AFR53
Die Persiese geloof in Kores se tyd het ‘n dualistiese konsep van hul gode en die wêreld gehad. Hulle goeie god was Ahura-mazda en die bose god Angra-mainya. Die goeie god het die lig geskep, die bose god die duisternis.
Maar God, die Heerser van die heelal, het geen teenoorgestelde nie. Satan is nie en was nog nooit God se teenoorgestelde nie. Daar is slegs een God. God is nie die skepper van die kwaad nie, en kwaad is nooit oorspronklik nie, maar altyd die afwesigheid van goed of God.
‘Die Here is ongetwyfeld geen verteenwoordiger van die kwaad as sodanig nie, maar Hy maak gebruik van die kwaad sodat dit die goeie kan voortbring.’ (Calvyn, aangehaal in Bultema)
Wanneer God groot, wonderbaarlike dinge doen, is dit maklik om te glo dat Hy in beheer is, maar wanneer tye moeilik is en die beproewinge swaar is, moet ons dit des te meer glo.
“wat die lig formeer en die duisternis skep, die heil bewerk en die onheil skep: Ek, die Here, is dit wat al hierdie dinge doen.” JESAJA 45:7 AFR53
Die regverdige en genadige dade van God vir Sy volk, sal soveel wees, asof God reënbuie van geregtigheid uit die hemel laat reën het en die aarde ontvang die reën om seëninge voort te bring.
“Laat dit drup, o hemele, van bo af, en laat die wolke vloei van geregtigheid; laat die aarde oopgaan, en laat heil voortkom en geregtigheid; laat hulle saam uitspruit. Ek, die Here, het dit geskape.” JESAJA 45:8 AFR53
15 April 2023
JESAJA 45:9 AFR53
“Wee hom wat met sy Formeerder twis — 'n potskerf by erdepotskerwe! Sal dan die klei sê aan die wat dit vorm: Wat maak jy? Of jou werk sê: Hy het geen hande nie!”
Die wete dat God die Skepper van alle dinge is, behoort ons huiwerig te maak om God op enige manier teë te staan. Net so dwaas soos wanneer die klei vir sy maker sê: Wat maak jy? of, jy het nie hande nie! As die een wat jou deur sy hande vorm nie hande het nie, dan bestaan jy nie.
“Wee hom wat vir die vader sê: Waarom verwek u? en vir die vrou: Waarom het u weë?” JESAJA 45:10 AFR53
Israel word gewaarsku om nie vir God te bevraagteken nie. Die profeet Jeremia verduidelik dit mooier.
“Sal Ek nie soos hierdie pottebakker met julle kan maak nie, o huis van Israel? spreek die Here. Kyk, soos klei in die hand van die pottebakker, so is julle in my hand, o huis van Israel! In een oomblik sal Ek spreek oor 'n nasie en oor 'n koninkryk om dit uit te ruk en om te gooi en te vernietig; maar as dié nasie waaroor Ek gespreek het, hulle bekeer van hul boosheid, sal Ek berou hê oor die onheil wat Ek van plan was om hulle aan te doen.” JEREMIA 18:6-8 AFR53
God sê vir Sy volk dat in plaas daarvan om te kla oor wat Hy doen of om heeltyd fout te soek, moet hul Hom eerder vra oor toekomstige gebeure.
“So sê die Here, die Heilige van Israel en sy Formeerder: Vra My aangaande die toekomstige dinge; vertrou my seuns en die werk van my hande aan My toe!” JESAJA 45:11 AFR53
God verklaar aan Sy volk dat Hy wat die aarde gemaak het en die mense geskape het, en die hemel uitgespan het, en aan die ganse leërskare bevel gee, is tog instaat om na hulle om te sien en hulle te beskerm.
“Ek het die aarde gemaak en die mens daarop geskape; Ek — my hande het die hemel uitgespan, en Ek het aan sy ganse leërskare bevel gegee.” JESAJA 45:12 AFR53
God verklaar vêrder dat Hy Kores verwek het om Sy stad te bou en Sy ballinge los te laat. Kores het selfs die volk nie met leë hande uitgestuur nie, hy het geld en die tempel voorwerpe wat Nebukadneser geplunder het als saamgegee. God het al hierdie gebeure vooraf beplan.
“Ek het hom verwek in geregtigheid, en al sy weë sal Ek gelykmaak; hý sal my stad bou en my ballinge loslaat sonder koopprys en sonder geskenk, sê die Here van die leërskare.” JESAJA 45:13 AFR53
16 April 2023
JESAJA 45:14 AFR53
“So sê die Here: Die opbrings van Egipte en die handelswins van Kus en die Sabeërs, manne van hoë gestalte, sal na jou toe oorkom en joue wees; hulle sal agter jou loop; in kettings sal hulle oortrek en hulle voor jou buig; hulle sal jou smeek en sê: Waarlik, God is in jou; en anders is daar geen, geen God meer nie!”
Egipte, Kus en die Sabeërs buig voor Israel, hulle kom oor in kettings, wat beteken hulle dien Israel en dit wys vorentoe na die Millenium tydperk. Dit is totaal teenoorgesteld van die tyd toe Israel slawe was in Egipte.
Gedurende die volk se slawerny in Egipte het God Homself vir Sy volk verberg, sodat Hy in hul toekoms weer na vore kon en kan kom om die volk se vyande tot skande te bring en Israel tot heerlikheid te bevorder.
“Waarlik, U is 'n God wat U verborge hou, die God van Israel, die Heiland. Hulle het beskaamd gestaan en ook in die skande gekom, hulle almal; hulle het tesame met skande heengegaan — die wat afgode maak.” JESAJA 45:15-16 AFR53
Israel word opgeroep om vertroue in God te hê. God is besig met Israel deur die geskiedenis heen, en God is goed vir Israel en wys daardie goedheid op die ou end ten volle net soos Hy belowe om hier te doen.
“Israel word verlos deur die Here met 'n ewige verlossing; julle sal nie beskaamd staan of in die skande kom tot in alle ewigheid nie.” JESAJA 45:17 AFR53
Jesaja beklemtoon met herhaling dat God alleen en nie enige gode nie, die hemele en die aarde gevorm en gemaak het. Nie om woes en leeg te wees nie maar om bewoon te word.
“Want so sê die Here, wat die hemele geskape het — Hy is God! — wat die aarde geformeer en dit gemaak het — Hy het dit bevestig; Hy het dit nie geskape om woes te wees nie, maar dit geformeer om bewoon te word — Ek is die Here, en daar is geen ander nie.” JESAJA 45:18 AFR53
God spreek nooit in die geheim nie en niemand soek God ooit tevergeefs nie.
“Ek het in die geheim nie gespreek nie — op 'n plek van die donker land; Ek het aan die geslag van Jakob nie gesê: Soek My tevergeefs nie. Ek is die Here wat geregtigheid spreek, wat regte dinge verkondig.” JESAJA 45:19 AFR53
Die profeet Jeremia bevestig dat indien Israel God sou soek met hul hele hart, dan sal hulle Hom vind.
“En julle sal My soek en vind as julle na My vra met julle hele hart.” JEREMIA 29:13 AFR53
In die Nuwe Testament bevestig die skrywer van Hebreërs dat wie God soek moet ten volle glo dat God is, of bestaan, en ‘n beloner is van die wat Hom met ‘n opregte hart soek.
“En sonder geloof is dit onmoontlik om God te behaag; want hy wat tot God gaan, moet glo dat Hy is en 'n beloner is van die wat Hom soek.” HEBREËRS 11:6 AFR53
17 April 2023
JESAJA 45:20 AFR53
“Versamel julle en kom, kom almal nader, julle wat uit die nasies ontvlug het! Hulle weet niks, wat die hout van hul gesnede beeld dra en 'n god aanbid wat nie kan verlos nie.”
Almal van julle wat gesnede beelde dra en gode aanbid wat julle nie kan verlos nie, kom almal nader, almal van julle wat uit die nasies gevlug het.
Stel jul saak, gee jul bewyse, bring jul sterkste argumente na vore en debateer met mekaar daaroor. Wie het al die dinge wat gebeur het, lankal terug verkondig? Wie het meer as 150 jaar voor dit gebeur het, Kores by die naam geroep? Is dit nie God nie? God verklaar dat buiten Hom is daar geen ander God nie! Net God is regverdig en kan mense red, geen ander nie!
“Verkondig en bring voor, ja, laat hulle saam raad hou: Wie het dit van ouds af laat hoor, lank tevore dit verkondig? Is dit nie Ek, die Here, nie? En buiten My is daar geen ander God nie: 'n regverdige en reddende God is daar buiten My nie.” JESAJA 45:21 AFR53
Hierdie eenvoudige maar kragtige stelling gee vir ons God se verlossingsplan.
“Wend julle tot My en laat julle red, alle eindes van die aarde! Want Ek is God, en daar is geen ander nie.” JESAJA 45:22 AFR53
Wanneer God 'n eed bevestig, by wie sweer Hy? Hy sweer slegs by Homself. Daar is niemand groter nie, daarom sweer God by Sy eie heilige Naam en karakter. ‘n Voorbeeld hiervan is God se verbond met Abraham.
“Want toe God aan Abraham die belofte gegee het, het Hy, omdat Hy by geen meerdere kon sweer nie, by Homself gesweer”. HEBREËRS 6:13 AFR53
God verklaar vêrder dat daar 'n dag sal kom wanneer elke knie voor Hom sal buig, en elke tong sal sweer by Sy grootheid. Almal, al die nasies, sal weet dat redding en krag slegs in God alleen is. Maar, al die nakomelinge van Israel sal gered word omdat hulle aan Hom behoort, en hulle sal in Hom roem.
“Ek sweer by Myself; geregtigheid gaan uit my mond, 'n woord wat nie herroep word nie: dat voor My elke knie sal neerbuig, by My elke tong sal sweer. Hulle sal van My sê: Alleen in die Here is volle geregtigheid en sterkte; na Hom sal hulle kom; maar hulle almal sal beskaamd staan wat op Hom toornig is. In die Here sal geregverdig word en hulle beroem die hele geslag van Israel.” JESAJA 45:23-25 AFR53
Paulus beaam in die Nuwe Testament dat in die Naam van Jesus, elkeen wat in die hemel en op die aarde en onder die aarde is, die knie sal buig en sal erken dat Jesus Christus die Here is.
“Daarom het God Hom ook uitermate verhoog en Hom 'n naam gegee wat bo elke naam is, sodat in die Naam van Jesus sou buig elke knie van die wat in die hemel en die wat op die aarde en die wat onder die aarde is, en elke tong sou bely dat Jesus Christus die Here is tot heerlikheid van God die Vader.” FILIPPENSE 2:9-11 AFR53
Comments