24 Julie 2024
SEFÁNJA 1:1 AFR53
Die woord van die Here wat gekom het tot Sefánja, die seun van Kusi, die seun van Gedálja, die seun van Amárja, die seun van Hiskía, in die dae van Josía, die seun van Amon, koning van Juda.
Die eerste vers van Sefanja gee vir ons sy geslagslyn, asook die koning van Juda onder wie hy sy profetiese loopbaan beoefen het.
Sefanja was self van adelike afkoms en wel ‘n afstammeling van koning Hiskia. Sefanja se naam beteken ‘wie die Here wegsteek of beskerm’. Hy is gebore tydens die laaste deel van koning Manasse se regering, maar hy het eers begin profeteer tydens koning Josia se regering.
Josia se pa was Amon en sy oupa was Manasse en albei was goddelose konings wat gedoen het wat verkeerd was in die oë van die Here.
Josia het dit egter as sy plig beskou om die goddelose godsdienspraktyke van sy pa en oupa uit Juda uit te verban, en gevolglik het dit polities voorspoedig met Juda gegaan.
Manasse het altare vir Baäl, Asjera en die son, maan en sterre gebou en dit in beide voorhowe van die tempel geplaas. In sy tyd is kinders aan Milkom geoffer en die mense het omgegaan met dodebesweerders en waarsêers en het gedoen wat verkeerd was in die oë van die Here.
Koning Amon, wat moontlik na 'n Egiptiese godheid vernoem is, het sy vader se beleid voortgesit tot en met sy dood deur ‘n sluipmoordenaar.
Josia het koninklike bloed in sy are gehad, maar meer belangrik, hy het die boodskap van God op sy lippe gehad. Josia het op die ouderdom van agt koning geword, en op die ouderdom van sestien het hy hom aan God toevertrou.
Godsdienstige afgodery het hoogty gevier toe Josia koning geword het omdat sy pa, Amon, Manasse se bose gebruike voortgesit het. Toe Josia twintig was, het hy 'n groot hervorming in die land begin, die afgode afgebreek en die valse priesters en profete veroordeel. Hy het toe begin om die tempel te herbou en die nasie gelei om weer die Pasga te vier.
Sefanja profeteer in Juda voor die val van Nineve en ook waarskynlik voor die hervormings van Josia ingeskop het. Dié hervormings het veranderinge ingesluit van juis dié dinge waarteen Sefanja hom uitgespreek het (1:4 – Baälaanbidding; 1:5 – aanbidding van hemelliggame). Josia het dus waarskynlik Sefanja se boodskap ter harte geneem, soos hy dit ook gedoen het met die boodskap van Jeremia.
Sefanja het egter dieper gesien - hy het die harte van die mense gesien, en hy het geweet dat hulle godsdienstige ywer nie opreg was nie. Die hervormings was vlak. Die mense het ontslae geraak van die afgode in hul huise, maar nie die afgode in hul harte nie. Die heersers van die land was steeds gierig en ongehoorsaam, en die stad Jerusalem was die bron van alle soorte boosheid in die land.
Sefanja verkondig sterk – soos die profeet Joël – dat die ‘dag van die Here’ gaan aanbreek. Verwysings na ‘die of daardie dag’ kom bv. 16 keer voor tussen verse 1:7 en 2:3. Hierdie dag van die Here sluit soos by al die ander profete oordeel en genade in.
Tog eindig die boek steeds met van die mooiste beskrywings van die verlossing wat God sal bring. Dit geld vir beide die nasies en God se volk.
25 Julie 2024
SEFÁNJA 1:2 AFR53
Saamskraap, wegraap sal Ek alles van die aardbodem af weg, spreek die Here.
Nadat Sefanja in vers 1 sy profesie histories geplaas het in die tyd van koning Josia van Juda, vervolg hy met die aankondiging van die dag van die Here.
Soos ons verder in hierdie profesie inbeweeg, sal ons sien dat hierdie oordeel meer as net die land van Israel raak. Dit is 'n wêreldwye verwoesting wat hier gedek word. Die boek Openbaring bevestig die profesie en plaas die tyd van hierdie oordeel as die Verdrukking tydperk.
Gedurende daardie tyd sal hierdie aarde absoluut geraak word deur die oordele wat daaroor sal kom. Dit sal gebeur net voordat God die duisendjarige Koninkryk inbring en die aarde vernuwe.
Ek sal wegraap mense en diere, Ek sal wegraap die voëls van die hemel en die visse van die see en die struikelblokke saam met die goddelose, ja, Ek sal die mense uitroei van die aardbodem af weg, spreek die Here. SEFÁNJA 1:3 AFR53
...mens, dier, voëls, visse... Interessant genoeg is hierdie vier in omgekeerde volgorde van skepping: visse, voëls, vee en wilde diere, en die mens.
En God het gesê: Laat die waters wemel met 'n gewemel van lewende wesens, en laat die voëls oor die aarde vlieg langs die uitspansel van die hemel. GÉNESIS 1:20 AFR53
En God het gesê: Laat die aarde lewende wesens voortbring volgens hulle soorte: vee, kruipende diere en wilde diere van die aarde volgens hulle soorte. En dit was so. GÉNESIS 1:24 AFR53
En God het gesê: Laat Ons mense maak na ons beeld, na ons gelykenis, en laat hulle heers oor die visse van die see en die voëls van die hemel en die vee en oor die hele aarde en oor al die diere wat op die aarde kruip. GÉNESIS 1:26 AFR53
Sefanja se belofte van oordeel in die vorige verse was wyd genoeg om die hele aarde in te sluit, en om Juda te laat dink dat God hulle nie regtig daarby ingevoeg het nie. Maar nou fokus God op Sy volk sodat Juda en Jerusalem onder geen wanbegrip moet verkeer nie.
Sefanja se profesie beweeg tussen hul naderende oordeel en dan die oordeel wat nog in ons toekoms moet gebeur.
God kondig Sy oordeel aan teen die afgodsdienaars van Israel. Blykbaar het beide die leierskap en die volk ag geslaan op hierdie aankondiging van oordeel, want in die dae van Josia is hierdie soort growwe afgodery weggedoen.
En Ek sal my hand uitstrek teen Juda en teen al die inwoners van Jerusalem; Ek sal ook uit hierdie plek uitroei wat van Baäl oorgebly het, die naam van die afgodsdienaars saam met die priesters; SEFÁNJA 1:4 AFR53
Oordeel begin by die ‘huis van God’. Petrus herinner dat die goddeloses God se oordeel in die gesig sal staar, maar dat gelowiges in Christus hulleself aan 'n hoër standaard moet hou as wat hulle vroeër gedoen het. Die vurige beproewings wat hulle in die gesig staar, gebeur om hulle soos goud te help verfyn.
Want die tyd is daar dat die oordeel moet begin by die huis van God. En as dit eers by ons begin, wat sal die einde wees van die wat aan die evangelie van God ongehoorsaam is? I PETRUS 4:17 AFR53
26 Julie 2024
SEFÁNJA 1:5 AFR53
en die wat op die dakke die leër van die hemel aanbid; en die aanbidders wat by die Here sweer en sweer by Milkom.
Nadat Sefanja gesê het dat God die vals priesters sou verwyder, stel hy drie vorms van afgodsaanbidding aan die kaak.
Eerstens spreek hy die aanbidders van die leër van die hemel - die son, maan en sterre - aan. Die wat op plat dakke die sterre aanbid.
God het duidelik teen hierdie gebruik om die son, maan en sterre te aanbid, gewaarsku.
dat jy ook jou oë nie na die hemel opslaan, en as jy die son sien en die maan en die sterre, die hele leër van die hemel, jou laat verlei en voor hulle neerbuig en hulle dien nie — dinge wat die Here jou God aan al die volke onder die hele hemel uitgedeel het. DEUTERONÓMIUM 4:19 AFR53
Manasse, koning Josia se oupa het hom egter nie aan God se waarskuwings gesteur nie.
En hy het altare gebou vir die hele leër van die hemel in altwee die voorhowe van die huis van die Here; II KONINGS 21:5 AFR53
Tweedens het Sefanja diegene aangespreek wat gepoog het om die aanbidding van God te kombineer met die aanbidding van Milkom. Die was die hoofgod van die Ammoniete, 'n volk oos van die Dooie See. Milkom is aanbid deur hul kinders aan die afgod te offer.
omdat hulle My verlaat en hul neergebuig het voor Astárte, die godin van die Sidoniërs, voor Kamos, die god van die Moabiete, en voor Milkom, die god van die kinders van Ammon, en nie gewandel het in my weë deur te doen wat reg is in my oë, naamlik my insettinge en my verordeninge, soos sy vader Dawid nie. I KONINGS 11:33 AFR53
Derdens spreek die profeet die aan wat afvallig geword het van God of onbekommerd was oor die aanbidding van die ware God, alhoewel hulle dalk nie ander gode aanbid het nie. Die wat hul rug op God draai, nie na Sy wil vra nie en Hom nie raadpleeg nie.
Ook die wat van die Here afvallig word en wat die Here nie soek en Hom nie raadpleeg nie. SEFÁNJA 1:6 AFR53
Ons het hier die eerste van vele verwysings na die dag van die Here.
Sefanja beveel almal om stil te raak voor God. Bly stil, jy wat murmureer in ontevredenheid voor die teenwoordigheid van die Here God.
'n Dag van wraak van die Here is naby. God het ‘n offer voorberei, en die offer is die mense van Juda wat deur Babilon verower en in ballingskap uit hul land weggevoer sal word.
Swyg voor die Here Here! Want die dag van die Here is naby; want die Here het 'n offer berei, sy gaste geheilig. SEFÁNJA 1:7 AFR53
27 Julie 2024
SEFÁNJA 1:8 AFR53
En op die dag van die offer van die Here sal Ek besoeking doen oor die vorste en die prinse en oor almal wat uitlandse klere dra.
Sefanja se waarskuwing oor die nabye oordeel van God is vervul tydens die Babeloniese inval. Juda se laaste koning, koning Sedekia se kinders is voor hom doodgemaak en die koning self se oë is uitgesteek en hy is daarna in koperkettings na Babel geneem.
En hulle het die seuns van Sedekía voor sy oë geslag. En hy het die oë van Sedekía laat verblind en hom met koperkettings gebind en hom na Babel gebring. II KONINGS 25:7 AFR53
Die uitlandse klere het vreemde maniere en gewoontes geïmpliseer - om die kulturele gebruike van die heiden nasies aan te neem.
Hulle het ook die heiden nasies se bygelowe nagevolg deur bv. nie op ‘n drumpel te trap nie.
Ek sal ook op dié dag besoeking doen oor almal wat oor die drumpel spring, wat die huis van hulle here vul met geweld en bedrog. SEFÁNJA 1:9 AFR53
Dit het verwys na die Filistynse se gebruik om nie op die drumpel van die tempel te trap nie ná die val van die afgod Dagon?
Maar toe hulle die volgende môre vroeg opstaan, sien hulle Dagon lê met sy gesig op die grond voor die ark van die Here; maar die hoof van Dagon en sy twee handpalms lê afgebreek op die drumpel: net Dagon se lyf het aan hom oorgebly. Daarom trap die priesters van Dagon en almal wat in die huis van Dagon ingaan, tot vandag toe nie op die drumpel van Dagon in Asdod nie. I SAMUEL 5:4-5 AFR53
Die nood en smart in die stad tydens die Babeloniese inval word baie konkreet beskryf met die benoeming van die plekke waar dit in Jerusalem ervaar sal word.
Die Vispoort was in die noorde, die tweede stadswyk of die Nuwe Stad was by wyse van spreke, anderkant die spoor, en die Vysel waarskynlik ‘n aanduiding van die markplein.
En op dié dag, spreek die Here — hoor! 'n geskreeu van die Vispoort af en 'n gehuil van die Nuwe Stad af en 'n groot gekraak van die heuwels af! Huil, o inwoners van die Vysel! want al die koopmans gaan te gronde, almal wat geld afweeg, word uitgeroei. SEFÁNJA 1:10-11 AFR53
Sosiaal en ekonomies sal Jerusalem verwoes word tot groot verbasing en afgryse van dié wat gedink het dat die Here nie goed óf kwaad kan doen nie.
En in dié tyd sal Ek Jerusalem met lanterns deursoek en besoeking doen oor die manne wat dik geword het op hulle afsaksel, wat in hulle hart sê: Die Here doen geen goed en Hy doen geen kwaad nie. SEFÁNJA 1:12 AFR53
Niemand sal vir die oordeel van God kan wegkruip nie. Dit kom, al moet God die lanterns of soekligte uithaal om hulle te vind.
Nadat koning Josia regeer het, het daar nooit weer 'n goeie koning opgestaan nie—Joahas, Jojakim, Jojagin en Sedekia was almal korrup.
En hulle rykdom sal geplunder word, en hulle huise verwoes word; en as hulle huise bou, sal hulle dit nie bewoon nie; en as hulle wingerde plant, sal hulle die wyn daarvan nie drink nie. SEFÁNJA 1:13 AFR53
28 Julie 2024
SEFÁNJA 1:14 AFR53
Naby is die groot dag van die Here, naby en baie haastig. Hoor! die dag van die Here! Bitterlik skreeu die held daar.
Die woord ‘naby’ waarmee die vers begin beklemtoon dat die vreeslike toorn van God vinnig oor die nasie sou kom.
Sefanja het kort na 622 v.C., die jaar van Josia se gedeeltelike herlewing, sy profeise geskryf, en dus was die dag van die Here in werklikheid op hande.
In 605 v.C., slegs 17 jaar na Josia se herlewing, het Juda onder Jojakim onderdanig aan Babilon geword en baie van Juda se beste jong manne is gedeporteer.
Onder Jojakim se ewe goddelose opvolger, Jojagin, is die stad weer in 597 v.C. deur Nebukadnesar beleër en sowat 10 000 Jode is gedeporteer. Onder Sedekia was die stad onder 'n lang beleg deur Nebukadnesar en is uiteindelik vernietig in die somer van 586 v.C.
Daardie dag, die groot dag, is 'n dag van toorn van die Chaldeërs, en van die Here.
Sefanja gee in verskillende woorde dieselfde boodskap, om die erns van die benoudhede van daardie tye wat skielik oor hulle sal kom, uit te druk. Grimmigheid, benoud, angs, woestheid, verwoesting, duisternis, donkerheid. Wolke en digte duisternis spruit voort uit die rook en vuur van die stad.
Dié dag is 'n dag van grimmigheid, 'n dag van benoudheid en angs, 'n dag van woestheid en verwoesting, 'n dag van duisternis en donkerheid, 'n dag van wolke en wolkenag, SEFÁNJA 1:15 AFR53
Onder die Jode is basuine gebruik om hul feeste aan te kondig, en om te waarsku teen 'n naderende vyand. Hier is dit egter die teken van vernietiging van die versterkte stede. Die sterkste vestings sal die onafwentbare aanval voel.
'n dag van basuingeklank en krygsgeskreeu teen die versterkte stede en teen die hoë hoekvestings. SEFÁNJA 1:16 AFR53
Die dag van die Here kom met geweld. Dit is ‘n dag van nood en benoudheid. Angs pak die mense beet en laat hulle soos blindes loop.
En Ek sal die mense in benoudheid bring, en hulle sal rondloop soos blindes, omdat hulle teen die Here gesondig het; en hulle bloed sal vergiet word soos stof en hulle ingewande soos drek. SEFÁNJA 1:17 AFR53
Geen rykdom sal in dié dag enigiemand red nie. Silwer en goud sal nutteloos wees wanneer die hele land verteer word deur die vuur van God woede.
Hulle silwer of hulle goud sal nie in staat wees om hulle op die dag van die grimmigheid van die Here te red nie, maar deur die vuur van sy ywer sal die hele aarde verteer word; want Hy bring vernietiging, ja, 'n verskriklike, oor die inwoners van die aarde. SEFÁNJA 1:18 AFR53
29 Julie 2024
SEFÁNJA 2:1 AFR53
Kom tot julleself, ja, kom tot inkeer, o nasie wat nie skaam word nie!
Juda word geroep om bymekaar te kom in 'n plegtige demonstrasie van nasionale rou.
Die aankondigings van oordeel in die vorige hoofstuk is 'n waarskuwing en 'n uitnodiging tot bekering. Die dikwels ongeskrewe tema agter byna elke profesie van oordeel is - dit is wat sal gebeur as jy jou nie bekeer nie! Hier pleit die profeet by Juda om te bekeer voordat dit te laat is.
Sefanja vertel dat elke dag soos kaf verby gaan, en daar is niks om te wys vir ‘n dag as ons dit afskeep vir dit wat die belangrikste is nie - om reg te kom en reg te bly voor God.
Dikwels is die duiwel se kragtigste leuen nie dat daar geen God, of geen Bybel, of geen waarheid is nie - dikwels is sy kragtigste leuen dat daar geen haas is nie. Nietemin, vandag is die dag van verlossing.
Voordat die besluit baar — soos kaf gaan die dag verby — voordat daar oor julle kom die toorngloed van die Here, voordat oor julle kom die dag van die toorn van die Here. SEFÁNJA 2:2 AFR53
Soek die Here sodat julle miskien verborge kan bly op die dag van die toorn van die Here! Kan hierdie moontlik ‘n verwysing na die wegraping wees?
Julle sal verborge wees. Julle sal bewaar word in die tyd van oordeel. Dit herinner aan die profeet se naam, wat geïnterpreteer word: Wie die Here verberg.
Soek die Here, o alle ootmoediges van die land, wat sy ordening onderhou; soek geregtigheid, soek ootmoedigheid — miskien sal julle verborge bly op die dag van die toorn van die Here. SEFÁNJA 2:3 AFR53
Die gemeente van Filadelfia in die boek Openbaring het ‘n soortgelyke boodskap ontvang.
Omdat jy die woord van my lydsaamheid bewaar het, sal Ek jou ook bewaar in die uur van beproewing wat oor die hele wêreld kom om die bewoners van die aarde op die proef te stel. OPENBARING 3:10 AFR53
Selfs Jesus het dieselfde waarskuwing gegee.
Waak dan en bid altyddeur, sodat julle waardig geag mag word om al hierdie dinge wat kom, te ontvlug en voor die Seun van die mens te staan. LUKAS 21:36 AFR53
Wat moet elkeen doen om moontlik verberg te word? Jesus gee weereens vir elkeen van ons die antwoord. Soek eers die koninkryk van God en sy geregtigheid, en al hierdie dinge sal vir julle bygevoeg word.
Maar soek eers die koninkryk van God en sy geregtigheid, en al hierdie dinge sal vir julle bygevoeg word. MATTHÉÜS 6:33 AFR53
30 Julie 2024
SEFÁNJA 2:4 AFR53
Want Gasa sal verlate wees en Áskelon tot verwoesting; Asdod sal op die helder middag verdryf word, en Ekron sal ontwortel word.
Nou verskuif die oordeel van Juda na die nasies. Vier van die stede van die Filistyne aan die westekant van Juda word genoem: Gasa, Askelon, Asdod, en Ekron. Oor hulle almal, ook dié wat van Kreta onder hulle kom woon het, voorspel Sefanja die oordeel van God.
Hulle sal ekonomies geruïneer word, en interessant genoeg, die eiendom van Juda word wanneer God uiteindelik die lot van Sy volk verander.
Wee die inwoners van die kusstreek, die nasie van die Kretiërs! Die woord van die Here is teen julle, Kanaän, land van die Filistyne — Ek verdelg jou, sodat daar niemand meer woon nie. En die kusstreek sal weiplekke met putte wees vir herders en krale vir kleinvee. En dit sal wees 'n deel vir die oorblyfsel van die huis van Juda: hulle sal daarop wei; hulle sal saans in die huise van Áskelon gaan lê, want die Here hulle God sal op hulle ag gee en hulle lot verander. SEFÁNJA 2:5-7 AFR53
Die oordeel word ook oor die Moabiete en Ammoniete aan die oostekant van Juda uitgespreek, die nageslag van Lot en broerskind van Abraham.
Die minagting en disrespek vir Juda se grondgebied word as primêre rede vir God se gramskap teen hulle aangegee. Daarmee het hulle God self geminag. Hulle sal ook ekonomies geruïneer word en die eiendom van Juda word wanneer God die lot van Sy volk verander.
Ek het gehoor die smaadtaal van Moab en die beskimpinge van die kinders van Ammon, waarmee hulle my volk gesmaad het, en hoe hulle hul groot gehou het teen sy grondgebied. Daarom, so waar as Ek leef, spreek die Here van die leërskare, die God van Israel: Moab sal word soos Sodom en die kinders van Ammon soos Gomorra — 'n veld van brandnekels en soutpanne en 'n verwoesting vir ewig; die oorblyfsel van my volk sal hulle berowe, en die res van my nasie sal hulle beërwe. Dit oorkom hulle vir hul trotsheid, want hulle het geskimp op en hulle groot gehou teen die volk van die Here van die leërskare. SEFÁNJA 2:8-10 AFR53
In ‘n kort oordeelsuitspraak word ook die mense wat in die kusstreke bly sowel as die Kussiete in die suide deur God aangespreek. Hy sal hul afgode tot niet maak en almal sal slegs vir God aanbid, elkeen op sy eie plek.
Vreeslik sal die Here teen hulle wees, want Hy laat al die gode van die aarde wegkwyn; sodat hulle Hom kan aanbid elkeen uit sy woonplek, al die kuslande van die nasies. Ook julle, o Kusiete, deurboordes van my swaard is hulle. SEFÁNJA 2:11-12 AFR53
Die fokus skuif dan na die noorde en die groot bedreiging van Assirië en Nineve. Ook hulle sal tot ‘n einde kom. Nineve sal verwoes word: Pelikane en uile sal op die stad se mooi pilare slaap, die wind sal deur die vensters huil. ‘n Droewige prentjie.
Dan sal Hy sy hand uitstrek teen die noorde, en Hy sal Assur vernietig en Ninevé tot 'n verwoesting maak, dor soos die woestyn. En binne-in die stad sal troppe vee lê en allerhande gediertes by troppe, die pelikaan sowel as die krimpvarkie op sy kapitele vernag; hoor! daar word gesing in die venster; verwoesting sit op die drumpel, want hulle het die sederwerk afgeruk. Dit is die uitgelate stad wat so veilig gewoon het, wat in sy hart gesê het: Dit is ek, en niemand anders nie! Hoe het dit 'n verwoesting geword, 'n lêplek vir wilde diere! Almal wat daar verbytrek, spot, skud met die hand. SEFÁNJA 2:13-15 AFR53
31 Julie 2024
SEFÁNJA 3:1 AFR53
Wee die opstandige en die besoedelde, die verdrukkende stad.
Ellende wag ook vir Jerusalem. Hulle wat teen God in opstand kom en nie op Hom vertrou nie. Amptenare, regters, profete en priesters is net op eie gewin uit. Net God doen nie onreg in dié stad nie!
Dit luister na geen stem nie, dit neem geen tugtiging aan nie; op die Here vertrou dit nie, tot sy God kom dit nie nader nie. Sy vorste binne-in hom is brullende leeus; sy regters is aandwolwe wat niks vir die môre oorlaat nie. Sy profete is ligsinnig, trouelose manne, sy priesters verontreinig wat heilig is, hulle verkrag die wet. SEFÁNJA 3:2-4 AFR53
Vir dié wat dit kan hoor: God gee môre vir môre Sy beslissing. Sy beslissing bly nie een dag uit nie. Die Hebreeuse woord wat hier met beslissing vertaal word, is geregtigheid. God is dus onverpoosd besig om die reg te handhaaf, vir dié wat bereid is om daarna te luister.
Die Here is regverdig binne-in hom, Hy doen geen onreg nie; elke môre laat Hy sy reg aan die lig kom, dit ontbreek nooit nie; maar die kwaaddoener ken geen skaamte nie. SEFÁNJA 3:5 AFR53
Verse 6 - 8 bied 'n prentjie van die Groot Verdrukking, die groot Dag van die Here.
Selfs al het God vir Jerusalem gewys dat Hy vertrou kan word, wil hulle nie vir Hom ontsag hê nie. Hulle het gretig bly sondig, en daarom sal die oordeel oor hulle voltrek word.
Ek het nasies uitgeroei, hulle hoekvestings is vernietig; hulle strate het Ek verwoes, sodat niemand meer verbygaan nie; hulle stede is verniel, sodat daar geen mens, geen inwoner in is nie. Ek het gesê: Mag jy My maar vrees, tugtiging aanneem! Dan sou sy woonplek nie uitgeroei word nie, nie plaasvind alles wat Ek teen hom bestel het nie. Nogtans het hulle met ywer al hulle handelinge bederwe. SEFÁNJA 3:6-7 AFR53
God is nie net geïnteresseerd in die nakoming van die wet nie, hoewel dit natuurlik ook deel van Sy opdrag aan ons is. Wat veral opval in Sy oordeel oor die volk is dat dit kom vanweë hul weiering om Hom te raadpleeg. Hy vra van Sy mense, trouens van alle mense om Sy wil te soek. Streef na geregtigheid, na nederigheid. Hoekom? Want God sal antwoord - Hy gee môre vir môre Sy beslissing, en Sy beslissing bly nie een dag uit nie.
Daarom, verwag My, spreek die Here, op die dag wat Ek My gereed maak vir die buit; want dit is my strafoordeel om nasies te versamel, koninkryke te vergader om my grimmigheid oor hulle uit te stort, al die gloed van my toorn. Want die ganse aarde sal deur die vuur van my ywer verteer word! SEFÁNJA 3:8 AFR53
Om God te dien en Sy goedkeuring en guns weg te dra, is dus eintlik baie eenvoudig. Ken Hom in alles wat jy doen. Vra van Hom wat Sy wil is, en gaan voer dit in nederigheid uit. Dít is die pad van seën wat ‘n mens net tot jou skade ignoreer.
Die eerste deel van hierdie hoofstuk is amper te angswekkend om te lees met al die donker profesieë van oordeel. Maar, nou draai ons van duisternis na die helderheid van seëninge.
1 Augustus 2024
SEFÁNJA 3:9 AFR53
Want dan sal Ek aan die volke rein lippe toebring, sodat hulle almal die Naam van die Here sal aanroep en Hom met 'n eenparige skouer sal dien.
Want dan - die woord ‘dan’ dui op 'n groot draaipunt in Sefanja se boodskap in beide toon en inhoud. God skuif nou van skrikwekkende voorspellings van vernietiging na profesieë van seën en vrede.
Rein lippe of ‘n suiwer taal sal aan die volke gegee word. Sou dit ‘n taal vry van godslastering wees of suiwer Hebreeus?
Na die val van die tempel in 70 n.C. het die Jode as gevolg van die verspreiding oor die wêreld, of die diaspora, die gebruik van die Hebreeuse taal verloor. Slegs skrifgeleerdes het nog Hebreeus as leertaal gebruik. Vêrder het die taal ook vermeng met die tale van die lande waar die Jode gewoon het om so die suiwerheid daarvan te verloor.
Zephania Elineazer Ben Yahoda (1858-1922) het dit sy lewenstaak gemaak om die Hebreeuse taal te suiwer en om ‘n groter woordeskat van die basis woorde op te bou.
Hebreeus is vandag die gom wat die Jode wat verskillende tale praat bymekaar hou, en Hebreeus het in 1982 die offisiële taal van Israel geword.
Die Jode sal terugkeer na hul land Israel – en wel in ‘n spesifieke volgorde. In die laaste eeu alleen het miljoene Jode begin terugkeer na Israel. Jesaja het geprofeteer dat Jode uit al vier rigtings sou terugkeer, en dit het ons gesien soos die lys hier toon.
Oos – 1930 tot 1940 (vanaf Sirië, Irak en Jordanië)
Wes – vanaf Wes Europa na die 2de wêreld oorlog
Noord – Rusland vanaf 1988
Suid – die Etihopiërs
Wees nie bevrees nie, want Ek is met jou; Ek sal jou geslag van die ooste af aanbring en jou versamel van die weste af. Ek sal sê aan die noorde: Gee! en aan die suide: Hou nie terug nie! Bring my seuns van ver, en my dogters van die einde van die aarde af, JESAJA 43:5-6 AFR53
Sefanja gee vir ons meer inligting oor die terugkeer uit die suide vanaf Kus of Etihopië. Die profesie is vervul met Israel se operasie Solomon.
Oorkant die riviere van Kus vandaan sal my aanbidders, my verstrooide gemeente, my offerande bring. SEFÁNJA 3:10 AFR53
Operasie Solomon was ‘n Israeliese militêre operasie wat op 24 en 25 Mei 1991, 14 325 Joodse Etihopiërs na Israel gevlieg het. Die vliegtuie se sitplekke is uitgehaal om meer passasiers te akkommodeer en een van die laaste vlugte het 1,122 passasiers ingepas.
Dit moet die verlostes van die Here sê, wat Hy uit die nood verlos het en uit die lande versamel het, van die ooste en die weste, van die noorde en van die see af. PSALMS 107:2-3 AFR53
2 Augustus 2024
SEFÁNJA 3:11 AFR53
Op dié dag hoef jy jou nie te skaam weens al jou dade waarmee jy teen My oortree het nie; want dan sal Ek uit jou midde wegruim die wat in jou oormoedig jubel, en jy sal jou nooit hoogmoedig gedra op my heilige berg nie.
Israel gaan in die Millenium die wêreld se supermoondheid wees, maar hulle gaan nie trots of hoogmoedig wees nie. Onder die leierskap van die Here Jesus en Sy verlostes, sal Israel weet dat hul aansien net genade is.
Die effek van verdrukking op die Joodse oorblyfsel van wie alle roem weggeneem is, is volledige vertroue op God.
En Ek sal tussen jou in laat oorbly 'n ellendige en geringe volk wat by die Naam van die Here skuiling soek. SEFÁNJA 3:12 AFR53
Die oorblyfsel van Israel staan saam met die Lam op die berg Sion wanneer die heerlikheid op die punt staan om vertoon te word.
Die oorblyfsel van Israel sal geen onreg doen en geen leuentaal spreek nie, en in hulle mond sal geen bedrieglike tong gevind word nie; maar hulle sal wei en neerlê, en niemand sal hulle verskrik nie. SEFÁNJA 3:13 AFR53
Die 144 000 verseëldes van Israel (deel van die oorblyfsel) sal God in waarheid aanbid en geen leuens spreek nie. Niemand sal hulle bang maak nie — nie vreemde vyand óf onregverdige vors of profeet of priester nie.
En ek het gesien, en kyk, die Lam staan op die berg Sion, en saam met Hom honderd-vier-en-veertigduisend met sy Naam en die Naam van sy Vader op hulle voorhoofde geskrywe. En ek het 'n geluid uit die hemel gehoor soos die geluid van baie waters en soos die geluid van 'n harde donderslag, en ek het die geluid gehoor van siterspelers wat speel op hulle siters. En hulle het 'n nuwe lied gesing voor die troon en voor die vier lewende wesens en die ouderlinge; en niemand kon die lied leer nie, behalwe die honderd-vier-en-veertigduisend wat van die aarde vrygekoop is. Dit is hulle wat hulself met vroue nie besoedel het nie, want hulle is maagdelik rein; dit is hulle wat die Lam volg waar Hy ook heengaan; dit is hulle wat gekoop is uit die mense as eerstelinge vir God en die Lam. En in hulle mond is daar geen bedrog gevind nie; want hulle is sonder gebrek voor die troon van God. OPENBARING 14:1-5 AFR53
Met die oog op die komende seën, breek Sefanja in ‘n gejubel uit. Hy doen 'n beroep op die herstelde oorblyfsel van Juda om hul vreugde deur uiterlike tekens te wys. Die profeet herhaal die bevel om te jubel en om die vreugde te bevestig, drie maal.
Jubel, o dogter van Sion, juig, o Israel! Verheug jou en jubel van ganser harte, o dogter van Jerusalem! SEFÁNJA 3:14 AFR53
3 Augustus 2024
SEFÁNJA 3:15 AFR53
Die Here het jou oordele opgehef, jou vyand weggeveeg; die koning van Israel, die Here is by jou, jy sal geen kwaad meer vrees nie.
Die Hebreeuse werkwoorde hier is in die verlede, maar hulle verwys eintlik na gebeure wat nog in die toekoms is.
Die oorlog sal vergete wees, die vyand verslaan. Die Here self sal as Koning optree en hulle van rampe beskerm. Hulle moedeloosheid sal verdwyn - hulle het nie nodig vir hande wat slap hang nie.
In dié dag sal aan Jerusalem gesê word: Vrees nie, o Sion, laat jou hande nie slap hang nie! SEFÁNJA 3:16 AFR53
Let op hoe pragtig Sefanja die teenwoordigheid van die Here beskryf.
Die Here jou God is by jou, 'n held wat verlossing skenk. Hy verheug Hom oor jou met blydskap; Hy swyg in sy liefde; Hy juig oor jou met gejubel. SEFÁNJA 3:17 AFR53
Sefanja eindig met ‘n besondere woord van troos: God maak dié bymekaar wat treur, wat ver is van die feestelikheid, dié wat uit jou uit kom en ter wille van jou die smaad gedra het. ‘n Mens kan daarin iets raaksien van die feit dat God baie bewus is van dié wat ter wille van ander regoor die wêreld en regdeur die eeue smaad gedra het.
Die wat bedroef is, ver weg van die fees, versamel Ek; hulle hoort by jou, die smaad druk swaar op hulle. SEFÁNJA 3:18 AFR53
Johannes bevestig in Openbaring dat daar geen trane meer sal wees nie, geen droefheid meer nie.
En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan. OPENBARING 21:4 AFR53
God gaan met verdrukkers handel soos hulle verdien. Die vernietiging van Israel se vyande gaan gebeur voor Israel se herstel, en dan sal Israel die lof en roem van die hele aarde wees.
Kyk, in dié tyd sal Ek met al jou verdrukkers handel; en die wat kreupel is, sal Ek red; en die wat verjaag is, versamel; en Ek sal hulle maak tot 'n lof en tot 'n roem wie se skande oor die hele aarde was. SEFÁNJA 3:19 AFR53
Die laaste vers is ‘n herhaling en dus ‘n bevestiging van die vorige vers se belofte. God sal Sy volk versamel en hulle tot ‘n roem en tot ‘n lof maak onder al die volke van die aarde.
In dié tyd sal Ek julle aanbring, ja, in die tyd wanneer Ek julle versamel; want Ek maak julle tot 'n roem en tot 'n lof onder al die volke van die aarde, wanneer Ek voor julle oë julle lot verander, sê die Here. SEFÁNJA 3:20 AFR53
Comments