Scroll asb. ondertoe om vandag se inskrywing te sien!
29 Junie 2024
MIGA 1:1 AFR53
Die woord van die Here wat tot Miga, die Morastiet, gekom het, in die dae van Jotam, Agas, Hiskía, konings van Juda; wat hy gesien het aangaande Samaría en Jerusalem.
Miga was 'n profeet van Juda, 'n jonger tydgenoot van Jesaja, en van ‘n dorp met die naam Moreset, 40 km suid-wes van Jerusalem. Miga se naam beteken ‘wie is soos YHWH’ of ‘wie is soos God’.
Miga het geprofeteer tydens die regerings van Jotam, Agas en Hiskia van die Suidelike Koninkryk Juda en Pekahia, Pekah en Hosea van die Noordelike Koninkryk Israel, en dus oor ‘n tydperk van ongeveer veertig jaar. Miga is bekommerd oor die mislukkings van die Noordelike Koninkryk, en veral die implikasies daarvan op die Suidelike Koninkryk.
As ons Hosea, Joël, Amos en Obadja bestudeer, sien ons dat daar nie aan hul boodskappe gehoor gegee is nie. Hulle waarskuwings is verwerp en die oordeel het gekom.
Dit is interessant dat hoe nader die tyd gekom het vir God se oordele om plaas te vind, hoe hardnekkiger het die vals profete ontken dat die oordele sou gebeur. Vals profesieë was 'n winsgewende beroep, en hulle het 'n bemarkingsvoordeel gehad - die vals profete het die mense se wense aan hulle kant gehad.
Hosea en Amos is geignoreer en Jeremia was gevange geneem. In Miga se geval is daar ag geslaan op sy boodskap, bekering het gevolg en rampspoed is vir 'n eeu later uitgestel. Hier was 'n profeet (soos Jona) wat die geskiedenis verander het! Een man kan 'n verskil maak.
Miga was 'n tydgenoot van Jesaja, Hosea en Amos. Hy was waarskynlik 'n vriend van Jesaja, en daar is vele treffende ooreenkomste tussen die twee.
Die drie konings wat oor die Suidelike Koninkryk van Juda regeer het in Miga se profetiese loopbaan, was in persoonlikheid en vermoë totaal verskillend van mekaar. Hul verhale kan gevind word in 2 Konings 15-20 en 2 Kronieke 27-30, en dit begin met Jotam.
Daar is nie veel opgeteken oor koning Jotam nie, behalwe dat hy 'n magtige vegter was wat God en Juda gedien het, maar tog die geestelike toestand van sy volk verwaarloos het.
Jotam se seun, Agas, was 'n onsedelike monster wat niks anders as minagting vir God getoon het nie. Hy het die tempel se silwer en goud aan die Assiriese koning geskenk, sy volk beveel om afgode te aanbid, sy eie mense blind beroof en sy eie kinders in heidense kinderoffers verbrand.
Agas se oorblywende seun Hiskia is die volgende koning, en na Agas se goddelose regering was daar baie om te doen. Hiskia het met vrymoedigheid huis skoongemaak. Heidense altare, afgode en tempels is vernietig. Die koperslang wat Moses in die woestyn gemaak het is ook vernietig, want die volk het dit 'n afgod gemaak. Die tempel in Jerusalem, wie se deure deur Hiskia se eie pa vasgespyker is, is skoongemaak en weer ingebruik geneem. Die Levitiese priesterskap is heringestel, en die Pasga is weer as 'n nasionale vakansiedag ingestel. Onder Hiskia se hervormings het herlewing na Juda gekom.
Miga het oordeel uitgespreek oor die hoofstede van die Noordelike Koninkryk (Samaria) en die Suidelike Koninkryk (Jerusalem). Hy het geweld, korrupsie, roof, hebsug, growwe materialisme, geestelike bankrotskap en onwettige seks veroordeel. Tog, deur die somberheid van naderende oordeel, het Miga duidelik die komende heerlikheid van die verlossing van Israel gesien, wat hierdie boek veral relevant maak vir ons tyd!
Miga se groot vraag weerspieël die betekenis van sy naam: Wie is soos U?
30 Junie 2024
MIGA 1:2 AFR53
o Volke, luister almal saam! o Aarde en sy volheid, let op! Sodat die Here Here getuie teen julle kan wees, die Here uit sy heilige paleis.
Miga rig ‘n oproep aan almal. O volke, luister almal saam! O aarde en sy volheid, let op! Dié boodskap word aan alle volke gerig. Dít waarvan God Sy volk in die res van die boek gaan aankla, is dinge wat immers regoor die wêreld voorkom. Miga waarsku daarom die hele wêreld van die Groot Getuie wat op pad is om teen hulle te getuig.
Met helder beelde sien Miga die Here wat uit die hemel na die aarde gaan neerdaal na die hoogtes van die aarde.
Want kyk, die Here gaan uit sy woonplek uit, en Hy daal neer en betree die hoogtes van die aarde. MIGA 1:3 AFR53
Die hoogtes van die aarde is plekke van afgodsaanbidding soos die Skrifgedeeltes hieronder bevestig.
Net die hoogtes is nie afgeskaf nie; die volk het nog geoffer en op die hoogtes rook laat opgaan. II KONINGS 12:3 AFR53
In al julle woonplekke sal die stede verwoes en die hoogtes 'n wildernis word, sodat julle altare woes en eensaam sal wees, en julle drekgode verbreek sal word en verdwyn, en julle sonpilare omgekap en julle werke vernietig sal word. ESÉGIËL 6:6 AFR53
As die berge en dale nie voor God kon staan nie, watter hoop het die sondige, opstandige mens?
En die berge smelt onder Hom, en die laagtes skeur oop, soos was voor die vuur, soos water wat langs 'n helling afstroom! MIGA 1:4 AFR53
Daar word in hierdie vers na beide die Noordelike en die Suidelike Koninkryke verwys. Samaria is die hoofstad van die Noordelike Koninkryk wat hier Jakob genoem word, en Jerusalem is die hoofstad van die Suidelike Koninkryk Juda. Albei het korrup geword.
Dit alles vanweë die oortreding van Jakob en vanweë die sondes van die huis van Israel. Wie is die oorsaak van die oortreding van Jakob? Is dit nie Samaría nie? En wie is die oorsaak van die hoogtes van Juda? Is dit nie Jerusalem nie? MIGA 1:5 AFR53
Miga fokus hier op die komende vernietiging van Samaria, die hoofstad van Israel, en die koninkryk van die tien noordelike stamme. Dit is in 722 v.C. vervul toe Samaria deur die Assiriërs ingeval en heeltemal vernietig is.
Daarom sal Ek Samaría 'n puinhoop maak op die veld, 'n plek om wingerdstokke te plant; en Ek sal haar klippe in die dal laat afrol en haar fondamente blootlê. MIGA 1:6 AFR53
Die gesnede beelde (meestal goue beelde) is gebou of gemaak van die geld wat die tempelprostitute vir hul ‘dienste’ ontvang het. Die oorwinnaars sal die beelde stukkend slaan en die goud gebruik om hul eie beelde te bou. Net die hart van die verdorwe mens kon sulke gode aanbid.
En al haar gesnede beelde sal stukkend geslaan en al wat sy as hoereloon ontvang het, met vuur verbrand word, en al haar afgode sal Ek tot 'n verwoesting maak; want uit hoereloon het sy dit versamel, en tot hoereloon sal dit terugkeer. MIGA 1:7 AFR53
1 Julie 2024
MIGA 1:8 AFR53
Daaroor wil ek rouklaag en huil, kaalvoet en naak loop. Ek wil klae soos die jakkalse en treur soos die volstruise.
Miga rou want die vernietiging gaan ook die Suidelike Koninkryk tref en sy reaksie word hier gegee.
Hy rouklaag en huil, hy trek sy klere uit in roubeklaag, hy klae soos ‘n jakkals en treur soos ‘n volstruis.
Waarlik, haar wonde is ongeneeslik; want dit het gekom tot by Juda, dit reik tot aan die poort van my volk, tot by Jerusalem. MIGA 1:9 AFR53
Miga se intense ontsteltenis word weerspieël in die stede se name. Hierdie woordspelings word as voorbodes gebruik vir dit wat gaan kom.
Moet dit nie in Gat vertel nie, ween daar ganselik nie! In Bet-Ofra het ek my in die stof gewentel! MIGA 1:10 AFR53
Gat: Hierdie dorp is ‘n voorbode van trane - Miga verwys na Dawid wat ween oor Saul en Jonathan se dood en Israel se nederlaag by die berg Gilboa.
Bet-Ofra: Beteken huis van stof, en dit is presies wat Miga die inwoners aanraai om te doen - om in die rou proses hulself met stof te bedek.
Safir: Klink soos die Hebreeuse woord vir dit wat mooi is, maar nie vir lank nie - die burgers sal naak en in skaamte weggestuur word ...
Saänan: Klink soos die Hebreeuse woord vir mars of gaan uit. Weereens, in teenstelling hiermee, sal hulle soos diere in hul stad opgesluit wees totdat dit val.
Bet-Haësel: Beteken nabygeleë stad. Wanneer die leër van oordeel kom, sal dit vir geen ander stad naby of nuttig wees nie.
Trek weg in smadelike naaktheid, o inwoners van Safir! Die inwoners van Saänan trek nie uit nie. Die weeklagte van Bet-Haësel sal julle daar die verblyf ontneem. MIGA 1:11 AFR53
Marot: Die naam van hierdie dorp beteken bitterheid. Wanneer die leër van oordeel kom, sal die burgers van Marot baie bitterheid ken.
Want die inwoners van Marot wag in pyn op iets goeds, omdat onheil neerdaal van die Here na die poort van Jerusalem. MIGA 1:12 AFR53
Lagis: Was 'n bekende militêre stad suidwes van Jerusalem, bekend vir strydwaperde. Inplaas daarvan om die perde te gebruik om te veg, sou hulle gebruik word om te vlug van die vyand.
Span die perde voor die wa, o inwoners van Lagis! Dit was die begin van sonde vir die dogter van Sion, dat die oortredinge van Israel in jou gevind is. MIGA 1:13 AFR53
2 Julie 2024
MIGA 1:14 AFR53
Daarom moet jy 'n afskeidsgeskenk gee aan Moréset-Gat; die huise van Agsib sal 'n teleurstelling wees vir die konings van Israel.
Miga is nog besig met die woordspelings van die verskillende dorpe wat as voorbodes gebruik word vir dit wat gaan kom.
Moréset-Gat: Hierdie was Miga se tuisdorp en dit klink soos die Hebreeuse woord vir verloofde.
Miga gee vir die stad ‘n afskeidsgeskenk soos geskenke by ‘n troue gegee word. Die simbool hier is die heerskappy van die bruid se eie familie (Juda) wat oorgegee word aan die heerskappy van die bruidegom (die invallende leër).
Agsib: Klink soos die Hebreeuse woorde bedrieglik en teleurstellend. Hierdie stad sou so bedrieglik vinnig val dat dit 'n teleurstelling vir die konings van Israel sou wees.
Maresa: Die naam van hierdie dorp is verwant aan die Hebreeuse woord vir besitter of erfgenaam. Die invallende leër sou hierdie stad binnekort in besit neem.
Adullam: Die dorp was die toevlugsoord vir Dawid toe hy vir koning Saul gevlug het. Dit sou weer 'n toevlugsoord wees vir die hooggeplaastes en magtiges onder Israel, wanneer hulle gedwing sou word om in Adullam weg te kruip.
Nogmaals sal Ek jou 'n veroweraar bring, o inwoner van Marésa; die adel van Israel sal tot by Adúllam kom. MIGA 1:15 AFR53
Die hoofstuk word afgesluit met 'n beroep op die stad Jerusalem as die ouer van haar kinders - die afgeleë dorpe.
Maak 'n kaalte op jou hoof en skeer jou weens jou troetelkinders; maak die kaalplek groot soos dié van 'n aasvoël, omdat hulle van jou af weggevoer is in ballingskap. MIGA 1:16 AFR53
Die Hebreeuse naam vir arend sluit al die verskillende soorte aasvoëls in. Hulle is meestal groot voëls en het tipies 'n min of meer kaal kop.
Miga sê vir die mans om hul hoofde te skeer soos die van aasvoëls as uiterlike roubewys omdat die volk in ballingskap weggevoer gaan word.
So spreek hulle hul diep droefheid uit oor hierdie ellende, in ooreenstemming met die gebruik van bitter rou.
Toe staan Job op en skeur sy mantel, en hy het sy hoof geskeer en in aanbidding op die grond geval. JOB 1:20 AFR53
En toe ek dit hoor, het ek my kleed en my mantel geskeur en van die hare van my hoof en my baard uitgepluk en verslae neergesit. ESRA 9:3 AFR53
3 Julie 2024
MIGA 2:1 AFR53
Wee die wat onreg uitdink en kwaad smee op hulle bedde; by die môrelig voer hulle dit uit, want dit is in die mag van hulle hand.
Alle sonde is sleg voor God, maar sonde wat gepleeg word met voorbedagte rade is erger. Miga praat hier met diegene wat ongeregtigheid bedink in die nag in hul kamers en hul planne dan in die môrelig uitvoer. Planne wat hulle kan uitvoer omdat dit in hul mag is om te doen.
God lys die volk se sondes. Die eerste wat aan die groot klok gehang word is hul magsmisbruik spesifiek ten opsigte van besittings - veral grond en huise.
Ja, hulle begeer velde en roof dit; ook huise en neem dit. So pleeg hulle dan geweld teenoor die man en sy huis, teenoor die mens en sy erfdeel. MIGA 2:2 AFR53
Die oortredinge is ‘n kombinasie van die 8ste, 9de en 10de gebod – moenie steel nie, moenie leuens vertel nie, en moenie begeer nie.
Daarom beplan God die ramp van ballingskap teen hulle sodat mense oor hulle spotliedjies sal skryf.
Daarom, so sê die Here: Kyk, Ek bedink onheil teen hierdie geslag, waar julle jul nekke nie sal kan uittrek nie, en waarby julle nie regop sal kan loop nie; want dit sal 'n tyd van onheil wees! MIGA 2:3 AFR53
Hul vergryp aan ander se besittings het hulle suur bekom. Hul magsmisbruik het hulle hul eie besittings gekos - dit is van ons afgevat.
In dié dag sal hulle 'n spotlied oor julle aanhef en 'n klaaglied sing: Dit is gedaan — sal hulle sê — ons is heeltemal verwoes; die eiendom van my volk laat Hy van besitter verander. Hoe neem Hy dit van my af! Aan die afvalliges deel Hy ons velde uit. MIGA 2:4 AFR53
Hulle ondergang sou so vernietigend wees dat wanneer die tyd aanbreek dat die grond herverdeel moet word, daar niemand sou wees om hulle te verteenwoordig nie en hulle plek in die nasie sou vir ewig verlore wees.
Daarom sal daar vir jou niemand wees wat die meetsnoer werp in 'n erfdeel in die vergadering van die Here nie. MIGA 2:5 AFR53
Toe God se profete met die volk gepraat het, het hulle dit nie ontvang nie. Hulle het God se Woord verontagsaam as blote gebrabbel. As gevolg hiervan het God later opgehou om profete te stuur.
Miga het sy bediening in die regering van Jotam begin, maar niemand het geluister nie. Toe het hy tydens die regering van Agas geprofeteer, maar niemand het geluister nie. Uiteindelik het hy geprofeteer tydens die heerskappy van Hiskia en die leiers en die volk het hulle bekeer.
Miga het nie moed opgegee nie, al was die resultate stadig. Miga het vir ‘n tydperk van tussen 16 en 25 jaar gepreek voordat daar enige reaksie was.
Moet nie profeteer nie! sê die valse profete. As 'n mens hieroor nie mag profeteer nie, sal die beskimping nie ophou nie! MIGA 2:6 AFR53