9 Junie 2024
JOËL 1:1 AFR53
Die woord van die Here wat tot Joël, die seun van Pétuel, gekom het.
Die boek Joël is 'n belangrike boek omdat dit Israel se plek in God se program aanteken - van Babilon tot en met die Millennium. Joël het ook baie te sê oor die nie-Joodse nasies en hul botsingskoers na Armageddon.
Joël is die profeet wat ons voorstel aan die term ‘die dag van die Here’. Die ‘dag van die Here’ is 'n tegniese uitdrukking in die Skrif wat vol betekenis is. Dit sluit die Duisendjarige Koninkryk in, wat by die wederkoms van Christus sal kom, maar Joël gaan dit vir ons baie duidelik maak dat dit begin met die Groot Verdrukkingstydperk, die tyd van groot moeilikheid.
Die einde van ‘die dag van die Here’, is die einde van die Millennium wanneer die Here Jesus alle ongeregtigheid neerlê en Sy ewige koninkryk hier op die aarde vestig.
Jakobus, by die groot raad van Jerusalem, het min of meer die verhouding tussen die kerktydperk en hierdie tydperk bekend as die ‘dag van die Here uiteengesit’. Hy het gesê:
Símeon het vertel hoe God in die begin uitgesien het om 'n volk uit die heidene vir sy Naam aan te neem. En hiermee stem die woorde van die profete ooreen, soos geskrywe is: Daarna sal Ek terugkom en die vervalle hut van Dawid weer oprig, en wat daarvan verwoes is, sal Ek weer oprig en dit herstel, HANDELINGE 15:14-16 AFR53
Jakobus sê: Daarna sal Jesus terugkom—na wat? Nadat Hy die kerk uit hierdie wêreld uitgeroep het, sal God Hom weer na Sy program met Israel wend, en dit is na hiérdie tyd dat die ‘dag van die Here’ verwys.
sodat die oorblyfsel van die mense die Here kan soek, en al die nasies oor wie my Naam uitgeroep is, spreek die Here wat al hierdie dinge doen. Aan God is al sy werke van ewigheid af bekend. HANDELINGE 15:17-18 AFR53
Die naam Joël beteken 'Jehovah is God' en vorm dus 'n kort belydenis van geloof, ietwat soos die Nuwe-Testamentiese belydenis, 'Jesus is Here'. Ons weet nie veel van die profeet anders as dat hy die seun van Petuel was, en opgetree het as ‘n profeet vir die Suidelike Koninkryk.
10 Junie 2024
JOËL 1:2 AFR53
Hoor dit, o oudstes, en luister, alle inwoners van die land! Het so iets ooit in julle dae of in die dae van julle vaders plaasgevind?
Daar is waarde in tradisie. Vanweë hul ouderdom het die oudstes baie geweet en gehoor. Hulle het van hul vaders en van hul oupas gehoor wat hulle self nie geken het nie. Onder die mense van die ooste is herinneringe van vergange tye van geslag tot geslag oorgedra, vir tydperke wat vir ons ongelooflik sou lyk.
Israel is beveel om die herinneringe van God se wonderwerke van geslag tot geslag oor te dra. Hoekom? Om hulle te herinner aan God se genade en goedheid en om hulle te herinner dat God sonde sou oordeel as hulle ongehoorsaam sou word.
En hierdie woorde wat ek jou vandag beveel, moet in jou hart wees; en jy moet dit jou kinders inskerp en daaroor spreek as jy in jou huis sit en as jy op pad is en as jy gaan lê en as jy opstaan. DEUTERONÓMIUM 6:6-7 AFR53
Die profeet doen nou 'n beroep op die ou manne, om te hoor, en tot die hele volk van die land, om hulle volle aandag te gee aan hierdie ding wat hy op die punt was om vir hulle te vertel.
Hulle moet terug kyk na al die euwels waarvan hulle ooit gehoor het, en sê of hierdie ding wat hy hulle gaan vertel, in hulle dae of in die dae van hulle vaders gebeur het.
Joël bevestig weereens dat wat hulle nou hoor, iets gaan wees wat oorvertel moet word aan hul kinders en die geslagte wat volg.
Vertel daarvan aan julle kinders, en julle kinders aan hulle kinders, en húlle kinders aan die volgende geslag: JOËL 1:3 AFR53
Die profeet beskryf vier opeenvolgende swerms sprinkane wat eet wat die vorige swerm agtergelaat het. Vier word dikwels deur die profete gebruik om algehele vernietiging voor te stel.
Die Israeliete het sprinkaan swerms as dodelik gesien as gevolg van hul vermoë om 'n hele jaar se oes uit te wis.
Joël verwys heel waarskynlik na 'n letterlike sprinkaan inval wat plaasgevind het kort voor sy skryfwerk, omstreeks 845 v.C. Die letterlike swerms sprinkane wat in opeenvolgende golwe Israel se oeste vernietig, het verwys na 'n binnekort komende inval van vyande sowel as 'n toekomstige oordeelsdag.
Joël het heel waarskynlik ook die verwoesting van sprinkane gebruik as 'n illustrasie van dié Oordeelsdag. Die ramp wat oor Israel se landbou gebring is, was 'n klein voorsmakie van 'n komende oordeel oor Israel en 'n latere oordeel oor die hele aarde.
'n Deel van hierdie profesie is vervul toe Israel deur sy vyande verslaan en in ballingskap weggevoer is. Die oorblywende oordele sal in die toekomstige ‘dag van die Here’ plaasvind.
Wat die afknyper laat oorbly het, het die treksprinkaan verslind; en wat die treksprinkaan laat oorbly het, het die voetganger verslind; en wat die voetganger laat oorbly het, het die kaalvreter verslind. JOËL 1:4 AFR53
11 Junie 2024
JOËL 1:5 AFR53
Word wakker, julle dronkaards, en ween! En huil, al julle wyndrinkers! Oor die mos, omdat dit van julle mond weggeruk is.
Joel sê vir die dronkaards om wakker te word en die verwoesting te sien wat die sprinkane veroorsaak het. Hulle het gekom soos 'n magtige nasie, 'n wrede leër teen Juda.
Want 'n sterk en ontelbare nasie het opgetrek oor my land; sy tande is leeutande, en dit kan byt soos 'n leeuin. JOËL 1:6 AFR53
Klaarblyklik het die sprinkaan plaag in die herfs begin. Die laaste oes wat ingesamel word is die druiwe oes. Die plaag het begin toe die druiwe geoes moes word en al die druiwe is verteer sodat daar geen nuwe wyn was nie.
Die druiweboere was die eerstes wat sou ly as gevolg van hierdie plaag, want die ander gewasse was reeds geoes. In die lente egter sou die nuwe plaag begin, want al die eiers wat gelê was sou uitbroei om van voor af alles te begin vernietig.
Elke wyfie sprinkaan kan 250-300 peule lê, met 70-80 eiers per peul. Wetenskaplikes het 'n enkele hormoon gevind wat, wanneer dit geaktiveer word, dit sprinkane laat swerm. Hulle word aggressief en die hormoon veroorsaak veranderinge in kleur, fisiologie, metabolisme en gedrag.
Wanneer sprinkane swerm, vreet hulle nie net die plante nie, maar ook die wortels onder die grond (jy kan hulle glo in die nag hoor eet). Hulle reis in kompakte, militêr-agtige sarsies, maak 'n windagtige geluid, en hulle kan selfs die son verdonker. Die digtheid van 'n swerm kan 120 miljoen sprinkane per vierkante myl wees.
Verwoesting in die gemeenskap beteken nie net die verlies aan produkte en inkomste nie, maar ook die verspreiding van siektes.
Dit het my wingerdstok verwoes en my vyeboom versplinter; dit het ál sy bas afgeskil en weggegooi; die lote daarvan het wit geword. JOËL 1:7 AFR53
Die term jonkvrou verwys na 'n jong weduwee wat haar man in die eerste jaar van hul huwelik verloor het. Die hele volk moes treur as 'n bruid haar man in die eerste jaar van hul huwelik verloor het.
Joël sê vir Juda, die Suidelike Koninkryk, dat hulle na hul toestand moet kyk en treur, met al die emosie en passie van 'n jong weduwee.
Weeklaag soos 'n jonkvrou wat oor die bruidegom van haar jeug met 'n roukleed omgord is. JOËL 1:8 AFR53
Vir die spysoffer was fyn meel nodig wat van koring gemaal is. Die sprinkane het egter die koringlande verteer sodat daar geen meel was vir die spysoffer nie. Daar was ook geen wyn om 'n drankoffer aan God te bring nie en daarom het die priesters getreur.
Spysoffer en drankoffer is ontruk aan die huis van die Here; die priesters, die dienaars van die Here, treur. JOËL 1:9 AFR53
12 Junie 2024
JOËL 1:10 AFR53
Die veld is verwoes, die akkerland treur; want die koring is verwoes, die mos het weggedroog, die olie het verdwyn.
Joël praat ook met die boere wat treur oor hul oeste wat vernietig is. Die graan, drank, weiding, veld, koring, wyn, olywe, gars, vrugte, vye, granate, dadels en appels het alles ten gronde gegaan. Dit is ‘n totale skade vir die ekonomie van die plaaslike saai- en vrugteboere, maar ook ‘n skade vir die tempel ekonomie - die priesters treur omdat daar niks in die tempel is om te eet nie.
Die landbouers staan beskaamd, die wynboere weeklaag oor die koring en oor die gars, omdat die oes op die land verlore is. Die wingerdstok het verdor, en die vyeboom het verwelk; die granaat, ook die palm en die appelboom, al die bome van die land het verdor; want beskaamd is die vreugde, weg van die mensekinders af. Omgord julle en klaag, o priesters! Huil, dienaars van die altaar! Kom, vernag in rouklere, dienaars van my God! Want die spysoffer en die drankoffer is geweer van die huis van julle God. JOËL 1:11-13 AFR53
Die priesters moet ‘n vasdag hou waar al die leiers en inwoners van die land bymekaar kan kom om na God te roep.
Heilig 'n vasdag, roep 'n vergadering saam! Versamel die oudstes, alle inwoners van die land in die huis van die Here julle God, en roep tot die Here. JOËL 1:14 AFR53
Die Dag van die Here is op hande. Gedurende die Dag sal daar 'n inval wees wat selfs meer uniek sal wees as die sprinkaan inval wat pas plaasgevind het. Die Dag van die Here is een van die mees misverstaande terme en tog een van die belangrikstes in die Skrif. Joel was die eerste wat dit gebruik het, en hy maak baie duidelik wat die Dag van die Here is.
Na hom kon die ander profete net van ‘daardie dag’ praat, en almal sou verstaan waarna hulle verwys.
Die dag van die Here word vervul wanneer Jesus die aarde oordeel en in heerlikheid terugkeer. In 'n mindere sin is dit 'n tyd van oordeel soos Juda beleef het met die sprinkane en droogte.
Ag, die dag! Want naby is die dag van die Here, en hy kom soos 'n verwoesting van die Almagtige. JOËL 1:15 AFR53
Joel beskryf 'n verwoestende droogte. Dit het alles in Juda plaasgevind, en veldbrande het die droë land verwoes.
Is die spys nie weggeruk voor ons oë nie, blydskap en gejuig weg uit die huis van onse God? Die graankorrels het weggekrimp onder hulle kluite, die voorraadkamers is verwoes, die graanbakke afgebreek, want die koring het verdor. Hoe sug die vee! Die troppe beeste is onrustig, want daar is geen weiveld vir hulle nie; ook die troppe kleinvee moet boet. JOËL 1:16-18 AFR53
In hierdie tyd van droogte kon Juda net tot God uitroep. Hulle was magteloos om die droogteprobleem op te los. God het hulle na 'n plek gestuur waar net die hemel hulle kon help, sodat hulle nie 'n ander plek sou soek nie.
Tot U, o Here, roep ek, want 'n vuur het die weivelde van die woestyn verteer, en 'n vlam het al die bome van die veld aan die brand gesteek. Selfs die diere van die veld smag na U; want die waterstrome het opgedroog, en 'n vuur het die weivelde van die woestyn verteer. JOËL 1:19-20 AFR53
13 Junie 2024
JOËL 2:1 AFR53
Blaas die basuin op Sion, en blaas alarm op my heilige berg! Laat al die inwoners van die land bewe, want die dag van die Here kom, want hy is naby —
In Joël 1 het die profeet gepraat van die oordeel wat Juda reeds getref het - 'n plaag van sprinkane en droogte. In Joël 2 begin hy om die oordeel te beskryf wat nog sal kom - 'n magtige leër wat teen Juda gaan kom.
Joël roep hulle op tot aksie. Blaas die ramshoring op Sion en op God se heilige berg. Dit was die priesters se plig om die trompette te blaas. Hierdie was nie 'n normale inval nie - God self is naby, met die volle woede van Sy oordeel.
‘n Dag van duisternis word deur baie van die profete gebruik om die ‘dag van die Here’ te beskryf.
'n dag van duisternis en donkerheid, 'n dag van wolke en wolkenag; soos die môreskemering, uitgesprei oor die berge, kom 'n talryke en magtige volk, wat van oudsher sy gelyke nie gehad het nie en dit hierna ook nie sal hê tot in die jare van die verste geslagte nie. JOËL 2:2 AFR53
Drie terme in Joël 2:2 naamlik duisternis, wolke en dik donkerte is dieselfde terme wat God se teenwoordigheid op die berg Sinai beskryf het.
Toe het julle nader gekom en onder aan die berg gaan staan; en die berg het met vuur gebrand tot in die middel van die hemel, met duisternis, wolke en wolkedonkerheid. DEUTERONÓMIUM 4:11 AFR53
’n Verskroeide aarde voorbeeld. Voor die inval is daar geen probleme, maar daarna is dit nag.
Soos met die sprinkane, so ook met die invallende weermag - die land wat eers ‘n paradys was, word 'n woestyn.
Voor hom uit verteer 'n vuur, en agter hom brand 'n vlam; voor hom lyk die land soos die tuin van Eden, en agter hom is dit 'n woeste wildernis; ook kan niks daaraan ontkom nie. JOËL 2:3 AFR53
Die sprinkane lyk en hardloop vir Joël soos perde.
Sy voorkoms is soos dié van perde, en net soos ryperde so hardloop hulle. JOËL 2:4 AFR53
Joël gee hier vir die sprinkane dieselfde beskrywing as wat Johannes in Openbaring gee.
En die voorkoms van die sprinkane was soos dié van perde wat vir die oorlog toegerus is, en op hulle koppe was iets soos krone wat net soos goud gelyk het, en hulle gesigte was soos die gesigte van mense. OPENBARING 9:7 AFR53
Die intense geraas wat spinkane maak wanneer hulle vlieg is soos die gedruis van water, of soos wanneer ’n sterk wind deur die bome waai, en die geluid wat hulle maak wanneer hulle eet, is soos die geruis van vlamme wat deur die wind gedryf word.
Soos die gedruis van waens huppel hulle oor die bergtoppe, soos die geknetter van 'n vuurvlam wat die kaf verteer, soos 'n magtige volk wat vir die geveg opgestel is. JOËL 2:5 AFR53
Weereens gee Openbaring ‘n soortgelyke omskrywing.
En hulle het borsharnasse gehad soos van yster, en die gedruis van hulle vlerke was soos die gedruis van baie strydwaens met perde wat opruk na die oorlog. OPENBARING 9:9 AFR53
14 Junie 2024
JOËL 2:6 AFR53
Vir hom bewe die volke van angs, alle aangesigte verbleek.
Die magtige weermag wat teen Juda gaan kom is soos ‘n sprinkaan plaag wat ‘n bevolking tot wanhoop dryf. Die sprinkaanplaag se koms oorskadu die son en die boere weet onmiddelik dat die sprinkane oppad is, en dat daar niks is wat hulle kan doen om hul oeste te beskerm nie. Met die magtelose wete dat die sprinkane oppad is verloor die gemeenskap alle moed - soveel so dat mens net hul angstige bleek geskrikte uitdrukkings kan onthou.
Die opmars van die indringers word grafies beskryf deur die voorbeeld van die opmars van sprinkane. Die vyand verskyn op die berge wat die stad omring, hulle klim op die mure, hulle jaag deur die strate, hulle gaan in die huise in en hulle beset Jerusalem.
Soos helde hardloop hulle, soos krygsmanne klim hulle op die muur, en elkeen gaan sy eie koers; hulle verander nie van pad nie. En die een druk nie die ander nie; elkeen gaan sy eie pad; en tussen wapens deur val hulle; maar hulle bly in gelid. Hulle oorval die stad, hulle hardloop op die muur, hulle klim in die huise, hulle dring by die vensters in soos 'n dief. JOËL 2:7-9 AFR53
As die land so vrugbaar soos die tuin van Eden was, sou dit teen die tyd dat die weermag deur getrek het, ’n verlate wildernis wees. Die aarde het gebewe en die hemel het gebewe voor sy aanslag.
Voor hulle bewe die aarde, sidder die hemel; die son en die maan word swart, en die sterre trek hulle glans in. JOËL 2:10 AFR53
Ons sien in Openbaring hoe Johannes die ‘dag van die Here’ van Joël beskryf.
En ek het gesien toe Hy die sesde seël oopgemaak het, en kyk, daar was 'n groot
aardbewing; en die son het swart geword soos 'n harige sak, en die maan het geword soos bloed; en die sterre van die hemel het op die aarde geval, soos 'n vyeboom wat deur 'n groot wind geskud word, sy navye laat afval; en die hemel het weggewyk soos 'n boek wat toegerol word, en al die berge en eilande is uit hulle plekke versit; OPENBARING 6:12-14 AFR53
God self verskyn aan Sy volk en die mense snak na hul asems. In elke stadium van hul bestaan gee die sprinkane 'n baie indrukwekkende siening van die krag van God om 'n goddelose wêreld te straf.
En die Here verhef sy stem voor sy leërmag uit; want geweldig groot is sy leër, ja, magtig die uitvoerder van sy woord. Want die dag van die Here is groot en uitermate vreeslik, en wie kan dit verdra? JOËL 2:11 AFR53
In Openbaring lees ons dat almal op aarde wegkruip in spelonke en in die berge en in die rotse, want hulle wil hulself wegsteek vir die aangesig van God. Wie kan bestaan voor die toorn van Hom wat op die troon sit en die toorn van die Lam.
en die konings van die aarde en die grotes en die rykes en die owerstes oor duisend en die magtiges en al die slawe en al die vrymense het hulle weggesteek in die spelonke en in die rotse van die berge, en vir die berge en die rotse gesê: Val op ons en verberg ons vir die aangesig van Hom wat op die troon sit, en vir die toorn van die Lam; want die groot dag van sy toorn het gekom, en wie kan bestaan? OPENBARING 6:15-17 AFR53
15 Junie 2024
JOËL 2:12 AFR53
Maar selfs nou nog, spreek die Here, bekeer julle tot My met julle hele hart, en met vas en geween en rouklag.
'n Oproep tot nasionale bekering. Kan God se voornemens verander word? Ja dit kan! Selfs op hierdie stadium is dit vir God moontlik om Sy barmhartigheid te bewys.
As Ek die hemel toesluit, dat daar geen reën is nie, of as Ek die sprinkaan beveel om die land af te eet, of as Ek pes onder my volk stuur, en my volk, oor wie my Naam uitgeroep is, hulle verootmoedig en bid en my aangesig soek en hulle bekeer van hul verkeerde weë, dan sal Ék uit die hemel hoor en hulle sonde vergewe en hulle land genees. II KRONIEKE 7:13-14 AFR53
Die volk word tot ‘n vas van die hart opgeroep - skeur jul harte en nie jul klere.
En skeur julle hart en nie julle klere nie, en bekeer julle tot die Here julle God; want Hy is genadig en barmhartig, lankmoedig en groot van goedertierenheid, en Een wat berou het oor die onheil; JOËL 2:13 AFR53
Om die goedheid en barmhartigheid van God te ken, is nog 'n rede vir ware bekering. Ons kom na Hom in die vertroue dat Hy sal genees en vergewe, en dat Hy berou kan he oor die oordeel wat Hy aangekondig het.
Ons bekeer nie omdat ons dink dat God so gemeen is dat as ek nie na Hom terugkeer nie, Hy my sal vernietig. Ons bekeer omdat God genadig en barmhartig is, stadig is om kwaad te word en my sal spaar van wat ek verdien as ek na Hom terugkeer. Uiteindelik is dit God se goedheid wat ons tot bekering lei.
Of verag jy die rykdom van sy goedertierenheid en verdraagsaamheid en lankmoedigheid, omdat jy nie besef dat die goedertierenheid van God jou tot bekering wil lei nie? ROMEINE 2:4 AFR53
Met die sprinkaanplaag was al die koring en druiwe deur die spinkane verorber, sodat daar geen meel en druiwe was om brood en wyn vir God se offers te maak nie. God se guns sal dit moontlik maak om genoeg meel en druiwe bymekaar te maak om wel die spysoffer en drankoffer aan Hom te bring.
wie weet of dit Hom nie weer sal berou nie, sodat Hy 'n seën sal agterlaat — 'n spysoffer en 'n drankoffer aan die Here julle God. JOËL 2:14 AFR53
Die profeet Joël roep die volk tot ‘n nasionale bekering. Nasionaal beteken almal. Daarom sê Joël dat hulle die hele volk moet bymekaar roep, die oudstes, die kinders en selfs die babas, ook die bruid en bruidegom. Almal moet daar wees.
Blaas die basuin op Sion, heilig 'n vasdag, roep 'n vergadering saam! Versamel die volk, heilig die gemeente, vergader die oudstes, versamel die kinders en die suiglinge! Laat die bruidegom uit sy kamer uitgaan en die bruid uit haar slaapvertrek. JOËL 2:15-16 AFR53
Die priesters of die leiers moet die voortou neem en ‘n voorbeeld vir die volk wees. Hulle moet as tussengangers optree en tot God smeek op ‘n spesifieke plek op die tempelgronde - tussen die voorportaal en die altaar. Die is nie die reukofferaltaar in die tempel nie, maar die brandofferaltaar buite die tempel waar die priesters hul offers bring. Die priesters word beveel om daar te staan en te vas en te bid, want daar kan hulle deur die volk gesien en gehoor word.
Laat die priesters, die dienaars van die Here, tussen die voorportaal en die altaar ween en sê: o Here, spaar u volk, en gee u erfdeel nie oor aan smaadheid, dat die nasies met hulle spot nie; waarom sou hulle onder die volke sê: Waar is hulle God? JOËL 2:17 AFR53
16 Junie 2024
JOËL 2:18 AFR53
Toe het die Here geywer vir sy land en sy volk verskoon.
Die struktuur van die boek Joël is gebou op 'n vergelyking tussen wat in die verlede gebeur het en wat in die toekoms gaan gebeur. Omdat God wel op Sy volk gereageer het in hul krisis, weet ons dat, in die toekomstige ‘dag van die Here’, almal wat Sy Naam aanroep gered sal word. Die belofte moet gesien word binne die konteks van die verbond met Israel - eers aan Abraham, dan aan Dawid, nou deur Joël...'n belofte van 'n ewige verhouding.
Die apostel Johannes het eeue later geskryf:
As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig. I JOHANNES 1:9 AFR53
En dit is heel moontlik wat die mense, wat daar in en om die tempel saamgedrom het, gedoen het – hulle harte tot God gewend – want God se volgende boodskap is alles oor die genadige uitstorting van Sy liefde teenoor Sy getroue en berouvolle mense.
God se antwoord op Sy volk se bekering is veelvuldige seëninge. Die droë tydperk wat hulle beleef het, sou eindig met sagte reën. Die verlore jare van voedsel sou herstel word en die mense sou niks anders as oorvloed beleef nie. God het vir Juda graan en nuwe wyn en olie gestuur om te vervang wat die insekte verteer het.
En die Here het geantwoord en aan sy volk gesê: Kyk, Ek stuur vir julle koring en mos en olie, sodat julle daarvan versadig word, en Ek maak julle nie meer tot 'n voorwerp van smaad onder die nasies nie. JOËL 2:19 AFR53
Die sprinkaanswerm uit die noorde verwys na ‘n letterlike weermag. Vyandige leërs het altyd vanuit die noorde ingeval, ongeag hul oorsprong, want die noorde was hul kwesbare kant. Die meeste sprinkaanplae het uit die suide gekom, uit die woestyn.
Ja, Ek sal die sprinkaanswerm, uit die noorde afkomstig, van julle af wegjaag en dit wegdrywe na 'n dor en woeste land; sy voorhoede na die Oostelike See en sy agterhoede na die Westelike See toe. En sy stank sal opstyg, en 'n slegte reuk uit hom opgaan; want hy het alte groot dinge gedoen. JOËL 2:20 AFR53
In die volgende drie verse word onderskeidelik die land, die diere en die mense aangespreek. Almal word opgeroep tot blydskap, vanweë die groot verlossing van vernietiging, wat God vir hulle bewerk het. Waar die sprinkane groot dinge in vernietiging gedoen het, sal God groot dinge in verlossing doen.
Wees nie bevrees nie, o aarde, juig en wees bly, want die Here doen groot dinge! JOËL 2:21 AFR53
Wees nie bevrees nie, diere van die veld, want die weivelde van die woestyn spruit uit, want die bome dra hulle vrugte, die vyeboom en die wingerdstok lewer hulle drag! JOËL 2:22 AFR53
En julle, kinders van Sion, juig en wees bly in die Here julle God, want Hy gee julle die leraar tot geregtigheid en laat op julle neerdaal die reën, die vroeë reëns en die laat reëns, soos voorheen. JOËL 2:23 AFR53
Die leraar tot geregtigheid is die Joodse Messias self. Hulle is dus bly omdat die Leraar van Geregtigheid, die Messias, in hulle midde is. Natuurlik is die deel gemik op selfs ons toekoms.
17 Junie 2024
JOËL 2:24 AFR53
Dan sal die dorsvloere vol koring wees en die parskuipe van mos en olie oorloop.
God se oorvloedige seën word hier beskryf. Die dorsvloere sal vol koring wees, die houers waar die olie en wyn geberg word sal oorloop.
God herstel die volk - ekologies en godsdienstig. Die boere sal weer gelukkig wees omdat alles weer groen raak weens die reën wat op sy tyd sal kom. Die rykdom van hul oeste sal die verlies wat die sprinkaanswerms veroorsaak het, vergoed.
En Ek sal julle vergoed die jare wat die treksprinkaan, die voetganger, die kaalvreter en die afknyper verslind het — my groot leërmag wat Ek teen julle gestuur het. JOËL 2:25 AFR53
Die volk sal oorvloedig herstel na al die skade en God loof en prys vir sy goedheid en guns.
Dan sal julle oorvloedig eet en versadig wees en die Naam van die Here julle God prys wat wonderbaar met julle gehandel het, en my volk sal in ewigheid nie beskaamd staan nie. JOËL 2:26 AFR53
Hierdie Goddelike versekering, soortgelyk aan dié waarmee die boek gaan eindig, berei die weg voor vir die geestelike seëninge wat op die punt staan om aangekondig te word.
En julle sal weet dat Ek in die midde van Israel is, en dat Ek die Here julle God is, en niemand anders nie; en my volk sal in ewigheid nie beskaamd staan nie. JOËL 2:27 AFR53
Joël ontvang ‘n profesie wat nie net hondere jare vorentoe vervul sou word nie, maar soos profesieë werk, ook duisende jare vorentoe vêrder vervul sal word.
En daarna sal Ek my Gees uitgiet op alle vlees, en julle seuns en julle dogters sal profeteer, julle ou mense drome droom, julle jongelinge gesigte sien. En ook op die diensknegte en op die diensmaagde sal Ek in dié dae my Gees uitgiet. En Ek sal wondertekens gee aan die hemel en op die aarde: bloed en vuur en rookpilare. Die son sal verander word in duisternis en die maan in bloed, voordat die groot en deurlugtige dag van die Here kom. En elkeen wat die Naam van die Here aanroep, sal gered word; want op die berg Sion en in Jerusalem sal daar ontkoming wees soos die Here gesê het, en onder die vrygeraaktes die wat die Here sal roep. JOËL 2:28-32 AFR53
Petrus haal hierdie gedeelte van Joël tydens Pinkster aan, maar toon dat die profesie ook laaste dae implikasies het.
En in die laaste dae, spreek God, sal Ek van my Gees uitstort op alle vlees, en julle seuns en julle dogters sal profeteer, en julle jongelinge sal gesigte sien, en julle ou mense sal drome droom. En ook op my diensknegte en diensmaagde sal Ek in dié dae van my Gees uitstort, en hulle sal profeteer. En Ek sal wonders gee bo in die hemel en tekens onder op die aarde, bloed en vuur en rookdamp. Die son sal verander in duisternis en die maan in bloed voordat die groot en deurlugtige dag van die Here kom. En elkeen wat die Naam van die Here aanroep, sal gered word. HANDELINGE 2:17-21 AFR53
Handelinge 2 teken die geboorte van die Kerk op Pinksterdag aan, toe die opgestane Jesus die Heilige Gees na Sy volgelinge gestuur het om hulle met Sy krag te bewoon. Met 'n geluid uit die hemel van 'n magtige wind, is die Heilige Gees aan die Apostels gegee. Vanaf daardie wonderlike dag tot vandag byna 2 000 jaar later, sal diegene wat reageer deur geloof in God se Seun, Jesus Christus, en in bekering Hom as Verlosser aanvaar, verlos word.
18 Junie 2024
HANDELINGE 2:16 AFR53
Maar dit is wat deur die profeet Joël gespreek is:
Petrus haal Joël 2:28-32 in die Nuwe Testament aan. Hy kies 'n vers wat die belofte van die Heilige Gees die beste beskryf. In die Hebreeuse Bybel is hierdie gedeelte 'n hoofstuk op sy eie. Dit begin met die belofte van die Heilige Gees en eindig met ‘n eindtyd profesie.
“En in die laaste dae, spreek God, sal Ek van my Gees uitstort op alle vlees, en julle seuns en julle dogters sal profeteer, en julle jongelinge sal gesigte sien, en julle ou mense sal drome droom. En ook op my diensknegte en diensmaagde sal Ek in dié dae van my Gees uitstort, en hulle sal profeteer.” HANDELINGE 2:17-18 AFR53
“En daarna sal Ek my Gees uitgiet op alle vlees, en julle seuns en julle dogters sal profeteer, julle ou mense drome droom, julle jongelinge gesigte sien. En ook op die diensknegte en op die diensmaagde sal Ek in dié dae my Gees uitgiet.” JOËL 2:28-29 AFR53
Petrus praat van hierdie gebeurtenis wat hulle so pas aanskou het as dit wat deur Joël geprofeteer is. Hy impliseer nie dat die totale profesie op hierdie dag vervul is nie, maar dat die profesie in Joël dít insluit wat hulle so pas sien gebeur het.
Dit dui ook aan dat hierdie verskynsels verwag kan word gedurende die hele ‘kerk tydperk’, met die klimaks in die kosmiese gebeure wat in Joël se profesie verwag word.
Die kosmiese gebeure het tot op datum nog nie plaasgevind nie, en wag nog om in ons toekoms te gebeur.
“En Ek sal wonders gee bo in die hemel en tekens onder op die aarde, bloed en vuur en rookdamp. Die son sal verander in duisternis en die maan in bloed voordat die groot en deurlugtige dag van die Here kom.” HANDELINGE 2:19-20 AFR53
“En Ek sal wondertekens gee aan die hemel en op die aarde: bloed en vuur en rookpilare. Die son sal verander word in duisternis en die maan in bloed, voordat die groot en deurlugtige dag van die Here kom.” JOËL 2:30-31 AFR53
Elkeen, beteken almal, Jood en heiden. Almal vanaf die uitstorting van die Heilige Gees tot en met die tyd wanneer Jesus weer terugkom. Elkeen wat die Naam van die Here aanroep, sal gered word!
“En elkeen wat die Naam van die Here aanroep, sal gered word.” HANDELINGE 2:21 AFR53
“En elkeen wat die Naam van die Here aanroep, sal gered word; want op die berg Sion en in Jerusalem sal daar ontkoming wees soos die Here gesê het, en onder die vrygeraaktes die wat die Here sal roep.” JOËL 2:32 AFR53
Hoe kon Joël moontlik verstaan hoe langtermyn God se profesieë was vir die uitbreiding van Sy seëninge deur die eeue heen? Want God het nie net gepraat om daardie getroue Jode in Joël se dag te seën nie, maar alle getroue Jode en nie-Jode in die millenniums wat kom.
19 Junie 2024
II PETRUS 3:10 AFR53
Maar die dag van die Here sal kom soos 'n dief in die nag, waarin die hemele met gedruis sal verbygaan en die elemente sal brand en vergaan, en die aarde en die werke wat daarop is, sal verbrand.
Geen profeet van die Ou Testament het 'n belangriker openbaring van die eindtyd as wat Joël in hoofstuk 3 weergee nie. Die ‘dag van die Here’ is die tydperk vanaf die Verdrukking tot en met die verbygaan van die hemele en die aarde.
God spreek in Joël se laaste profesie die nasies aan wat geen berou het nie. As die profeet net ten volle kon verstaan wat die Joodse volk deur die eeue heen sou moes verduur vir hierdie profesie om tot finale vervulling te kom, sou dit hom met afgryse vervul het!
Die verskriklike sprinkaan inval wat Juda verduur het, sou 'n voorbeeld les word wat God vir die komende eeue sou gebruik. Sedert Joël sy profesieë neergepen het, kon mense dié gedeelte en die geskrifte van ander profete soos Amos, Sefanja en Maleagi lees en die verwoestende verliese van die sprinkaan inval van Juda vergelyk met 'n toekomstige tydperk van katastrofiese oordeel.
Ook genoem ‘Die Dag van Yahweh’, word die finale eindtyd oordeel gedefinieër as 'n dag waarin God die stilte sal verbreek en in die geskiedenis sal ingryp om beide Israel en die nie-Joodse nasies te oordeel.
Die apostel Paulus sou later hierdie oordeelsdag beskryf as die tyd wanneer God die wêreld in geregtigheid sou oordeel deur die Man wat God bestem het, en daardie Man is Jesus Christus.
God het dan die tye van onkunde oorgesien en verkondig nou aan al die mense oral dat hulle hul moet bekeer, omdat Hy 'n dag bepaal het waarop Hy die wêreld in geregtigheid sal oordeel deur 'n Man wat Hy aangestel het, en Hy het hiervan aan almal sekerheid gegee deur Hom uit die dode op te wek. HANDELINGE 17:30-31 AFR53
Israel is vroeg al gewaarsku dat as hulle ongehoorsaam was, hierdie oordeel oor hulle sou kom.
As jy kinders en kindskinders sal verwek en julle in die land verouderd sal wees en verderflik handel deurdat julle 'n gesnede beeld maak, 'n gelykenis van enigiets, en doen wat verkeerd is in die oë van die Here jou God om Hom te terg, dan neem ek vandag die hemel en die aarde as getuies teen julle dat julle sekerlik gou uit die land sal vergaan waarheen julle oor die Jordaan trek om dit in besit te neem; julle sal die dae daarin nie verleng nie, maar sekerlik verdelg word. En die Here sal julle onder die volke verstrooi, en 'n klein klompie van julle sal onder die nasies oorbly waarheen die Here julle sal drywe. En daar sal julle gode dien, die werk van mensehande, hout en klip wat nie sien en nie hoor en nie eet en nie ruik nie. Dan sal julle daarvandaan die Here jou God soek en vind as jy Hom met jou hele hart en jou hele siel soek. As jy in die nood is en al hierdie dinge aan die einde van die dae oor jou kom, sal jy na die Here jou God terugkeer en na sy stem luister. Want die Here jou God is 'n barmhartige God; Hy sal jou nie verlaat en jou nie in die verderf stort nie; en Hy sal die verbond van jou vaders wat Hy hulle besweer het, nie vergeet nie. DEUTERONÓMIUM 4:25-31 AFR53
Wee, want die dag is groot, sonder weerga! En dit is 'n tyd van benoudheid vir Jakob; maar hy sal daaruit verlos word. JEREMIA 30:7 AFR53
Want Ek sal al die nasies versamel om oorlog te voer teen Jerusalem; en die stad sal ingeneem en die huise geplunder en die vroue onteer word, en die helfte van die stad sal uitgaan in ballingskap; maar die orige deel van die bevolking sal nie uit die stad uitgeroei word nie. En die Here sal uittrek en stryd voer teen dié nasies soos op die dag van sy stryd, die dag van oorlog. SAGARÍA 14:2-3 AFR53
20 Junie 2024
JOËL 3:1 AFR53
Want kyk, in dié dae en in dié tyd wanneer Ek die lot van Juda en Jerusalem verander,
Wanneer sal die ‘dag van die Here’ kom? Joël sê vir ons dit sal wees wanneer die gevangenes van Juda en Jerusalem — die Joodse volk wat sedert 70 n.C. oor die hele wêreld versprei is—volledig weer in die land van Israel teruggebring word. Wanneer God die lot van Juda en Jerusalem gaan verander.
Joël het geprofeteer dat terwyl die Jode onder die nasies verstrooi sou word, hulle nooit deur God vergeet sou word nie. God sou beslis die kinders van Israel terugbring in die land wat Hy aan hulle belowe het. Die Jode het sedert die laat 1800's weer as 'n volk bymekaargekom om weer die nasie van Israel te word, amptelik in Mei 1948. Ons vandag is die generasie wat sien hoe hierdie profesie besig is om vervul te word - reg voor ons oë!
‘in dié dae en in dié tyd’ - Die herversameling van Israel is 'n voorvereiste van die eindtyd.
En Ek self sal die oorblyfsel van my skape versamel uit al die lande waarheen Ek hulle verdryf het; en Ek sal hulle terugbring na hulle weiveld, en hulle sal vrugbaar wees en vermenigvuldig. En Ek sal herders oor hulle verwek wat hulle sal oppas; en hulle sal nie meer bevrees of verskrik wees of vermis word nie, spreek die Here. JEREMIA 23:3-4 AFR53
En Ek sal hulle een volk maak in die land, op die berge van Israel; en een Koning sal vir hulle almal koning wees; en hulle sal nie meer twee nasies wees nie en verder nie meer in twee koninkryke verdeeld wees nie. ESÉGIËL 37:22 AFR53
Tydens die tweede wêreld oorlog is 1/3 van die Joodse bevolking deur die Nazi’s uitgeroei, maar in die Verdrukking sal 2/3 van die Joodse bevolking uitgeroei word.
En in die ganse land, spreek die Here — twee-derdes sal daarin uitgeroei word, sal sterwe, maar een-derde daarin oorbly. Dan sal Ek die derde deel in die vuur bring en hulle smelt soos 'n mens silwer smelt en hulle toets soos 'n mens goud toets. Hulle sal my Naam aanroep, en Ek sal hulle verhoor. Ek sê: Dit is my volk! En hulle sal sê: Die Here, my God! SAGARÍA 13:8-9 AFR53
God belowe om Sy volk weer terug te bring na Israel uit al die lande waarheen Hy hulle verdryf het. Die ‘Jewish Virtual Library’ se statistieke toon duidelik die groei van die Joodse populasie van Mei 1948 tot Januarie 2024.
Mei 1948: 806,000
1 Januarie 2024: 9,842,000
21 Junie 2024
JOËL 3:2 AFR53
sal Ek al die nasies versamel en hulle na die dal van Jósafat laat aftrek, om daar met hulle 'n strafgerig te hou ter wille van my volk en my erfdeel Israel wat hulle onder die nasies verstrooi het, en my land wat hulle verdeel het.
Joël beskryf hier die finale samekoms van die nasies wat in opstand kom teen God en wat by Armageddon sal plaasvind. Daar is geen plek in Israel bekend as die dal van Josafat nie, maar die naam Josafat beteken ‘God oordeel’, wat heel van pas is vir hierdie situasie.
En hulle het hul versamel op die plek wat in Hebreeus genoem word Armagéddon. OPENBARING 16:16 AFR53
God gee twee redes hoekom Hy al die nasies van die wêreld bymekaar gaan maak vir oordeel in die dal van Josafat.
1. Omdat die nasies God se volk uit Jerusalem verdryf het en hulle onder die nasies verstrooi en mishandel het.
Regdeur die afgelope 1900 jaar terwyl die Jode in ballingskap was, is hulle as uitgeworpenes behandel.
2. Die tweede rede is die wêreld se obsessie om God se Heilige Land te probeer verdeel.
God het vir elke stam hul eie stuk grond gegee toe hulle die Beloofde Land ingegaan het, en dit is beslis nie die wêreld se plek om dit wat God uitgedeel het aan Sy volk, te gaan verdeel vir hul eie gewin nie.
Elke plek waar julle voetsool op sal trap, dit gee Ek aan julle, soos Ek met Moses gespreek het. Van die woestyn en hierdie Líbanon af tot by die groot rivier, die Eufraatrivier, die hele land van die Hetiete, en tot by die Groot See in die weste sal julle grondgebied wees. JOSUA 1:3-4 AFR53
God het daardie moeë mense wat in die Tempel saamgedrom het, gedryf deur rampspoed om Sy boodskappe te hoor, belowe dat Sy seëninge so ver sou strek dat Juda vir ewig sal bly, en Jerusalem van geslag tot geslag. Die wêreld het oor die eeue heen probeer om hierdie seëninge van God te stuit, deur die Jode te mishandel en hul beloofde land te probeer steel. God bevestig dat Hy nie gelukkig is daarmee nie.
Dit was gebruiklik van oorwinnaars, in daardie dae, om die gevangenes wat in oorlog geneem is, onder mekaar te verdeel deur lootjies te trek, en so ook hierdie vyande van die Jode.
Die Joodse seuns is in plaas van geld vir hoere verruil of weggegee, en die meisies is vir wyn verkoop om te drink, as't ware vir 'n glas wyn - dit wil sê teen 'n afskuwelike lae prys.
Hierdie voorbeelde word genoem om die minagting aan te dui waarmee die vyande van die Jode, die aanbidders van die ware God, behandel het.
En oor my volk het hulle die lot gewerp en 'n jong seun weggegee vir 'n hoer en 'n meisie verkoop vir wyn en dit gedrink. JOËL 3:3 AFR53
22 Junie 2024
JOËL 3:4 AFR53
En ook, wat het julle met My te doen, o Tirus en Sidon en al die landstreke van Filistéa? Wil julle My iets vergelde, of wil julle My iets aandoen? Gou, ylings sal Ek julle dade op julle hoof laat neerkom.
Let op die retoriese vrae wat God vra, waarop die antwoorde telkens nee is.
Nee, hulle is nie God s’n nie. En, nee, hulle sal hulle nie kan wreek op wat God vir hulle beplan nie.
Tirus en Sidon, vandag se Libanon - word huidiglik deur Hezbollah beheer.
Filistea, vandag se Gasa - word huidiglik deur Hamas beheer.
Die lande van die Fenisiërs (Tirus en Sidon) en die Filistyne (Gasa) is aan Israel gegee as 'n erfdeel. Israel het opdrag gekry om hierdie mense uit die land uit te verdryf, maar het versuim om dit te doen. Hulle is sedertdien ’n doring in Israel se vlees, selfs vandag nog soos ons daagliks in die nuus sien.
Die Fenisiërs en die Filistyne word uitgesonder vir hulle aandeel in die leed wat Juda en Jerusalem ervaar het. Hulle het hulle vergryp aan beide die goedere in die tempel sowel as aan die mense van Juda en Jerusalem.
Waar hulle egter die Jode in die noordweste in Griekeland gaan verhandel het (vgl. Eseg. 27 wat ook hierna verwys), sal hulself ironies genoeg vêr aan die teenoorgestelde kant, die suidweste in Skeba (waarskynlik óf Jemen óf Somalië/Ethiopië), verkoop word.
God gaan hulle eie dade op hulle kop laat afkom. Presies soos hulle teenoor Sy volk opgetree het, só sal God teenoor hulle optree. Hulle het Hom verag deur Sy goed te steel, sowel as Sy mense. Nou gaan God dieselfde aan hulle doen.
Dié deel van die profesie is eintlik bedoel as ‘n troos vir die gevoel van verontregting wat die volk kon ervaar in die wyse waarop die ballingskap en verstrooiing gebeur het. Die wrede uitbuiting en onverdiende mishandeling van die buurnasies wat eintlik Juda se belange op die hart moes dra, gaan nie ongesiens verby nie. God sal regstelling bring. Hy straf onreg, al neem dit ook tyd.
Wraak of vergelding is 'n negatiewe idee in westerse denke, maar 'n tema wat deur die hele Skrif loop. Die geregtigheid van God eis dat die onreg van mense en nasies teenoor mekaar reggestel word. Wraak behoort egter aan God.
My kom die wraak toe en die vergelding, op die tyd as hulle voet sal wankel; want die dag van hulle ondergang is naby, en wat oor hulle beskik is, kom gou. DEUTERONÓMIUM 32:35 AFR53
Moenie julle wreek nie, geliefdes, maar gee plek vir die toorn; want daar is geskrywe: Aan My kom die wraak toe, Ek sal vergeld, spreek die Here. ROMEINE 12:19 AFR53
En toe Hy die vyfde seël oopgemaak het, sien ek onder die altaar die siele van die wat gedood is ter wille van die woord van God en die getuienis wat hulle gehad het. En hulle het met 'n groot stem uitgeroep en gesê: Hoe lank, o heilige en waaragtige Heerser, oordeel en wreek U nie ons bloed op die bewoners van die aarde nie? OPENBARING 6:9-10 AFR53
23 Junie 2024
JOËL 3:9 AFR53
Roep dit uit onder die nasies, heilig 'n oorlog! Wek die helde op, laat al die krygsmanne nader kom, opruk!
Roep dit uit onder die nasies - God daag die nasies uit om voor te berei vir ‘n oorlog teen Hom.
Dieselfde oproep word in Openbaring gehoor! Die Antichris sal daarvoor verantwoordelik wees om hierdie leërs bymekaar te maak.
En die sesde engel het sy skaal uitgegooi op die groot rivier, die Eufraat, en sy water het opgedroog, sodat die pad van die konings wat van die ooste af kom, reggemaak kon word. En ek het uit die bek van die draak en uit die bek van die dier en uit die mond van die valse profeet drie onreine geeste soos paddas sien kom. Want dit is geeste van duiwels wat tekens doen, wat uitgaan na die konings van die aarde en die hele wêreld, om hulle te versamel vir die oorlog van daardie groot dag van die almagtige God. Kyk, Ek kom soos 'n dief. Salig is hy wat waak en sy klere bewaar, sodat hy nie miskien naak rondloop en hulle sy skaamte sien nie. En hulle het hul versamel op die plek wat in Hebreeus genoem word Armagéddon. OPENBARING 16:12-16 AFR53
Hierdie stem ooreen met die oproep van die mense van Juda na die tempel. Die vernietiging van die sprinkane het gelei tot 'n algemene oproep om te vas en te bid. Toe daar ag geslaan is, het God berou gehad en die land genees. Die Israeliete, die oorblyfsel, sal as ‘n nasie saamkom vir bekering en hulle sal verlos word. Die nasies egter kom saam vir oorlog (teen God) en word vernietig.
'n Oorlog tot die einde.
As jy teen God gaan veg, moet jy elke wapen tot jou beskikking gereed he, en jy moet ook jou beste positiewe denke oefen - laat die swakke sê: Ek is ‘n held! - die mees positiewe gesindheid kan egter nie werk wanneer die mens homself teen Sy Maker opstel nie.
Smee van julle pikke swaarde en van julle snoeimesse spiese; laat die swakke sê: Ek is 'n held. JOËL 3:10 AFR53
Dié opdrag van God hier in Joël is presies die teenoorgestelde van die opdrag wat aan Juda en Jerusalem in Jesaja, en aan die nasies in Miga, gegee word, om van hulle swaarde ploegskare en van hulle spiese snoeiskêre te smee.
In Jesaja en Miga wil God vrede en voorspoed bring. Hiér in Joël wil God Sy oordeelsbeslissing ten uitvoer bring. Dieselfde objekte in die metafore word dus vir radikaal teenoorgestelde bedoelings ingespan – oordeel en redding.
En Hy sal oordeel tussen die nasies en regspreek oor baie volke; en hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie. JESAJA 2:4 AFR53
En Hy sal oordeel tussen baie volke en regspreek vir magtige nasies tot in die verte; en hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie. MIGA 4:3 AFR53
24 Junie 2024
JOËL 3:11 AFR53
Haas julle en kom aan, alle nasies rondom, en versamel julle. Laat u helde, Here, daarheen aftrek!
Joël jaag die nasies aan om hulself te versamel vir die oorlog en hy praat ook met God en vra dat Hy Sy helde moet saambring - die leërskare van die engele!
God antwoord op Sy uitgebreide wyse dat die nasies na die dal van Josafat moet optrek want daar sal Hy die nasies straf.
Die nasies moet hulle klaarmaak en optrek na die dal van Jósafat; want daar sal Ek sit om gerig te hou oor al die nasies rondom. JOËL 3:12 AFR53
Die idiome verander nou van oorlog na oes. In die vorige hoofstukke se landboubeelde het die sprinkane en droogte enige oes verhoed, en daarna het die hernude oes van oorvloed gevolg na die volk se bekering. Vir die nasies beteken oestyd egter dat hulle ryp is vir oordeel want hul boosheid is groot.
Steek die sekel in, want die oes is ryp! Kom trap, want die parskuip is vol, die kuipe loop oor! Want hulle boosheid is groot. JOËL 3:13 AFR53
Die trap van die parskuip lei tot die vernietiging van die heiden nasies. Hierdie trap, wat net buite die mure van Jerusalem plaasvind, word beskryf in Openbaring.
En 'n ander engel het uitgekom uit die tempel wat in die hemel is, en hy het ook 'n skerp sekel gehad; en 'n ander engel wat mag oor die vuur gehad het, het uit die altaar uitgekom en met 'n groot stem geroep na hom wat die skerp sekel het, en gesê: Slaan jou skerp sekel in en samel die trosse van die wingerdstok van die aarde in, want sy druiwe het ryp geword. En die engel het sy sekel oor die aarde laat gaan en die wingerdstok van die aarde afgeoes en dit gegooi in die groot parskuip van die grimmigheid van God. En die parskuip is buitekant die stad getrap, en bloed het uit die parskuip gekom tot aan die tooms van die perde, tweehonderd myl ver. OPENBARING 14:17-20 AFR53
Hierdie oordeel van die heidene wat Joël beskryf, is presies dieselfde oordeel as wat beskryf word in Matt 25:31–46, die oordeel van die skape en die bokke.
En wanneer die Seun van die mens in sy heerlikheid kom en al die heilige engele saam met Hom, dan sal Hy op sy heerlike troon sit; en voor Hom sal al die nasies versamel word, en Hy sal hulle van mekaar afskei soos die herder die skape van die bokke afskei; en Hy sal die skape aan sy regterhand en die bokke aan sy linkerhand sit. Dan sal die Koning vir die wat aan sy regterhand is, sê: Kom, julle geseëndes van my Vader, beërf die koninkryk wat vir julle berei is van die grondlegging van die wêreld af. MATTHÉÜS 25:31-34 AFR53
Dan sal Hy ook vir dié aan sy linkerhand sê: Gaan weg van My, julle vervloektes, in die ewige vuur wat berei is vir die duiwel en sy engele. MATTHÉÜS 25:41 AFR53
En hulle sal weggaan in die ewige straf, maar die regverdiges in die ewige lewe. MATTHÉÜS 25:46 AFR53
25 Junie 2024
JOËL 3:14 AFR53
Menigtes, menigtes in die dal van beslissing, want naby is die dag van die Here in die dal van beslissing!
Die bevel het uitgegaan en dit word gehoorsaam. Die profeet staan verstom oor die groot menigtes wat vergader in die dal van beslissing, die plek van oordeel.
Die woord menigtes is vertaal van die Hebreeuse woord ‘hamon’ en beteken ook murmureer, brul rumoer, klank en skare. Dit is dus ‘n gepaste woord om te sien en hoor hoe groot die skare is en die geraas wat gepaard gaan met so ‘n menigte. Ook die feit dat menigtes herhaal word beskryf hoe baie mense daar gaan wees.
Die ‘dag van die Here’ is naby, die dag waar God gaan beslis oor wat gebeur en nie die mense nie.
Dieselfde kosmiese tekens wat saam met die sprinkane gekom het, gebeur nou op ‘n wêreldwye skaal.
Die son en die maan word duister, en die sterre trek hulle glans in. JOËL 3:15 AFR53
Die leërs sal ineenkrimp van skrik wanneer die Here uit Sion brul en die aarde skud met Sy regverdige toorn.
En die Here brul uit Sion, en uit Jerusalem verhef Hy sy stem, sodat hemel en aarde bewe. Maar die Here sal 'n toevlug wees vir sy volk en 'n skuilplek vir die kinders van Israel. JOËL 3:16 AFR53
Die Leeu van die stam van Juda, die wortel van Dawid, Jesus Christus!
Toe sê een van die ouderlinge vir my: Moenie ween nie; kyk, die Leeu wat uit die stam van Juda is, die wortel van Dawid, het oorwin om die boek oop te maak en sy sewe seëls te breek. OPENBARING 5:5 AFR53
Vir duisende jare het die Jode die getrap van vreemde voete deur hul heilige stad gehoor. Babiloniërs, Grieke, Romeine, Arabiere, die Kruisvaarders... die VN, ens. Maar nou is daar ‘n belofte van geen vreemdes meer nie!
Dan sal julle weet dat Ek die Here julle God is, wat woon op Sion, my heilige berg; dan sal Jerusalem 'n heiligdom wees waar geen vreemdes meer deur sal trek nie. JOËL 3:17 AFR53
Hierdie oordeel moet onderskei word van die oordeel wat voor die groot wit troon gaan plaasvind, en wat na die Millennium sal gebeur.
En wanneer die duisend jaar voleindig is, sal die Satan uit sy gevangenis ontbind word; OPENBARING 20:7 AFR53
En die duiwel wat hulle verlei het, is in die poel van vuur en swawel gewerp waar die dier en die valse profeet is; en hulle sal dag en nag gepynig word tot in alle ewigheid. OPENBARING 20:10 AFR53
En ek het 'n groot wit troon gesien en Hom wat daarop sit, voor wie se aangesig die aarde en die hemel weggevlug het; en daar is geen plek vir hulle gevind nie. OPENBARING 20:11 AFR53
26 Junie 2024
JOËL 3:18 AFR53
En op dié dag sal die berge drup van mos en die heuwels vloei van melk en al die spruitjies van Juda stroom van water; en uit die huis van die Here sal daar 'n fontein uitkom om die dal Sittim te besproei.
Die berge sal oorloop van wyn, en daar sal ‘n oorvloed van melk wees op die heuwels. Na God se finale oorwinning is daar blywende oorvloed en die dae van droogte is net 'n ver herinnering.
'n Fontein sal uit die huis van die Here (die tempel) vloei - Esegiël 47 beskryf waters wat uit die huis van die Here vloei in die tyd na Jesus se triomfantlike wederkoms, in die Millennium.
Daarna het hy my teruggebring na die ingang van die huis, en kyk, daar het waters uitgestroom onder die drumpel van die huis uit, na die ooste toe; want die voorkant van die huis was na die ooste toe; en die waters het weggevloei onder die regtersymuur van die huis uit, suid van die altaar. ESÉGIËL 47:1 AFR53
Sagaria praat ook van 'n groot vloei van water uit Jerusalem wat beide in die Dooie See en in die Middellandse See uitmond.
En in dié dag sal daar lewende waters uit Jerusalem uitvloei, die een helfte daarvan na die Oostelike en die ander helfte daarvan na die Westelike See; somer en winter sal dit so wees. SAGARÍA 14:8 AFR53
Maar Egipte sal 'n woestyn wees, saam met die ander vyande van die God en Sy volk. Die oordeel teen Edom word in meer Ou-Testamentiese boeke genoem as wat dit teen enige ander vreemde nasie genoem word.
Egipte sal 'n woesteny word, en Edom 'n woeste wildernis wees, weens die geweld wat hulle die kinders van Juda aangedoen het, dat hulle onskuldige bloed in hul land vergiet het. JOËL 3:19 AFR53
Maar Juda sal vir ewig bly, want die Here woon in Sion. God sal barmhartigheid bewys aan Sy volk en aan hulle vergifnis gee. Hierdie profesie van Joël, wat begin het met die desperate plaag van sprinkane, eindig met 'n belofte van herstel en verlossing.
Maar Juda sal vir ewig bly, en Jerusalem van geslag tot geslag. JOËL 3:20 AFR53
Wanneer God Sy koninkryk oprig, sal niemand dit ooit vernietig nie.
Dan word die koningskap en die heerskappy en die grootheid van die koninkryke onder die ganse hemel gegee aan die volk van die heiliges van die Allerhoogste; hulle koninkryk is 'n ewige koninkryk, en al die heerskappye sal hulle vereer en gehoorsaam wees. DANIËL 7:27 AFR53
In daardie tyd sal die Here Jesus Christus op Sy troon sit om die belofte aan Dawid van 'n ewige geslag te vervul.
Hý sal vir my Naam 'n huis bou, en Ek sal sy koninklike troon bevestig tot in ewigheid. En jou huis en jou koningskap sal bestendig wees tot in ewigheid voor jou; jou troon sal vasstaan tot in ewigheid. II SAMUEL 7:13, 16 AFR53
Die Here sal die bloedskuld van die wat nog nie vergewe was nie, uitwis. Die redding wat God bring is vir altyd. Hy is by hulle vir altyd.
En Ek sal hulle bloed onskuldig verklaar, wat Ek tevore nie onskuldig verklaar het nie; en die Here sal op Sion bly woon. JOËL 3:21 AFR53
27 Junie 2024
JOËL 1:15 AFR53
Ag, die dag! Want naby is die dag van die Here, en hy kom soos 'n verwoesting van die Almagtige.
Opsommend dui die ‘dag van die Here’ op 'n tyd van goddelike oordeel of besoek van die Here. Dit is 'n tydperk wanneer God goddelose mense direk en beslis konfronteer, dikwels met vreesaanjaende oordeel. Hierdie goddelike ingryping kan gerig wees op vreemde entiteite (nasies of heidene), God se uitverkore volk (die Jode), of albei, wat die universele betekenis daarvan onderstreep.
Die dag van die Here, soos dit in die Bybel uitgebeeld word, is 'n gebeurtenis van goddelike ingryping in die geskiedenis, hetsy in die verlede of in die toekoms. Die profete wat hierdie doemprofesieë oordra, verwys dikwels na óf naderende gebeure óf dié wat in die laaste dae sal ontvou. Hierdie goddelike ingryping word ook die dag van (Sy) toorn genoem, die dag van rampspoed, Jakob se benoudheid, of op daardie dag.
Soos uitgebeeld in eskatologiese profesieë, is die ‘dag van die Here’ nie 'n blote 24-uur tydperk nie. Dit strek verder as die 24 uur van Jesus Christus se tweede koms, en sluit Daniël se 70ste week in (Daniël 9:27), bekend as die sewe jaar Verdrukking. Baie geleerdes glo hierdie dag (tydperk) van die Here bestaan ook uit die Wegraping en die duisendjarige koninkryk.
Die Ou Testament
Die term ‘dag van die Here’ of die ‘dag van Yahweh’ word 19 keer in die Ou Testament gevind.
Nege Ou-Testamentiese profete het geprofeteer oor die ‘dag van die Here’ (of 'n dag van Yahweh). Van die vroegste tot die jongste datums is die profete wat oor die ‘dag van die Here’ geskryf het Joël, Amos, Jesaja, Sefanja, Jeremia, Esegiël, Sagaria, Obadja en Maleagi.
Joël se geskrifte dateer ongeveer 835-796 v.C., terwyl Maleagi in 430 v.C. geskryf het. Maleagi was die laaste profeet wat deur God na Judea gestuur is voordat Johannes die Doper ongeveer vier en 'n half eeue later gekom het.
Joël - opsommend!
Joël was die eerste Ou-Testamentiese profeet wat geprofeteer het oor die eindtyd tydperk genoem ‘die dag van die Here’. Hy begin met 'n sprinkaanplaag in Joël 1:4-12 en dan skryf hy in Joël 1:15 ons teksvers van vandag - Ag, die dag……
Joël 2:1, 2:11, 2:31 en 3:14 verwys ook na die ‘dag van die Here’. Joël verwys na 'n invallende leër (dalk demonies) wat teen die land kom.
'n dag van duisternis en donkerheid, 'n dag van wolke en wolkenag; soos die môreskemering, uitgesprei oor die berge, kom 'n talryke en magtige volk, wat van oudsher sy gelyke nie gehad het nie en dit hierna ook nie sal hê tot in die jare van die verste geslagte nie. Joël 2:2 AFR53
Joël beskryf hierdie 'sprinkane' in Joël 1:6 en 2:4,
Want 'n sterk en ontelbare nasie het opgetrek oor my land; sy tande is leeutande, en dit kan byt soos 'n leeuin. JOËL 1:6 AFR53
Sy voorkoms is soos dié van perde, en net soos ryperde so hardloop hulle. JOËL 2:4 AFR53
Dit klink merkwaardig soortgelyk aan Openbaring 9:3,7,8 en is die gevolg van die vyfde basuin-oordeel, wat ook duisternis en somberheid meebring.
En uit die rook het daar sprinkane uitgekom op die aarde, en aan hulle is mag gegee soos die skerpioene van die aarde mag het. En die voorkoms van die sprinkane was soos dié van perde wat vir die oorlog toegerus is, en op hulle koppe was iets soos krone wat net soos goud gelyk het, en hulle gesigte was soos die gesigte van mense. En hulle het hare gehad soos vrouehare, en hulle tande was soos dié van leeus. OPENBARING 9:3, 7-8 AFR53
28 Junie 2024
JOËL 2:28 AFR53
En daarna sal Ek my Gees uitgiet op alle vlees, en julle seuns en julle dogters sal profeteer, julle ou mense drome droom, julle jongelinge gesigte sien.
In Handelinge 2:16-21 het Petrus op Pinksterdag, na Jesus se dood, Joël 2:28-32 aangehaal. Nadat die dissipels met die Heilige Gees vervul is en in staat gestel is om in verskillende tale te praat, het Petrus gesê dat dit is wat gespreek is deur die profeet Joël, en dit sal gebeur in die laaste dae.
Die uitstorting van die Heilige Gees op die dissipels was 'n voorbode van wat sal kom wanneer Jesus terugkeer en Sy Koninkryk op aarde begin met die regverdige oorblyfsel van Israel.
Aangaande die toekomstige ‘dag van die Here’ het Joël gesê dat die son sal verander word in duisternis en die maan in bloed, voordat die groot en vreeslike dag van die Here kom (Joël 2:31).
Dit sal beslis vervul word met die sesde seël oordeel tydens die Verdrukking.
En ek het gesien toe Hy die sesde seël oopgemaak het, en kyk, daar was 'n groot aardbewing; en die son het swart geword soos 'n harige sak, en die maan het geword soos bloed; OPENBARING 6:12 AFR53
In Joël 2:32 sê die profeet dat elkeen wat die Naam van die Here aanroep, gered sal word. Dit is beslis 'n profesie wat met die wederkoms vervul sal word. Dit is egter ook waar in die sin dat nadat Jesus vir die sondes van die mensdom aan die kruis gesterf het, Sy gestorte bloed die basis geword het vir die nuwe verbond tussen mens en God. Elkeen wat in Sy verlossende offer glo en die Naam van die Here Jesus Christus aanroep, sal gered word.
Joël 3:9-16 beskryf die eindstryd tussen die magte van die Antichris en die Messias. Die geveg begin in Bosra (hedendaagse Jordanië). Dit vorder terug na die oostelike mure van Jerusalem, wat uitkyk oor 'n gedeelte van die Kedronvallei, ook bekend as die dal van Josafat.
Die vernietiging of oes van die goddeloses op die dag van die Here, soos beskryf deur Joël 3:13, word ook beskryf in Openbaring 14:17-20.
En 'n ander engel het uitgekom uit die tempel wat in die hemel is, en hy het ook 'n skerp sekel gehad; en 'n ander engel wat mag oor die vuur gehad het, het uit die altaar uitgekom en met 'n groot stem geroep na hom wat die skerp sekel het, en gesê: Slaan jou skerp sekel in en samel die trosse van die wingerdstok van die aarde in, want sy druiwe het ryp geword. En die engel het sy sekel oor die aarde laat gaan en die wingerdstok van die aarde afgeoes en dit gegooi in die groot parskuip van die grimmigheid van God. En die parskuip is buitekant die stad getrap, en bloed het uit die parskuip gekom tot aan die tooms van die perde, tweehonderd myl ver. OPENBARING 14:17-20 AFR53
Hierdie selfde vallei waarvan die profeet in Joël 3:14 praat, sal wees waar Jesus die nasies (heidene) oordeel by die skaap- en bok-oordele van Matteus 25:31-46. Dit is hoekom dit die Vallei van Besluit genoem word, want Jesus Christus sal hulle ewige bestemming bepaal.
Joël 3:18-21 beskryf die Here se Koninkryk op aarde (die Duisendjarige Koninkryk), waar Hy uit Sion ('n ander naam vir Jerusalem) sal regeer.
Die woorde 'die dag' in Joël 3:18 verwys terug na die 'dag van die Here.' Joël se profesie skep 'n presedent vir die ander profesieë aangaande die ‘dag van die Here’, waar ‘die dag' bestaan uit die tyd van die oordeel teen diegene wat teen God en Sy woord in opstand kom, die wederkoms van Jesus Christus, en die duisendjarige koninkryk van Christus.
En op dié dag sal die berge drup van mos en die heuwels vloei van melk en al die spruitjies van Juda stroom van water; en uit die huis van die Here sal daar 'n fontein uitkom om die dal Sittim te besproei. JOËL 3:18 AFR53
Comments