Diens, Ete en Nagmaal – Do 29/3/18
Die Paasfees maal
Goeie naand en baie welkom by ons eerste Paasfees maal. Dit is vir my wonderlik om te sien dat julle vanaand eenkant gesit het om meer van die feeste te leer.
Ons hou vanaand wat genoem word ‘n Seder Fees (seder beteken orde) en die handleiding vir die fees word ‘n Hagaddah genoem en dit beteken ‘om te vertel’.
Ek gaan vanaand vir julle 2 verhale vertel. Ons gaan terug gaan in die geskiedenies, 3500 jaar gelede, en onthou wat ons geleer het toe ons nog in Sondagskool was. Ons gaan in die Ou Testament kyk hoe God Sy volk uit Egipte uitgelei het weg van hul slawerny.
Die tweede verhaal is in die Nuwe Testament, en dit is die verhaal van Jesus se kruisiging & dood.
Ek gaan die 2 bymekaar bring en julle wys dat die NT in die OT versteek is en die OT in die NT openbaar word.
Vanaand is ons in Israel in die noordelike halfrond, en dit is lente. Paasfees is altyd in die Joodse maand Nisan (ons Maart / April) en wel op die 14de Nisan, en word bepaal volgens die volmaan. As julle vanaand huis toe gaan, sal julle sien dat dit volmaan is.
Onthou ook dat die Joodse dag met sononder begin en nie 12 uur middernag soos ons dit doen nie.
Voor die fees is daar eers ‘n groot huis skoonmaak ritueel. Dit is waar die woord ‘Spring Cleaning’ vandaan kom. Daar moet veral gelet word om alle suurdeeg / yeast uit die huis te kry. Dit is die bestanddeel wat ons brooddeeg laat rys. Suurdeeg in die Bybel is ‘n prentjie van sonde.
Die aand van die Paasfees net na sononder, vat die pa die kinders (hierdie is ‘n familie fees) en hulle gaan soek die broodkrummels of die sondes, wat weggesteek is.
Hy het ‘n paar items om hom te help. Hulle steek ‘n kers aan om lig te maak, en vee dan die krummels met ‘n veer op ‘n houtlepel. Dan word die houtlepel met krummels in ‘n linnelap toegedraai, buitekant toe gevat, en verbrand.
Wat op aarde is hierdie ‘n prentjie van. Kom ons kyk.
Die huis wat skoongemaak word is ons liggaam wat ‘n tempel is van God. Die lig is Jesus wat ‘n lamp is vir ons voete. Die veer is die Heilige Gees, ons Helper, wat ons help om ons sondes (broodkrummels) te vind en op die houtlepel te vee – Jesus se kruis. Die toedraai van die houtlepel en krummels is Jesus wat dood is en in linne toegedraai word. Dan word ons sondes in die vuur verbrand – Jesus het na die hel neergedaal vir my en jou sondes.
Wow! En ons het nog nie formeel begin nie – is dit nie ‘n mooi prentjie nie!
Kers word aangesteek
Elke gasvrou moet nou asb die kers aan haar tafel vir my aansteek. Soos ons nou reeds geleer het is die kers ‘n voorstelling van Jesus, die lig vir die wereld.
Die gasvrou is die ma van die huis wat Maria voorstel. Haar belangrike taak was om Jesus in die wêreld in te bring.
Julle het elkeen ook ‘n beker of wynglas op die tafel. Die beker gaan deur die loop van die aand 4 keer gebruik word. Ons gaan druiwesap gebruik, maar ek sal daarna verwys as wyn.
Die 4 bekers wat deur die loop van die aand gebruik gaan word is die 4 beloftes wat God vir die Israeliete gegee het voor hul uittog uit Egipte.
Ek sal julle uitlei uit Egipte – die beker van heiligmaking
Ek sal julle red van jul slawerny – die beker van vrymaking
Ek sal julle verlos met ‘n uitgestrekte arm – die beker van verlossing of danksegging
Ek sal julle as My volk aanneem – die beker van aanneming
Die 1ste beker
Die eerste beker is die beker van heiligmaking. Heiligmaking beteken om eenkant gesit te word. Julle het vanaand eenkant gesit om hier te wees, om meer van die feeste leer.
Neem nou jul 1ste beker.
Persoon 1, spreek asb vir ons die seën oor die beker uit!
Geseënd is U, o Here onse God, Koning van die heelal wat ons uit Egipte uitgelei het.
Drink nou die 1ste beker.
As julle als gedrink het is dit goed so, julle mag. Hervul asb jul glase, maar moenie nou vêrder daaraan drink nie, ons gaan later die 2de beker drink.
Hande was seremonie
God het Aaron beveel om sy hande en voete te was voordat hy na die altaar van die Here gegaan het. Ons gaan nou seremonieel ons hande was met die bak wat die gasvrou vir julle gaan bring. Daar is papier vadoeke om jul hande mee af te droog.
Hierdie is ‘n teken aan God dat ons ‘n skoon lewe wil lei. Die aand wat Jesus Sy laaste ete met die dissipels gehad het, het Hy ‘n bak met water geneem en elkeen se voete gewas.
Ongesuurde brood of Matza
Ek het nou 3 ongesuurde brode wat elkeen in hierdie sakkie gesit word, elkeen in sy eie kompartement.
Vir die Jode stel die 3 matza’s vir Abraham, Isak & Jakob voor, die 3 aartsvaders.
Vir ons as Christene stel die 3 brode die Drie-enige God voor – Vader, Seun & Heilige Gees.
Ek gaan nou die middelste matza uithaal en in 2 breek. Die kleinste gedeelte gaan terug in die sak, en groot gedeelte, die afikomen word in doeke toegedraai en begrawe tot later.
Afikomen is ‘n griekse woord wat beteken – dit wat later kom.
Die 4 vrae
Die kinders vra nou 4 vrae (Kies ‘n kind of kinders in die groep)
Hoekom verskil hierdie nag van alle ander nagte?
Alle ander aande eet ons gesuurde en ongesuurde brood. Waarom eet ons vanaand net ongesuurde brood?
Alle ander aande eet ons baie verskilende kruie. Waarom eet ons vanaand net bitter kruie?
Alle ander aande doop ons nie ons kos nie. Hoekom doop ons dit vanaand twee keer?
Alle ander aande sit ons regop as ons eet. Hoekom lê ons vanaand skuins in ons stoele?
Die laaste vraag antwoord ek sommer voor ons anngaan. Slawe het regop gesit en gou geëet want daar was nie tyd vir teruglê en rus nie.
As hulle nie gewerk het nie het hulle geslaap om te rus vir die volgende dag se werk.
As vry mense het ons nie haas nie, en kan ons lê in ons stoele en die aand geniet.
Die Paasfees verhaal
Hierdie Paasfees maal eet ons sodat ons kan onthou hoe God die Israeliete uit Egipte uitgelei het, en om die verhaal vir ons kinders te vertel.
Ek begin ‘n bietjie vêrder terug met God wat ‘n verbond Abraham sluit, ‘n ewige verbond wat nie verbreek kan word nie.
Die verbond is vandag nog in stand. Met die verbond belowe God vir Abraham ‘n nageslag so groot soos die getal sterre in die hemel, en grondgebied.
Abraham en Sarah kry vir Isak, en toe hy ongeveer 30 jaar oud was gee God vir Abraham opdrag om sy seun te offer. Sy enigste seun vir wie hy baie lief is.
Hierdie was ‘n toets vir Abraham wat hy inderdaad geslaag het.
Toe Isak en Abraham naby die plek is om die offer te bring, vra Isak vir hom.
Ons het die vuur en hout, maar waar is die lam vir die brandoffer? En Abraham antwoord vir Isak, “God sal vir Homself die lam vir ‘n brandoffer voorsien, my seun.
Toe Abraham gereed was om Isak te offer en die mes optel, kom ‘n stel uit die hemel wat wat sê. Abraham, Abraham! Moenie jou hand na die seun uitsteek nie, en doen hom niks nie; want nou weet Ek dat jy God vrees en jou seun, jou enigste, van My nie teruggehou het nie. God het gesien dat Abraham geglo het en ‘n ram in Isak se plek gegee.
Jesus was 1500 jaar later die onskuldige lam, God se enigste Seun vir wie Hy baie lief is, wat vir ons sondes aan die kruis gesterf het.
Kom ons kyk na die geslagsregister.
Abraham kry vir Isak, Isak kry vir Jakob, en Jakob se seuns stel die 12 stamme van Israel voor. Jakob se liefling seun Josef, word deur sy broers wat nie van hom hou nie, in ‘n put gegooi en hulle sê vir hul pa dat Josef dood is.
Genesis 37: 31 Toe neem hulle Josef se rok, en hulle slag ‘n bok en steek die rok in die bloed, 32 en hulle stuur die lang rok weg en laat dit na hulle vader bring met die woorde: Dit het ons gevind. Kyk tog goed of dit die rok van u seun is of nie. 33 En hy het dit herken en gesê: Die rok van my seun! ‘n Wilde dier het hom opgeëet. Verskeur, verskeur is Josef!
Josef is toe darem nie dood nie, maar hy is verkoop en beland in Egipte in die tronk.
Na ‘n paar jaar soek die Farao iemand om sy drome uit te lê en die skinker onthou skielik weer dat toe hy lank terug in die tronk was, Josef sy droom vir hom uitgelê het.
Josef word geroep en lê die Farao se droom uit. Hy vertel die Farao dat daar 7 goeie jare voorlê wat opgevolg gaan word deur 7 jare van erge droogte. Die Farao sit vir Josef in beheer van die droogte program.
Jakob en sy hele familie word ook deur die droogte getref, hulle word weer met Josef herenig, en hulle almal trek na Egipte om die droogte te oorleef. Josef gee vir hulle die beste stuk grond in Egipte, die land Gosen, en daar bly hulle en hul nageslag vir die volgende 430 jaar.
Eksodus 1: 6 En Josef het gesterwe, en al sy broers en daardie hele geslag.
7 Maar die kinders van Israel was vrugbaar en het baie geword, en hulle het vermeerder en buitengewoon magtig geword, sodat die land vol was van hulle. 8 Toe staan daar ‘n nuwe koning oor Egipte op wat niks van Josef geweet het nie. 9 Dié het aan sy volk gesê: Kyk, die volk van die kinders van Israel is meer en magtiger as ons.
10 Kom, laat ons ‘n slim plan teen hulle beraam, sodat hulle nie kan vermeerder nie, en as ons in oorlog raak, kan hulle ook nie by ons vyande aansluit en teen ons veg en uit die land optrek nie. 11 Daar is toe opsigters van dwangarbeid oor hulle aangestel om hulle met harde arbeid te verdruk. En hulle het vir Farao die voorraadstede Pitom en Raämses gebou.
Die lewe van die Israeliete as slawe was bitter en swaar. Die koning het selfs besluit om al die Joodse seuns wat gebore word dood te maak. Die dooie seuntjies is deur die soldate op waens gegooi en as die waens vol was, is dit na die Nyl geneem om die dooie babas vir die krokodille gevoer.
Eet die bitter kruie
Elkeen kan nou ‘n stuk van die matza afbreek en die wit pasta op jou bord opskep en dit eet. Die wit pasta is ‘n bitter krui – peperwortel of horseradish.
Die bitter wat julle proe is die bitterheid wat die Israeliete in hul slawerny beleef het.
Ons kyk nou na Moses se geskiedenis
Eksodus 2: 1 En ‘n man uit die huis van Levi het gegaan en ‘n dogter van Levi geneem. 2 En die vrou het swanger geword en ‘n seun gebaar. En toe sy sien dat hy mooi was, het sy hom drie maande lank weggesteek. 3 Maar toe sy hom nie langer verborge kon hou nie, het sy vir hom ‘n mandjie van biesies geneem en dit met lymgrond en pik bestryk; en sy het die seuntjie daarin neergelê en dit in die riete aan die kant van die Nyl gesit. 4 En sy suster het op ‘n afstand gaan staan om te wete te kom wat met hom sou gebeur. 5 En Farao se dogter het na die Nyl afgegaan om ‘n bad te neem, terwyl haar diensmeisies aan die kant van die Nyl heen en weer geloop het. Toe sien sy die mandjie tussen die riete en stuur haar slavin en laat dit haal. 6 Nadat sy dit oopgemaak het, sien sy die kind, en kyk, dit was ‘n seuntjie wat huil! En sy het hom jammer gekry en gesê: Dit is een van die kinders van die Hebreërs. 7 Toe sê sy suster aan die dogter van Farao: Sal ek vir u ‘n pleegmoeder uit die Hebreeuse vroue gaan roep, dat sy vir u die seuntjie kan soog? 8 En Farao se dogter antwoord haar: Ja. En die jongmeisie het geloop en die seuntjie se moeder geroep. 9 Daarop sê Farao se dogter vir haar: Neem hierdie seuntjie en soog hom vir my, en ek sal jou loon gee. En die vrou het die seuntjie geneem en hom gesoog.
Handelinge 7: 22 En Moses is opgelei in al die wysheid van die Egiptenaars en was magtig in woorde en dade. 23 En nadat hy die ouderdom van veertig jaar bereik het, het dit in sy hart opgekom om sy broers, die kinders van Israel, te besoek; 24 en toe hy sien dat iemand onreg aangedoen word, het hy hom verdedig en die man wat mishandel was, gewreek deur die Egiptenaar te verslaan. 25 En hy het gedink dat sy broers sou verstaan dat God hulle deur sy hand redding sou gee; maar hulle het dit nie verstaan nie.
26 En die volgende dag het hy by hulle verskyn terwyl hulle besig was om te veg, en hy het by hulle aangedring om vrede te maak en gesê: Manne, julle is broers; waarom doen julle mekaar onreg aan? 27 Maar hy wat sy naaste onreg aangedoen het, het hom afgestoot en gesê: Wie het jou as ‘n owerste en regter oor ons aangestel? 28 Jy wil my tog nie doodmaak soos jy gister die Egiptenaar doodgemaak het nie? 29 En Moses het op hierdie woord gevlug en ‘n bywoner geword in die land Mídian, waar hy die vader van twee seuns geword het. 30 En toe veertig jaar verby was, het ‘n Engel van die Here aan hom verskyn in die woestyn van die berg Sinai, in die vuurvlam van ‘n doringbos.
Wie was al in ‘n woestyn? Nie een van sandduine nie, maar ‘n emosionele een waar jy is as dit swaargaan met jou. Dis die slegste plek om te wees maar ook die beste plek om te wees, want dis hier waar God met jou werk soos die pottebakker met sy klei. Wat sê die liedjie wat ons lank terug geleer het – vorm my en maak my net soos U wil, op U slegs wag ek, nederig en stil.
‘n Stem kom uit die brande doringbos wat vir hom sê: Moenie nader kom nie en trek jou skoene uit want die grond waarop jy staan is heilige grond. God praat met Moses en vertel hom dat hy gekies is om die Israeliete uit Egipteland uit te lei, en hulle van hul slawerny te red.
Moses skrik hom boeglam en sê vir God dat hy nie kan praat nie en hoekom sal Farao of die Israeliete na hom luister.
God sê vir hom dat Aaron hom kan help praat en dat God by om sal wees.
Moses was 80 jaar oud toe hy deur God geroep is om die Israeliete uit Egipte uit te ly. Ek skat ouderdom is nie vir God ‘n probleem nie.
Moses roep die Israeliete byeen praat met hulle en sê dat God hulle gaan help en dat Hy die volgende beloftes aan hulle maak.
Ek sal julle uitlei uit Egipte uit
Ek sal julle red van die slawerny
Ek sal julle verlos met uitgestrekte arms
Ek sal julle as My volk aanneem
Die volk luister vir Moses maar murmureer onder mekaar, want vir hulle is hierdie storie wat Moses vertel net tyd mors.
Hoe het die Israeliete vir God op die stadium gesien? Vir die laaste 400 jaar was hul in slawerny. God het hulle in die 400 jaar nie gehelp nie. Wat hul wel gesien het was hoe goed dit gaan met die Egiptenare. Dit het gelyk of die Egiptiese gode baie goed na hul mense gekyk het.
Terwyl die Israeliete herkou aan die inlgting wat Moses vir hulle gegee het, praat Moses met Farao en sê vir hom dat God wil he dat hy die Israeliete moet laat gaan sodat hulle vir God ‘n fees kan hou in die woestyn.
Eksodus 5: 4 Maar die koning van Egipte antwoord hulle: Moses en Aäron, waarom hou julle die volk van hulle werk af? Loop na julle werk toe. 5 Verder het Farao gesê: Kyk, die volk van die land is alreeds baie; en julle wil hulle laat ophou met hulle werk?
6 Daarom het Farao dieselfde dag aan die drywers onder die volk en die opsigters bevel gegee en gesê: 7 Julle moet die volk geen strooi meer gee om bakstene te maak soos gister en eergister nie. Laat hulle self gaan en vir hulle strooi versamel.
8 Maar die hoeveelheid bakstene wat hulle gister en eergister gemaak het, moet julle hulle oplê en niks daarvan verminder nie; want hulle is lui..
Eet die Charoset
Breek nou 2 stukke matza af, skep die appelmengsel op een matza en maak ‘n toebrooedjie met die ander matza. Die appelmengsel tussen die matza’s is ‘n prentjie van sement tussen 2 stene.
Exodus 5: 22 Toe gaan Moses weer na die HERE en sê: Here, waarom het U hierdie volk kwaad aangedoen? Waarom het U my tog gestuur? 23 Want vandat ek na Farao gegaan het om in u Naam te spreek, het hy hierdie volk mishandel, en U het u volk glad nie verlos nie.
God antwoord Moses in Exodus 6: 1 Daarop het die HERE Moses geantwoord: Nou sal jy sien wat Ek Farao sal aandoen. Want deur ‘n sterke hand sal hy hulle laat trek, ja, deur ‘n sterke hand gedwing, sal hy hulle uit sy land uitdrywe.
Die 10 plae
Die 10 plae volg nou en ons gaan die 10 plae opsê en met elke plaag moet julle jul vinger in jul wyn druk en ‘n druppel laat val in jul bord. Julle het elkeen ‘n ekstra klein papierbord wat julle hiervoor moet gebruik.
Wanneer ons klaar is sal daar 10 druppels op jul borde wees.
Sê agter my aan en drup die wyn op jul borde
Water in bloed
Paddas
Luise
Steekvliee
Pes onder die diere
Bose swere
Hael
Springkane
Duisternis
Dood van die eers geborenes
Voor die 10de plaag gee God vir Moses en Aaron die volgende opdrag wat hulle aan die volk oordra. Ek gaan ook met elke opdrag vir julle wys wat met Jesus gebeur het voor en tydens Sy kruisiging. Hierdie opdrag voor die 10de plaag is ‘n profesie van wat met Jesus gebeur het.
Op die 10de dag van die 1ste maand moet elke huisgesin ‘n jaaroud lam uitkies, sonder gebrek.
Wat het Jesus op 10 Nisan gedoen net voor Sy kruisiging. (Op lamb selection day) Jesus het op ‘n donkie in Jerusalem ingekom en die volk het hul klere en palm takke op die grond gegooi en Jesus geloof en geprys. Die fariseers het woedend geword en vir Jesus gesê om vir die mense te sê dat hulle moet ophou. Jesus antwoord toe dat as hulle sou ophou die klippe die lofsange sou uitskreeu. Wat het hier gebeur? Jesus het Homself aan die mense voorgestel as die onskuldige lam, deur God gekies, wat nie geslag sou word nie, maar wat vir ons sondes aan die kruis sou sterf.
Hou die lam in jul huise vir 4 dae om seker te maak dat die lam geen gebreke het nie.
Wat het Jesus gedoen in die 4 dae voor Sy kruisiging. Nadat Hy met die intog in Jerusalem Homself aangebied het as die onskuldige lam, het Jesus na die tempel gegaan en die tafels omgegooi van die geldskieters wat daar gekoop en verkoop het. Hy het Sy Vader se huis skoon gemaak.
Net soos ons in die begin gesien het die Jode hul huise voor Paasfees skoonmaak van alle suurdeeg.
Vir die vlg 4 dae het Jesus die mense geleer en hulle was verwonderd oor wat Hy gesê het. Geen fout kon met Jesus gevind word in die 4 dae nie.
Op die 14de dag van die 1ste maand moet almal hul lammers slag teen die aand (ongeveer 3 uur die middag)
Jesus was op die 14de dag van die 1ste maand teen 9:00 die oggend al gekruisig. 3:00 die middag toe die lammers geslag is, het Jesus Sy laaste asem uitgeblaas.
Neem ‘n bossie hissop en steek dit in die bloed en stryk dit aan die 2 deurposte en aan die bodrumpel van die huis waar julle die lam gaan eet. Niemand van julle mag uit jul huis gaan tot die more toe nie.
Ons is gered deur Jesus se offer aan die kruis, eens en vir altyd. Ons word beskerm deur die bloed van Jesus.
Exodus 12: 29 “En middernag het die Here al die eersgeborenes in Egipteland getref, van die eersgeborene van Farao af wat op sy troon gesit het, tot die eersgeborene van die gevangene toe wat in die gevangenis was, en al die eersgeborenes van die diere.
30 Toe staan Farao in die nag op, hy en al sy dienaars en al die Egiptenaars, en daar was ’n groot gejammer in Egipte, want daar was geen huis waar geen dooie in was nie. 31 Daarop het hy Moses en Aäron in die nag laat roep en gesê: Maak julle klaar, trek weg onder my volk uit, julle sowel as die kinders van Israel, en gaan dien die Here soos julle gespreek het. 32 Neem ook julle kleinvee en julle beeste saam soos julle gespreek het, en gaan weg en seën my ook. 33 En die Egiptenaars het by die volk sterk aangehou — om hulle gou uit die land uit te stuur. Want hulle het gesê: Ons is almal dood! 34 Toe neem die volk hulle deeg voordat dit ingesuur was, met hulle bakskottels, in hulle mantels toegebind, op die skouers. 35 En die kinders van Israel het gehandel volgens die woord van Moses: hulle het van die Egiptenaars silwergoed en goue goed en klere geëis; 36 en die Here het aan die volk guns verleen in die oë van die Egiptenaars, en dié het hulle versoek ingewillig. So het hulle dan die Egiptenaars berowe. 37 En die kinders van Israel het van Raämses na Sukkot weggetrek, omtrent seshonderdduisend te voet, die manne buiten die kinders. 38 En ’n menigte mense van gemengde bloed het ook saam met hulle opgetrek, en kleinvee en beeste — ’n groot hoeveelheid vee.
39 En hulle het van die deeg wat hulle uit Egipte gebring het, ongesuurde koeke gebak; want dit was nie ingesuur nie, omdat hulle uit Egipte uitgedryf is, sodat hulle nie kon vertoef nie en ook geen padkos vir hulle klaargemaak het nie. 40 En die tyd wat die kinders van Israel in Egipte gewoon het, was vierhonderd-en-dertig jaar. 41 En ná verloop van vierhonderd-en-dertig jaar, op daardie selfde dag, het al die leërskare van die Here uit Egipteland uitgetrek. 42 Dit is ’n nag om plegtig onderhou te word tot eer van die Here, omdat Hy hulle uit Egipteland uitgelei het. Dit is dié nag van die Here om plegtig onderhou te word by al die kinders van Israel in hulle geslagte. – Die dag is 15 Nisan!
Die Israeliete slaan laer op by die rooi see en kom agter dat Farao hulle agtervolg, en hulle word baie bang. Want nou is die vyand agter hulle en die see is voor hulle, waarnatoe nou.
Moses se vir die volk: Moenie bevrees wees nie, staan vas en aanskou die verlossing van die Here wat hy vandag gaan doen.
Moses neem toe sy staf, en steek dit uit oor die see, en see beweeg na links en na regs sodat hulle op droe grond deurloop.
Toe die laaste van die mense se voete op die ander kant van die wal raak, steek Moses weer sy staf uit oor die droeë grond en die see maak toe bo-oor die Egiptenare wat hul agtervolg.
Doop en eet die pietersielie
Neem nou elkeen ‘n stukkie pietersielie en doop dit in die bakkie sout water, doop dit weer en eet dit. Die eerste doop was vir die Israeliete wat deur die see geloop het, die 2de doop is die see wat toegemaak het oor die Egiptenare. Die soutwater is trane van hartseer van die Israeliete wat gevloei het oor hul swaar omstandighede tydens hul slawerny.
Die 2de beker
Neem jul 2de beker wyn – die beker van verlossing
Ons dink hiermee terug aan die verlossing van slawerny.
Persoon 2, sê asb vir ons die seëning vir die 2de beker.
Geseënd is U, o Here onse God, Koning van die heelal wat ons van slawerny gered het.
Julle kan nou die 2de beker drink.
Nou is dit tyd vir die feesmaal wat vir ons voorberei is.
Ete
2de Helfte van die aand
Ek hoop almal het lekker geëet.
Ons is nou reg om met die 2de helfte van die aand te begin. Ons gaan nou na die nagmaal kyk en ek wil he julle moet seker maak elkeen het nog ongesuurde brood, om ‘n happie te eet en maak ook seker dat jul glase genoeg sap het vir die 3de beker.
Die fees van Ongesuurde Brood is 7 dae lank. Dit begin sononder 15 Nisan en eindig op 21 Nisan. Die 1ste dag en die 7de dag van die fees moet ‘n heilige vierdag wees. Geen werk mag op die dae gedoen word nie, behalwe om kos te maak.
Jesus het Sy laaste asem uitgeblaas op 14 Nisan, 3 uur die middag. Die lammers van al die families is tussen 3 uur en 5 uur die middag van 14 Nisan geslag. Hierdie dag staan ook bekend as die voorbereidings dag.
Teen sonder, wat die tyd van die jaar in Jerusalem glo ongeveer 5 uur is, is die lammers gereed om gebraai te word vir aandete. Na sononder is ons op die volgende dag
nl: 15 Nisan. So nou is Paasfees verby en die Fees van Ongesuurde Brode begin.
Farao het die Israeliete na middernag, na almal se eergeborenes dood is, beveel om in die vroeë oggend ure Egipte te verlaat om hul God te gaan aanbid. Dit was 15 Nisan en hulle het onder andere die ongesuurde deeg in hul bakskottels saamgeneem. Dit was hul kos vir die volgende 7 dae tot hul deur die Rooi See is.
Ons gaan vanaand ons nagmaal hou met ongesuurde brode.
Die afikomen wat begrawe is.
Ek het vroeer vanaand toe ons begin het hierdie sakkie uitgehaal en 3 ongesuurde brode in elk van die 3 kompartemente gesit. Ek het die middelste een uitgehaal, dit gebreek, dit in doeke toegedraai en weggesteek of begrawe.
Die ongesuurde brood word die afikomen genoem en beteken – dit wat later kom.
Die afikomen word nou uitgehaal waar dit begrawe was, die doeke word afgehaal, want hierdie stel Jesus voor wat opgestaan het uit die dood.
Ek het in die begin gese dat die 3 Ongesuurde brode, die Vader, Seun & Heilige Gees voorstel. Die deel wat Jesus voorstel is die deel wat gebreek, in doeke toegedraai, begrawe is, en weer opgestaan het uit die dood.
Kom ons kyk nou hoe die Matza brood ‘n prentjie is van Jesus in die maak daarvan en hoe dit lyk.
Matza word gemaak sonder enige suurdeeg. Suurdeeg is ‘n prentjie van sonde in die Bybel, so Matza’s is brood sonder sonde – soos Jesus sonder sonde was.
Matza is oortrek met strepe & gate
Ons lees in Jesaja 53 – deur Sy wonde is ons genees.
Die Engels stel dit beter. By His stripes we were healed.
Wat se tipe wond is ‘n ‘stripe’. Dit is die sweep houe wat Jesus moes verduur wat strepe op Sy rug gemaak het.
Die gate is gemaak deur die doringkroon op Jesus se hoof, die spykers in Sy hande en voete, en die swaard wat in Sy sy ingedruk is.
Kom ons kyk nou weer na Jesaja se woorde – deur Sy wonde is ons genees.
Jesaja sê hier dat Jesus se gebreekte liggaam, vir ons gebreekte liggame genesing bring!
So wanneer jy vanaand jou brood eet, eet jy Jesus se genesing.
In Matteus 26: 26 lees ons die volgende.
– En terwyl hulle eet, neem Jesus die brood, en nadat Hy gedank het, breek Hy dit en gee dit aan sy dissipels en sê: Neem, eet, dit is my liggaam.
Jesus sit Homself hier IN die sakrament. Jesus se liggaam is die brood wat gebreek word, en wat die disippels moet eet.
Persoon 3 – sê asb die seëning vir die eet van die brood.
Geseënd is U, o Here onse God, Koning van die heelal, wat brood voortbring uit die aarde
Jesus is begrawe, maar Hy het weer later gekom, dit is wat afikomen beteken. Die brood wat voortgebring word uit die aarde, is ‘n prentjie van Jesus wat uit die dood opgestaan het.
Neem nou jul brood, eet dit, want dit is Jesus se liggaam wat vir jou gebreek is.
Die 3de beker wyn wat na ete gedrink word.
Voor ons die wyn drink wil ek julle eers agtergrond gee oor hoe ‘n Joodse huweliks aanbod in die OT plaasgevind het. Ek doen dit deur ‘n opgemaakte storie te vertel.
Jako praat met sy pa en se vir om dat hy reg is om met Ragel te trou. Sy pa is nogals tevrede met sy keuse want hy ken die familie al vir jare, en hy weet dat Ragel ‘n aanwins vir sy familie sal wees. Die twee neem ‘n bottel wyn en ‘n beker en ry op hul donkiekar na Ragel se huis.
Ragel se ma is besig om skottelgoed te was toe sy Jako en sy pa sien aankom, en sy sien dat Jako ‘n bottel wyn en ‘n beker in sy hand het. Haar hart begin vinnig klop want sy weet wat nou gaan volg. Sy roep haar man en Ragel opgewonde, wys vir hulle wie aankom en die huis is in rep en roer.
Pa gaan alleen uit na buite en die twee pa’s loop die veld in om te gesels en oor die transaksie te onderhandel. Daar moet besluit word op ‘n bruidsprys vir Ragel – labolla! Soms kan die prys BAIE hoog wees. Die 2 mans skud blad en gaan terug huis toe.
Jako gooi wyn in die beker en bied die beker vir Ragel aan wat dit aanvaar en die wyn drink. Hiermee is ‘n kontrak gesluit, en die twee is verloof.
Ragel het die keuse gehad om die beker te weier en NEE te sê vir die bruidegom.
Volgens tradisie gaan Jako nou terug na sy vader se huis om ‘n kamer vir hom en Ragel te bou. Ragel weet nie wanneer die bouwerk klaar gaan wees nie, en sy wag op haar bruidegom. Jako neem ook nie die besluit om te bepaal of die kamer goed genoeg is, sy vader doen inspeksie en sal afteken op die bouwerk wanneer hy tevrede is.
So die bruid wag op haar bruidegom tot hy onverwags met ‘n trompet geklank haar kom haal.
Kom ons bring die storie na die beker wyn wat ons met nagmaal drink.
Jesus is ons bruidegom wat aarde toe gekom het met ‘n huweliks aanbod vir ons. Hy sluit met ons, die kerk, ‘n kontrak, en die kontrak is die Nuwe Testament.
Daar is ook ‘n BAIE DUUR prys betaal vir die kontrak – Jesus is gekruisig.
Die beker wat ons drink met nagmaal herinner ons aan die prys wat Jesus betaal het vir ons,
Sy bruid en dat die Nuwe Testament die kontrak is wat in die transaksie gesluit is.
Jesus neem die beker na ete, so ons weet dit is die 3de beker van die bekers of beloftes. Wat was die 3de belofte nou weer. Ek sal julle verlos met ‘n uitgestrekte arm.
‘n Prentjie van Jesus aan die kruis.
Elke keer wanneer ons met nagmaal die beker kry om die wyn te drink kom ons voor ‘n keuse. Aanvaar ons die huweliksaanbod, ons wys ons dit weg.
Kom ons kyk na Jesus se woorde met Sy laaste Pasga.
Matteus 26: 27 Toe neem Hy die beker, en nadat Hy gedank het, gee Hy dit aan hulle en sê: Drink almal daaruit. 28 Want dit is my bloed, die bloed van die nuwe testament, wat vir baie uitgestort word tot vergifnis van sondes.
Weereens sit Jesus Homself in die sakrament – die wyn is Jesus se bloed wat gedrink moet word.
Persoon 4 – sê asb die seëning vir die drink van die wyn.
Geseënd is U, o Here onse God, Koning van die heelal, Skepper van die vrug van die wingerdstok.
Neem jul bekers en staan!
Jesus het gese: Hierdie beker is die nuwe testament in my bloed; doen dit, so dikwels as julle daaruit drink, tot my gedagtenis.
Die Israeliete hoef nie meer terug te dink aan die uittog uit Egipte wanneer die beker gedrink word nie. Nou dink ons terug aan wat Jesus vir ons aan die kruis gedoen het.
Drink jul 3de beker.
Julle kan weer sit.
4de Beker wyn
Hierdie is die beker van aanneming, God het die Jode as ‘n volk aangeneem, en hy het ons as Christene ook aangeneem.
Jesus het nie die 4de beker wyn gedrink nie, en met goeie rede.
Matteus 26: 29 Maar Ek sê vir julle: Ek sal van nou af nooit meer van hierdie vrug van die wynstok drink nie, tot op daardie dag wanneer Ek dit met julle nuut sal drink in die koninkryk van my Vader.
Wat gaan gebeur in die koninkryk van Jesus se Vader
Openbaring 19: 7 Laat ons bly wees en ons verheug en aan Hom die heerlikheid gee, want die bruilof van die Lam het gekom en sy vrou het haar gereed gemaak.
Ons is nog nie saam met Jesus in die koninkryk van die Vader nie. Dit gebeur nog in die toekoms met Jesus se 2de koms
Kom ons gaan nou terug na ons Seder Fees en kyk wat die Jode op die stadium doen.
Die Jode wag nog vir Elia om terug te kom om Jesus aan die volk te bied.
Ons lees in Maleagi, die laaste boek en laaste hoofstuk van die Ou Testament.
Maleagi: 4: 4 Dink aan die wet van Moses, my kneg, wat Ek hom beveel het op Horeb vir die hele Israel—insettinge en verordeninge. 5 Kyk, Ek stuur julle die profeet Elía voordat die groot en vreeslike dag van die HERE aanbreek
Ons weet dat hierdie gedeelte vorentoe wys na Jesus se 2de koms, en dit het nog nie gebeur nie.
Julle sal sien dat hier op my tafel ‘n plek gedek het wat nie gebruik is nie.
Die plek is vir Elia gedek.
‘n Familielid sal gewoonlik na die voordeur stap om te kyk of Elia daar is.
Wanneer hy nie by die deur is nie, word die verrigtinge afgesluit met die woorde – tot volgende jaar in Jerusalem.
Ek sluit vanaand af met: Kom gou Here Jesus, kom gou!
Openbaring 22: 21 se seëngroet spreek ek uit vir julle almal
Die genade van onse Here Jesus Christus sy met julle almal!
Amen!
Comments