Die geslagsregister van Jesus!
- Regina Torre
- Nov 29, 2024
- 23 min read
Updated: Dec 28, 2024
30 November 2024
LUKAS 3:23a AFR53
En Hy, Jesus, was omtrent dertig jaar oud toe Hy begin leer het;
Dertig was in die Ou Testament die ouderdom wat priesters se bediening begin het. Jesus, soos vele ander voor Hom, was omtrent dertig jaar oud toe Hy die volk begin onderrig het.
van dertig jaar oud en daarbo, tot vyftig jaar, almal wat dienspligtig is, om werk by die tent van samekoms te verrig. NÚMERI 4:3 AFR53
Net so het Dawid se heerskappy ook op die ouderdom van 30 begin.
Dertig jaar was Dawid oud toe hy koning geword het; veertig jaar het hy geregeer. II SAMUEL 5:4 AFR53
Van al die disippels was Lukas die enigste wat nie ‘n Jood was nie, en hy skryf sy evangelie vir nie-Joodse lesers. Manne uit die besnydenis verwys na Joodse mans.
Aristárchus, my medegevangene, groet julle; en Markus, die neef van Bárnabas, oor wie julle bevele ontvang het — as hy by julle kom, ontvang hom — ook Jesus wat Justus genoem word, manne wat uit die besnydenis is. Hulle alleen is my medewerkers vir die koninkryk van God en hulle was 'n troos vir my. KOLOSSENSE 4:10-11 AFR53
Lukas se geslagsregister volg die lyn van Jesus se moeder Maria (Jesus se bloedverwant) deur Dawid se seun Natan en dan heeltemal terug na Adam wat ook nie ‘n Jood was nie.
die seun van Meléas, die seun van Mainan, die seun van Máttata, die seun van Natan, die seun van Dawid, LUKAS 3:31 AFR53
Volgens ou gebruike is geslagsregisters byna altyd deur die vader nagespoor, nie die moeder nie. Dit was 'n probleem in hierdie unieke situasie van 'n maagdelike geboorte.
Lukas se geslagsregister verskil met die van Mattheus vanaf Dawid vorentoe, maar hulle eindig albei met Josef. Die beste verduideliking hiervoor blyk te wees dat Lukas, Maria se lyn (Jesus se bloedlyn) gevolg het, terwyl Mattheus Josef se lyn (Sy wettige geslag deur aanneming) gevolg het.
Lukas het met Josef begin omdat hy die regte vorm gevolg het en geen vroue in sy geslagsregister ingesluit het nie.
Die feit dat Lukas Jesus se geslagsgeskiedenis kon gee, was nie ongewoon nie. Josephus, die geskiedkundige, het sy eie geslagsregister uit die openbare rekords opgespoor volgens sy outobiografie. Dit was ook welbekend dat die beroemde Rabbi Hillel, Jesus se afkoms van koning Dawid kon bewys met verwysing na die openbare registers.
Lukas het sy geslagsregister tot by Adam geneem om te wys dat Jesus aan die hele mensdom behoort het, nie net aan die Joodse volk nie.
1 Desember 2024
LUKAS 3:23b AFR53
en Hy was, soos hulle gemeen het, die seun van Josef, die seun van Eli,
Daar is geen spesifieke Griekse woord vir skoonseun nie, en dus word Josef, die seun van Eli genoem, deur sy huwelik met Maria, Eli se dogter.
Lukas se geslagsregister begin by sy huidige tyd en gaan terug in die geskiedenis. Ek gaan dit andersom bestudeer en by vers 38 begin en terugwerk na vers 24.
LUKAS 3:38 AFR53
die seun van Enos, die seun van Set, die seun van Adam, die seun van God.
Adam (En hoe hy ‘n kontras is van Jesus)
God het op die sesde dag die mens na Sy beeld geskape.
En God het die mens geskape na sy beeld; na die beeld van God het Hy hom geskape; man en vrou het Hy hulle geskape.
Toe sien God alles wat Hy gemaak het, en — dit was baie goed. En dit was aand en dit was môre, die sesde dag. GÉNESIS 1:27, 31 AFR53
Die eerste mens, Adam, het ‘n lewende siel geword nadat God in sy neus die asem van die lewe geblaas het: - So is daar ook geskrywe: Die eerste mens, Adam, het 'n lewende siel geword; die laaste Adam 'n lewendmakende Gees. I KORINTHIËRS 15:45 AFR53
Jesus is die laaste Adam en ook die Seun van God: - En daar kom 'n stem uit die hemele wat sê: Dit is my geliefde Seun in wie Ek 'n welbehae het. MATTHÉÜS 3:17 AFR53
God het vir Adam lewe gegee: - En die Here God het die mens geformeer uit die stof van die aarde en in sy neus die asem van die lewe geblaas. So het dan die mens 'n lewende siel geword. GÉNESIS 2:7 AFR53
Jesus gee vir elkeen wat in Hom glo lewe en oorvloed: - Die dief kom net om te steel en te slag en te verwoes. Ek het gekom, dat hulle lewe en oorvloed kan hê. JOHANNES 10:10 AFR53
Adam, die eerste mens, is uit die aarde en is stoflik. Jesus, die tweede mens is uit die hemel en geestelik: - Die eerste mens was uit die aarde aards, die tweede mens is die Here uit die hemel. I KORINTHIËRS 15:47 AFR53
Adam het as verteenwoordiger van die mensdom sy sonde en die daaropvolgende dood aan ons almal oorgedra: - Daarom, soos deur een mens die sonde in die wêreld ingekom het en deur die sonde die dood, en so die dood tot alle mense deurgedring het, omdat almal gesondig het —. ROMEINE 5:12 AFR53
Aan die ander kant het Jesus wat aan die kruis vir ons sondes gesterf het, ons almal van ons sondes verlos, as ons Hom as ons Verlosser en Saligmaker aanvaar: - Daarom dan, net soos dit deur een misdaad vir alle mense tot veroordeling gekom het, so ook is dit deur een daad van geregtigheid vir alle mense tot regverdigmaking van die lewe. ROMEINE 5:18 AFR53
Adam was 930 jaar oud toe hy gesterf het.
So was dan al die dae van Adam wat hy geleef het, negehonderd-en-dertig jaar, en hy het gesterwe. GÉNESIS 5:5 AFR53
2 Desember 2024
LUKAS 3:38 AFR53
die seun van Enos, die seun van Set, die seun van Adam, die seun van God.
Set - Adam en Eva se derde seun word gebore toe Adam 130 jaar oud was.
Toe Adam honderd-en-dertig jaar oud was, het hy 'n seun verwek na sy gelykenis, na sy ewebeeld, en hom Set genoem. GÉNESIS 5:3 AFR53
Set is gebore nadat Kain vir Abel doodgemaak het, en hy word die persoon wat in Jesus se geslagslyn genoem word.
En Adam het sy vrou weer beken, en sy het 'n seun gebaar en hom Set genoem. Want, het sy gesê, God het my 'n ander kind geskenk in die plek van Abel, omdat Kain hom doodgeslaan het. GÉNESIS 4:25 AFR53
Set het ‘n lang lewe gehad en is eers dood toe hy 912 jaar oud was.
En Set het ná die geboorte van Enos nog agthonderd-en-sewe jaar gelewe. En hy het seuns en dogters gehad. So was dan al die dae van Set negehonderd-en-twaalf jaar, en hy het gesterwe. GÉNESIS 5:7-8 AFR53
Enos - Enos word gebore toe Set 105 jaar oud is en hy is die kleinseun van Adam.
En ook vir Set is 'n seun gebore, wat hy Enos genoem het. Toe het hulle die Naam van die Here begin aanroep. GÉNESIS 4:26 AFR53
Die mense het in Enos se dae die Naam van die Here begin aanroep en ‘n onderskeid begin tref tussen mense van God en die goddeloses.
Enos was 905 jaar oud toe hy dood is.
En Enos het ná die geboorte van Kenan nog agthonderd-en-vyftien jaar gelewe. En hy het seuns en dogters gehad. So was dan al die dae van Enos negehonderd-en-vyf jaar, en hy het gesterwe. GÉNESIS 5:10-11 AFR53
LUKAS 3:37 AFR53
die seun van Metúsala, die seun van Henog, die seun van Jered, die seun van Mehaláleël, die seun van Kenan,
Kenan - Kenan word gebore toe Enos 90 jaar oud was.
Toe Enos negentig jaar oud was, het hy die vader van Kenan geword. GÉNESIS 5:9 AFR53
Kenan sterf op die ouderdom van 910 jaar.
En Kenan het ná die geboorte van Mahalálel nog agthonderd-en-veertig jaar gelewe. En hy het seuns en dogters gehad. So was dan al die dae van Kenan negehonderd-en-tien jaar, en hy het gesterwe. GÉNESIS 5:13-14 AFR53
3 Desember 2024
LUKAS 3:37 AFR53
die seun van Metúsala, die seun van Henog, die seun van Jered, die seun van Mehaláleël, die seun van Kenan,
Mahalálel - Mahalalel word gebore toe sy vader Kenan 70 jaar oud was.
Toe Kenan sewentig jaar oud was, het hy die vader van Mahalálel geword. GÉNESIS 5:12 AFR53
Mahalálel het seuns en dogters gehad en vir 895 jaar gelewe.
En Mahalálel het ná die geboorte van Jered nog agthonderd-en-dertig jaar gelewe. En hy het seuns en dogters gehad. So was dan al die dae van Mahalálel agthonderd-vyf-en-negentig jaar, en hy het gesterwe. GÉNESIS 5:16-17 AFR53
Jered - Jered word gebore toe sy vader Mahalalel 65 jaar oud was.
Toe Mahalálel vyf-en-sestig jaar oud was, het hy die vader van Jered geword. GÉNESIS 5:15 AFR53
Jered het seuns en dogters gehad en op die ouderdom van 962 jaar gesterf.
En Jered het ná die geboorte van Henog nog agthonderd jaar gelewe. En hy het seuns en dogters gehad. So was dan al die dae van Jered negehonderd-twee-en-sestig jaar, en hy het gesterwe. GÉNESIS 5:19-20 AFR53
Henog - Henog word gebore toe sy vader Jered 162 jaar oud was.
Toe Jered honderd-twee-en-sestig jaar oud was, het hy die vader van Henog geword. GÉNESIS 5:18 AFR53
Henog het ook seuns en dogters gehad en hy is vir 365 jaar op aarde. Hy het nie gesterf nie, maar is deur God weggeneem of weggeraap.
En Henog het ná die geboorte van Metúsalag nog driehonderd jaar met God gewandel. En hy het seuns en dogters gehad. So was dan al die dae van Henog driehonderd-vyf-en-sestig jaar. En Henog het met God gewandel; en hy was daar nie meer nie, want God het hom weggeneem. GÉNESIS 5:22-24 AFR53
Henog en Elia is die enigste twee persone in die Bybel wat nie gesterf het nie, maar wat weggeraap is om by God te wees.
En terwyl hulle aldeur loop en spreek, kom daar meteens ‘n wa van vuur met perde van vuur wat skeiding tussen hulle twee maak; en Elía het in die storm na die hemel opgevaar. II KONINGS 2:11 AFR53
Sou daar ‘n rede wees vir die twee om nie te sterf nie? Moontlik! Elia en Henog is moontlik die twee persone wat die twee getuies gaan wees gedurende die eerste helfte van die sewe jaar Verdrukking. Daar word ook bespiegel dat die twee Elia en Moses gaan wees, i.p.v. Henog.
En Ek sal aan my twee getuies gee dat hulle, met sakke bekleed, duisend-tweehonderd-en-sestig dae lank sal profeteer. En wanneer hulle hul getuienis voleindig het, sal die dier wat uit die afgrond opkom, teen hulle oorlog voer en hulle oorwin en hulle doodmaak; OPENBARING 11:3, 7 AFR53
4 Desember 2024
LUKAS 3:37 AFR53
die seun van Metúsala, die seun van Henog, die seun van Jered, die seun van Mehaláleël, die seun van Kenan,
Metúsalag
Metusalag word gebore toe sy vader Henog 65 jaar oud was.
Toe Henog vyf-en-sestig jaar oud was, het hy die vader van Metúsalag geword. GÉNESIS 5:21 AFR53
Hierdie gedeelte begin met 'n raaisel. Metusalag is welbekend as die oudste man in die Bybel en tog het hy voor sy vader gesterf. Hoe kan dit wees?
Die antwoord is dat Henog, die vader van Metusalag, nie gesterf het nie, hy is direk na die hemel opgeneem sonder om deur die dood te gaan.
Dit is interessant dat die oudste profesie in die Bybel deur Henog uitgespreek is. Die profesie is nog voor die vloed van Noag uitgespreek en die onderwerp daarvan is die wederkoms van Christus. Dit word nie in Genesis gevind nie, maar in die voorlaaste boek van die Bybel, Judas.
En Henog, die sewende van Adam af, het ook teen hulle geprofeteer en gesê: Kyk, die Here het gekom met sy heilige tienduisendtalle, om gerig te hou oor almal en al die goddelose mense onder hulle te straf oor al hulle goddelose werke wat hulle goddelooslik gedoen het, en oor al die harde woorde wat die goddelose sondaars teen Hom gespreek het. JUDAS 1:14-15 AFR53
Nog 'n feit oor Henog is dat op die ouderdom van vyf-en-sestig iets baie spesiaal in sy lewe gebeur het. Van daardie dag af, vir meer as driehonderd jaar, het hy met God gewandel. Dit blyk dat toe sy seun gebore is, daar vir hom gesê is dat solank as wat sy seun lewe, die komende oordeel van die vloed (die vloed van Noag) weerhou sou word.
Henog het sy seun genoem deur twee Hebreeuse stamwoorde te gebruik:
- muth, wat ‘sy dood’ beteken, en
- shelac, wat 'n werkwoord is wat ‘bring’ of ‘uitstuur’ beteken.
Die naam Metusalag beteken dus, sy dood sal bring.
Die vloed van Noag het nie as 'n verrassing gekom nie - dit was vir vier geslagte voorspel.
Metusalag, die persoon wat die oudste geword het, sterf op ouderdom 969 jaar.
En hy het seuns en dogters gehad. So was dan al die dae van Metúsalag negehonderd-nege-en-sestig jaar, en hy het gesterwe. GÉNESIS 5:27 AFR53
Hy sterf in dieselfde jaar as wat die vloed gebeur - 1656 v.C.
5 Desember 2024
LUKAS 3:36 AFR53
die seun van Kainan, die seun van Arpágsad, die seun van Sem, die seun van Noag, die seun van Lameg,
Lameg - Lameg word gebore toe sy vader Metusalag 187 jaar oud was.
Toe Metúsalag honderd-sewen-en-tagtig jaar oud was, het hy die vader van Lameg geword. GÉNESIS 5:25 AFR53
Metusalag het ander seuns en dogters gehad en het na Lameg se geboorte nog 782 jaar gelewe.
En Metúsalag het ná die geboorte van Lameg nog sewehonderd-twee-en-tagtig jaar gelewe. En hy het seuns en dogters gehad. GÉNESIS 5:26 AFR53
Lameg is dood toe hy 777 jaar oud was.
So was dan al die dae van Lameg sewehonderd-sewen-en-sewentig jaar, en hy het gesterwe. GÉNESIS 5:31 AFR53
Ons kry al die ouderdomme om verskillende somme te kan maak. Een van die somme is om te bereken dat Metusalag nog gelewe het toe sy seun Lameg dood is.
Noag - Noag word gebore toe sy vader Lameg 182 jaar oud is.
Toe Lameg honderd-twee-en-tagtig jaar oud was, het hy 'n seun verwek en hom Noag genoem, want hy het gesê: Dit is hy wat ons sal troos oor ons werk en oor die moeitevolle arbeid van ons hande wat voortkom uit die aarde wat die Here vervloek het. GÉNESIS 5:28-29 AFR53
Noag se seuns was Sem, Gat en Jafet en hulle word gebore nadat Noag 500 jaar oud was.
En Noag was vyfhonderd jaar oud, en Noag het die vader geword van Sem, Gam en Jafet. GÉNESIS 5:32 AFR53
Noag was 600 jaar oud tydens die vloed.
En Noag was seshonderd jaar oud toe die watervloed oor die aarde gekom het. GÉNESIS 7:6 AFR53
Noag en sy gesin het in die ark ingegaan 7 dae voor die vloed begin het, op die 10de dag van die tweede maand van die seshonderdste jaar van Noag se lewe.
Ná die sewe dae kom toe die waters van die vloed op die aarde. GÉNESIS 7:10 AFR53
Die vloed begin sewe dae later op die 17de dag van die tweede maand in die jaar wat Noag 600 jaar oud was.
In die seshonderdste jaar van die lewe van Noag, in die tweede maand, op die sewentiende dag van die maand, op dieselfde dag, is al die fonteine van die groot watervloed oopgebreek, en die sluise van die hemel is geopen; GÉNESIS 7:11 AFR53
6 Desember 2024
GÉNESIS 7:12AFR53
en die stortreën was op die aarde veertig dae en veertig nagte lank.
Na 40 dae en 40 nagte het Noag en sy vrou en kinders en hulle vroue uit die ark uitgekom. Op die 27ste dag van die tweede maand.
in die tweede maand, op die sewen-en-twintigste dag van die maand, was die aarde droog. En God het met Noag gespreek en gesê: Gaan uit die ark, jy en jou vrou en jou seuns en die vroue van jou seuns saam met jou. GÉNESIS 8:14-16 AFR53
Agt mense kom uit die ark om die wêreld se bevolking weer van voor af te begin.
Van Adam tot by Noag is tien geslagte. As ons na die Hebreeuse betekenis van elk van die tien persone se name in die geslagsregister kyk, is daar ‘n versteekte boodskap.
Adam: (adomah) mens
Set: aangestel
Enos: (van die stamwoord anash, om ongeneeslik te wees) sterflik, broos, ellendig
Kenan: hartseer, klaaglied
Mahalal’el: die geseënde God - mahalal wat geseënd beteken; El is die naam vir God
Jered: (van die werkwoord yaradh) sal afkom
Henog: begin of onderrig
Metusalag: sy dood sal bring—mut, ’n stamwoord wat dood beteken; shalach beteken bring of stuur uit
Lameg: wanhoop (waar ons ons klaaglied kry)
Noag: (afgelei van nacham) troos of rus
Ons kan nou met meer insig na die geslagsregister kyk. Die volgorde—Adam—Set—Enos—Kenan—Mahalaleel—Jered—Henog—Metusalag—Lameg—Noag.
Of die betekenis van hul name uitdruk in ‘n sin:
Die mens [is] aangestel in sterflike hartseer, [maar] die geseënde God sal afkom om te onderrig [dat] sy dood die wanhopige troos of rus sal bring.
Wat leer ons uit hierdie oefening?
Hierdie is 'n opsomming van die Nuwe Testament wat in 'n geslagsregister in Genesis weggesteek is. Dit demonstreer iets wat ons deur die hele Skrif sal teëkom. Elke detail is daar deur ‘n Hoër ontwerp.
Dit sê ook vir ons dat God se verlossingsplan al van voor die grondlegging van die wêreld bepaal is.
Geseënd is die God en Vader van onse Here Jesus Christus wat ons geseën het met alle geestelike seëninge in die hemele in Christus, soos Hy ons in Hom uitverkies het voor die grondlegging van die wêreld om heilig en sonder gebrek voor Hom in liefde te wees, deurdat Hy ons voorbeskik het om ons as sy kinders vir Homself aan te neem deur Jesus Christus, na die welbehae van sy wil, EFÉSIËRS 1:3-5 AFR53
7 Desember 2024
LUKAS 3:36 AFR53
die seun van Kainan, die seun van Arpágsad, die seun van Sem, die seun van Noag, die seun van Lameg,
Sem - Sem was een van die drie seuns van Noag en word altyd eerste genoem. In die geboorteorde was Sem egter die middel kind, soos volg bereken:
• Noag het sy eerste kind gekry toe hy 500 jaar oud was.
En Noag was vyfhonderd jaar oud, en Noag het die vader geword van Sem, Gam en Jafet. GÉNESIS 5:32 AFR53
• Die vloed het begin toe Noag 600 jaar oud was, so sy oudste kind sou toe 100 jaar oud gewees het.
In die seshonderdste jaar van die lewe van Noag, in die tweede maand, op die sewentiende dag van die maand, op dieselfde dag, is al die fonteine van die groot watervloed oopgebreek, en die sluise van die hemel is geopen; GÉNESIS 7:11 AFR53
• Sem se eerste kind is gebore toe hý 100 jaar oud was, twee jaar na die vloed. Hy was dus 98 jaar oud tydens die vloed.
Dit is die stamboom van Sem: Toe Sem honderd jaar oud was, het hy die vader van Arpágsad geword, twee jaar ná die vloed. GÉNESIS 11:10 AFR53
• Aangesien ons weet dat Gam nie die oudste was nie, moes die 100-jarige seun ten tyde van die sondvloed Jafet gewees het.
En Gam, die vader van Kanaän, het sy vader se naaktheid gesien en dit aan sy twee broers daarbuite te kenne gegee.
Toe Noag van sy wyn wakker word en merk wat sy jonger seun hom aangedoen het, sê hy: Vervloek is Kanaän! 'n Kneg van die knegte moet hy wees vir sy broers. GÉNESIS 9:22, 24-25 AFR53
Sem, saam met sy broers en hulle vrouens, het God se opdrag vervul om die aarde weer te begin herbevolk.
Maar julle, wees vrugbaar en vermeerder; wemel op die aarde en vermeerder daarop. Verder het God met Noag en sy seuns by hom gespreek en gesê: Maar Ek, kyk, Ek rig my verbond met julle op en met julle nageslag ná julle, GÉNESIS 9:7-9 AFR53
Noag het Sem bo sy broers geseën.
Verder het hy gesê: Geseënd is die Here, die God van Sem. Maar Kanaän moet sy dienskneg wees. Mag God aan Jafet ruimte verskaf, en mag hy woon in die tente van Sem! Maar Kanaän moet sy dienskneg wees. GÉNESIS 9:26-27 AFR53
Dit was deur Sem dat die beloofde saad wat bestem was om Satan te verbrysel, gekom het.
En Ek sal vyandskap stel tussen jou en die vrou, en tussen jou saad en haar saad. Hý sal jou die kop vermorsel, en jý sal hom in die hakskeen byt. GÉNESIS 3:15 AFR53
Nadat Sem baie kinders verwek het, is hy op die ouderdom van 600 oorlede.
Dit is die stamboom van Sem: Toe Sem honderd jaar oud was, het hy die vader van Arpágsad geword, twee jaar ná die vloed. En Sem het ná die geboorte van Arpágsad nog vyfhonderd jaar gelewe. En hy het seuns en dogters gehad. GÉNESIS 11:10-11 AFR53
8 Desember 2024
LUKAS 3:36 AFR53
die seun van Kainan, die seun van Arpágsad, die seun van Sem, die seun van Noag, die seun van Lameg,
Arpágsad - op die jong ouderdom van 35 word Arpágsad die vader van Selag.
Toe Arpágsad vyf-en-dertig jaar oud was, het hy die vader van Selag geword. GÉNESIS 11:12 AFR53
Nadat Arpagsad die vader van Selag geword het, het hy nog 403 jaar gelewe en ander kinders gehad. As ons somme maak, sien ons dat Arpagsad 438 jaar oud geword.
En Arpágsad het ná die geboorte van Selag nog vierhonderd-en-drie jaar gelewe. En hy het seuns en dogters gehad. GÉNESIS 11:13 AFR53
Soos met ander verse, ondersteun hierdie vers 'n vinnige afname in die mensdom se lewensduur na die vloed.
Terwyl antieke figure soos Noag byna 'n duisend jaar geleef het, sal die geslagte na Abraham gelukkig wees om langer as 'n eeu te lewe.
Kainan - Seun van Arpagsad en vader van Selag volgens Lukas 3:36.
Hierdie Kainan word egter nie in die drie Ou-Testamentiese geslagsregisters genoem nie, en ook nie in enige ou weergawe nie.
En Arpágsad was die vader van Selag, en Selag van Heber. GÉNESIS 10:24 AFR53
Toe Arpágsad vyf-en-dertig jaar oud was, het hy die vader van Selag geword. GÉNESIS 11:12 AFR53
Sem, Arpágsad, Selag, I KRONIEKE 1:24 AFR53
Die naam kom op twee plekke in die Septuagint voor, en sommige veronderstel dat die oorskrywers van Lukas se evangelie die naam ingevoeg het om met die Septuagint saam te stem.
LUKAS 3:35 AFR53
die seun van Serug, die seun van Rehu, die seun van Peleg, die seun van Heber, die seun van Sela,
Selag - volgens Lukas se geslagsregister die seun van Kainan en dan die kleinseun van Arpagsad.
Ons het geen verdere inligting oor Selag (Sela) nie.
9 Desember 2024
LUKAS 3:35 AFR53
die seun van Serug, die seun van Rehu, die seun van Peleg, die seun van Heber, die seun van Sela,
Heber - Die oorsprong van die woord Hebreeus kom vermoedelik van die eienaam Heber, wat in Genesis 10:24 gelys word as die agterkleinseun van Sem en 'n voorvader van Abraham.
En Arpágsad was die vader van Selag, en Selag van Heber. GÉNESIS 10:24 AFR53
Die woord Heber kan ook beteken ‘van die ander kant’ - in daardie geval sou Hebreeus 'n woord wees wat 'n immigrant aandui, wat Abraham beslis was.
En Abram het Sarai, sy vrou, en Lot, sy broerskind, geneem en al hulle besittings wat hulle bymekaargemaak en die slawe wat hulle in Haran verwerf het, en hulle het uitgetrek om na die land Kanaän te gaan en in die land Kanaän gekom. GÉNESIS 12:5 AFR53
Heber het die vader van Peleg geword toe hy 34 jaar oud was en is dood toe hy 464 jaar oud was.
Toe Heber vier-en-dertig jaar oud was, het hy die vader van Peleg geword. En Heber het ná die geboorte van Peleg nog vierhonderd-en-dertig jaar gelewe. En hy het seuns en dogters gehad. GÉNESIS 11:16-17 AFR53
Peleg - Peleg was die seun van Heber en die broer van Joktan. Sy naam, wat verdeel beteken, vertel vir ons wat in sy tyd plaasgevind het. Sy familie het verdeel - die oudstes bly in Mesopotamië, terwyl die jonger geslag na die suide van Arabië trek.
En vir Heber is twee seuns gebore; die naam van die een was Peleg, want in sy dae het die aardbewoners verdeeld geraak; en die naam van sy broer was Joktan. GÉNESIS 10:25 AFR53
Peleg word die vader van Rehu toe hy 30 jaar oud was en is dood op die ouderdom van 239 jaar.
Toe Peleg dertig jaar oud was, het hy die vader van Rehu geword. En Peleg het ná die geboorte van Rehu nog tweehonderd-en-nege jaar gelewe. En hy het seuns en dogters gehad. GÉNESIS 11:18-19 AFR53
Rehu - Rehu word die vader van Serug op die jong ouderdom van 32 jaar. Hy leef nog 207 jaar na Serug se geboorte en sterf op die ouderdom van 239 jaar. Rehu en sy vader Peleg leef altwee vir die tydperk van 239 jaar.
Toe Rehu twee-en-dertig jaar oud was, het hy die vader van Serug geword. En Rehu het ná die geboorte van Serug nog tweehonderd-en-sewe jaar gelewe. En hy het seuns en dogters gehad. GÉNESIS 11:20-21 AFR53
Serug - Serug word die vader van Nahor op 30 jarige ouderdom en leef daarna nog 200 jaar om te sterf op die jong ouderdom, in sy tyd, van 230 jaar.
Toe Serug dertig jaar oud was, het hy die vader van Nahor geword. En Serug het ná die geboorte van Nahor tweehonderd jaar gelewe. En hy het seuns en dogters gehad. GÉNESIS 11:22-23 AFR53
10 Desember 2024
LUKAS 3:34 AFR53
die seun van Jakob, die seun van Isak, die seun van Abraham, die seun van Tera, die seun van Nahor,
Nahor - Nahor is die naam van twee persone in Abraham se familie.
Abraham se oupa, die seun van Serug en die vader van Tera.
Toe Nahor negen-en-twintig jaar oud was, het hy die vader van Tera geword. GÉNESIS 11:24 AFR53
Abraham het twee broers gehad, Nahor en Haran.
Toe Tera sewentig jaar oud was, het hy die vader geword van Abram, Nahor en Haran. GÉNESIS 11:26 AFR53
Nahor is dood op die ouderdom van 148 jaar.
En Nahor het ná die geboorte van Tera nog honderd-en-negentien jaar gelewe. En hy het seuns en dogters gehad. GÉNESIS 11:25 AFR53
Tera - Die seun van Nahor, en vader van Nahor, Haran en Abraham.
Na Haran se dood het Tera met sy gesin uit Ur van die Chaldeërs getrek na die land Kanaän. Terah het om onbekende redes nooit sy bestemming bereik nie, maar het gestop en in Haran gevestig.
En Tera het sy seun Abram geneem en Lot, die seun van Haran, sy kleinseun, en Sarai, sy skoondogter, die vrou van sy seun Abram, en dié het saam met hulle uit Ur van die Chaldeërs getrek om na die land Kanaän te gaan. En hulle het tot by Haran gekom en daar gaan woon. GÉNESIS 11:31 AFR53
Dit is waar Terah op die ouderdom van 205 jaar gesterf het.
En die dae van Tera was tweehonderd-en-vyf jaar, en Tera het in Haran gesterwe. GÉNESIS 11:32 AFR53
Abraham, Isak en Jakob
Die geslagsregisters van Lukas en Mattheus is van Abraham tot en met Dawid presies dieselfde.
LUKAS 3:33 AFR53
die seun van Ammínadab, die seun van Ram, die seun van Hesron, die seun van Peres, die seun van Juda,
Juda, Peres, Hesron, Ram en Ammínadab
LUKAS 3:32 AFR53
die seun van Ísai, die seun van Obed, die seun van Boas, die seun van Salmon, die seun van Nagson,
Nagson, Salmon, Boas, Obed en Isai, die vader van Dawid.
11 Desember 2024
LUKAS 3:31 AFR53
die seun van Meléas, die seun van Mainan, die seun van Máttata, die seun van Natan, die seun van Dawid,
Dawid - Dawid, die seun van Isai, ‘n man na aan God se hart, wat al Sy welbehae gedoen het. Uit koning Dawid se nageslag het God vir Israel, volgens die belofte, Jesus as Verlosser verwek.
En nadat Hy hom afgesit het, het Hy Dawid vir hulle verhef as koning, van wie Hy ook gesê en getuig het: Ek het Dawid, die seun van Ísai, gevind, 'n man na my hart, wat al my welbehae sal doen. Uit die nageslag van hierdie man het God vir Israel, volgens die belofte, Jesus as Verlosser verwek, HANDELINGE 13:22-23 AFR53
Lukas se geslagsregister is anders as die van Mattheus om die volgende probleem uit te skakel.
Die probleem: Die Messias, die koninklike geslag, sou uit die stam van Juda wees.
Die septer sal van Juda nie wyk nie, nòg die veldheerstaf tussen sy voete uit totdat Silo kom; en aan Hom sal die volke gehoorsaam wees. GÉNESIS 49:10 AFR53
Die Messias sou uit die geslag van Dawid wees.
En jou huis en jou koningskap sal bestendig wees tot in ewigheid voor jou; jou troon sal vasstaan tot in ewigheid. II SAMUEL 7:16 AFR53
Die opvolging van die konings van Juda was, met slegs enkele uitsonderings, was 'n goddelose klomp.
Uiteindelik kom ons Jekonja (ook bekend as Johojagin of Gonja) teë wat so sleg is, dat God uiteindelik 'n vloek oor hom uitspreek. Niemand van sy geslag sal op die troon van Dawid sit nie.
Is hierdie man Gonja 'n veragte, verbryselde voorwerp, of 'n ding waar 'n mens geen behae in het nie? Waarom is hy en sy geslag weggeslinger en weggewerp in 'n land wat hulle nie ken nie? o Land, land, land, hoor die woord van die Here! So sê die Here: Skryf hierdie man op as kinderloos, 'n man wat nie voorspoedig sal wees in sy dae nie; want dit sal niemand van sy geslag geluk om te sit op die troon van Dawid en nog oor Juda te heers nie. JEREMIA 22:28-30 AFR53
Die probleem is dat die vloek van Jegónia blykbaar Jesus se reg op die troon van Dawid ongeldig maak. Die Dawidiese Verbond het belowe dat die Messias, die Seun van Dawid, vir ewig op Jerusalem se troon sal regeer. As Jesus ’n afstammeling van Jegónia is, hoe kan Hy dan die Messias wees, aangesien die vloek enige van Jegónia se nageslag verbied om Dawid se troon op te neem?
'n Moontlike oplossing vir die geslagslyn het betrekking op die maagdelike geboorte. Jesus het net een menslike ouer gehad, Maria. Sy ma was van Dawid se geslag deur Dawid se seun Natan en nie Salomo nie, wat Jegónia dus uitsluit.
Josef was Jesus se wettige vader, maar nie Sy biologiese vader nie. Jesus was dus van koninklike bloed deur Maria, en die vloek van Jegónia het by Josef opgehou en is nie aan Jesus oorgedra nie.
12 Desember 2024
LUKAS 3:31 AFR53
die seun van Meléas, die seun van Mainan, die seun van Máttata, die seun van Natan, die seun van Dawid,
Natan - Dawid kry sy agtste seun by Batseba en hulle noem hom Natan. Natan is in Lukas se geslagsregister die seun waardeur Jesus se voorgeslagte vloei. Natan en Salomo is broers van dieselfde moeder, Batseba.
Die volgende seuns is vir hom in Jerusalem gebore: Sima, Sobab, Natan en Salomo, al vier seuns van Batseba dogter van Ammiël, 1 KRONIEKE 3:5 AFR83
Ons weet niks verder van Natan of sy direkte nageslag nie. Die geslagte van Natan tot en met die Babiloniese ballingskap was as volg:
Mattata, Mainan en Meleas.
LUKAS 3:30 AFR53 - die seun van Símeon, die seun van Juda, die seun van Josef, die seun van Jonan, die seun van Éljakim,
Éljakim, Jonan, Josef, Juda, Simeon
LUKAS 3:29 AFR53 - seun van Joses, die seun van Eliëser, die seun van Jorim, die seun van Mattat, die seun van Levi,
Levi, Mattat, Jorim, Eliëser, Joses
LUKAS 3:28 AFR53 - die seun van Melgi, die seun van Addi, die seun van Kosam, die seun van Elmódam, die seun van Er,
Er, Elmodam, Kosam, Addi, Melgi en Nerija in vers 27
LUKAS 3:27 AFR53 - die seun van Jóhanan, die seun van Resa, die seun van Serubbábel, die seun van Seáltiël, die seun van Neríja,
Na die ballingskap is daar weer ‘n ooreenkoms tussen Lukas en Mattheus se geslagsregisters met twee persone, Sealtiël en Serubbabel. Ons weet niks van Sealtiël nie, behalwe dat hy die vader van Serubbabel is.
In die tweede jaar van koning Daríus, op die eerste dag van die sesde maand, het die woord van die Here deur die diens van die profeet Haggai gekom tot Serubbábel, die seun van Seáltiël, die goewerneur van Juda, en tot Josua, die seun van Jósadak, die hoëpriester, en gesê: HAGGAI 1:1 AFR53
Serubbabel is 'n Babiloniese naam wat nakomelinge van Babilon beteken. As goewerneur van Juda is Serubbabel aangestel as een van die aanvanklike leiers wat toesig gehou het oor die heropbou van die Jerusalem tempel met die hulp van Josua, die hoëpriester.
En Jésua, die seun van Jósadak, met sy broers, die priesters, en Serubbábel, die seun van Seáltiël, met sy broers, het klaargemaak en die altaar van die God van Israel gebou om daar brandoffers op te offer soos geskrywe staan in die wet van Moses, die man van God. ESRA 3:2 AFR53
13 Desember 2024
LUKAS 3:26 AFR53
die seun van Maät, die seun van Mattatías, die seun van Sémeï, die seun van Josef, die seun van Juda,
Na Serubbabel tot en met Josef en Maria het ons net die name wat Lukas in sy geslagsregister gee.
Van vers 27: Resa en Johanan
Vers 26: Juda, Josef, Semeï, Mattatias, Maät.
die seun van Mattat, die seun van Levi, die seun van Melgi, die seun van Janna, die seun van Josef, die seun van Mattatías, die seun van Amos, die seun van Nahum, die seun van Esli, die seun van Nággai, LUKAS 3:24-25 AFR53
Vers 25: Naggai, Esli, Nahum, Amos, Mattatias
Vers 24: Josef, Janna, Melgi, Levi, Mattat
LUKAS 3:23 AFR53
En Hy, Jesus, was omtrent dertig jaar oud toe Hy begin leer het; en Hy was, soos hulle gemeen het, die seun van Josef, die seun van Eli,
Josef, die seun van Eli - Hier word eintlik verwys na Josef, die skoonseun van Eli, want Eli was die vader van Maria.
Jesus se geslagsregister deur sy moeder, wat hom wonderbaarlik verwek het, is ‘n vervulling van die profesie wat reeds in Genesis gegee is. Dat Jesus die saad van die vrou was, wat die kop van die slang vermorsel.
En Ek sal vyandskap stel tussen jou en die vrou, en tussen jou saad en haar saad. Hý sal jou die kop vermorsel, en jý sal hom in die hakskeen byt. GÉNESIS 3:15 AFR53
Sewentien verse in die Nuwe Testament beskryf Jesus as die seun van Dawid. Maar, die vraag ontstaan, hoe kan Jesus die seun van Dawid wees as Dawid ongeveer 1 000 jaar voor Jesus gelewe het?
Die antwoord is dat Jesus (die Messias) die vervulling van die profesie van die nageslag van Dawid was.
En jou huis en jou koningskap sal bestendig wees tot in ewigheid voor jou; jou troon sal vasstaan tot in ewigheid. II SAMUEL 7:16 AFR53
Jesus is die beloofde Messias, wat beteken dat Hy uit die geslag van Dawid moes wees.
Mattheus se geslagsregister gee die bewys dat Jesus, in Sy menslikheid, 'n direkte afstammeling van Abraham en Dawid was deur Josef, Jesus se wettige vader.
Die geslagsregister in Lukas volg Jesus se geslagslyn deur Sy moeder, Maria na koning Dawid.
Jesus is 'n afstammeling van Dawid, eerstens deur aanneming deur Josef, en tweedens deur bloed deur Maria.
aangaande sy Seun wat gebore is na die vlees uit die geslag van Dawid. ROMEINE 1:3 AFR53
Comments