Die geslagsregister van Jesus!
- Regina Torre
- Oct 29, 2024
- 62 min read
Updated: Nov 29, 2024
30 Oktober 2024
MATTHÉÜS 1:1 AFR53
Die geslagsregister van Jesus Christus, die seun van Dawid, die seun van Abraham:
My Kersfees Bybelstudie vir 2025 gaan kyk na elke persoon wat genoem word in die geslagsregisters van Mattheus sowel as Lukas om sodoende Jesus Christus se afkoms en herkoms na te spoor.
Die evangelie van Mattheus is geskryf deur ‘n Jood, vir Joodse lesers. Mattheus begin sy geslagsregister dus met die eerste Jood: Abraham!
Jesus Christus:
Die woord Christus is 'n Griekse woord wat gesalfde beteken. Die Hebreeuse woord vir Christus is Messias. Daarom word Jesus óf die Messias óf die Christus genoem, wat beide gesalfde beteken.
Die Jode praat van die Messias en Christene praat van Jesus Christus. In die ou tyd, toe konings en priesters vir hul amp afgesonder was, is hulle met olie gesalf. Om te salf, beteken dus dikwels dieselfde as om in te wy, of om tot 'n amp af te sonder. Daarom word gesê dat diegene wat so afgesonder is, gesalf is, of die gesalfdes van God is.
Jesus is deur God afgesonder om Koning, Hoëpriester en Profeet van Sy volk te wees. Oliesalwing was boonop veronderstel om ‘n teken te wees van die invloed van die Heilige Gees, en aangesien God aan Jesus, die Gees sonder maat gegee het, word hy veral die Gesalfde van God genoem.
Die seun van Dawid:
Die woord seun onder die Jode het 'n groot verskeidenheid betekenisse gehad. Dit beteken letterlik seun, of kleinseun, of 'n afstammeling. In hierdie konteks beteken dit 'n afstammeling van Dawid, of iemand wat uit die geslag van Dawid was.
Dit was belangrik om die geslagsregister van Jesus tot by Dawid na te spoor, want die belofte was gemaak dat die Messias van Dawid se familie sou wees, en al die Jode het verwag dat dit so sou wees. Dit sou dus onmoontlik wees om 'n Jood te oortuig dat Jesus die Messias is, tensy daar gewys kon word dat hy van Dawid afstam.
Kyk, daar kom dae, spreek die Here, dat Ek vir Dawid 'n regverdige Spruit sal verwek, en as Koning sal Hy regeer en verstandig handel en reg en geregtigheid doen in die land. JEREMIA 23:5 AFR53
Die seun van Abraham:
Die afstammeling van Abraham. Die belofte is ook aan Abraham gemaak.
Nou is aan Abraham die beloftes toegesê en aan sy saad. Hy sê nie: En aan die sade, asof dit op baie sien nie, maar op een: En aan jou saad, dit is Christus. GALÁSIËRS 3:16 AFR53
Die Jode het verwag dat die Messias van Abraham sou afstam, en dit was dus belangrik om die geslagsregister ook tot by hom na te volg. Alhoewel Jesus van nederige geboorte was, was Hy tog ‘n afstammeling van die mees roemryke voorvaders.
Abraham, ook genoem die vader van die gelowiges, en Dawid, ‘n psalm skrywer, krygsman en koning van die volk van God, was albei onder Jesus se voorvaders. Uit hierdie twee persone, die vroomste en voortreflikste, het die Here Jesus afgestam.
31 Oktober 2024
MATTHÉÜS 1:2a AFR53
Abraham was die vader van Isak, en ……….
Abram se vader was Tera en hy het drie seuns gehad: Abram, Nahor en Haran.
En dit is die stamboom van Tera: Tera het die vader geword van Abram, Nahor en Haran, en Haran van Lot. GÉNESIS 11:27 AFR53
Abram en sy familie kom oorspronklik uit Ur van die Chaldeërs. Abram se broer Haran sterf terwyl sy vader nog geleef het, in Ur van die Chaldeërs.
En Haran het gesterwe terwyl sy vader Tera nog geleef het, in sy geboorteland, in Ur van die Chaldeërs. GÉNESIS 11:28 AFR53
Joshua vertel dat Tera en sy familie ongelowige heidene was.
Toe sê Josua aan die hele volk: So sê die Here, die God van Israel: Oorkant die Eufraat het julle vaders van ouds gewoon — Tera, die vader van Abraham en die vader van Nahor, en hulle het ander gode gedien. JOSUA 24:2 AFR53
Abram en sy broer Nahor het altwee vir hul vroue geneem. Huwelike tussen nabye familielede was op hierdie tydstip toegelaat, maar nie huwelike tussen diegene met dieselfde moeder nie. Abram se vrou was Sara en Nahor se vrou was Milka. Abram en Nahor se broer Haran se kinders was Lot, Milka en Jiska. Milka het met haar oom Nahor getrou.
En Abram en Nahor het vir hulle vroue geneem. Die naam van Abram se vrou was Sarai, en die naam van Nahor se vrou was Milka, die dogter van Haran, die vader van Milka en die vader van Jiska. GÉNESIS 11:29 AFR53
Sara, Abram se vrou, was ook sy halfsuster. Hulle het dieselfde pa maar verskillende ma’s gehad. Ons leer die feit toe Abram aan koning Abimeleg moes verduidelik hoekom hy Sara as nie as sy vrou kon neem nie.
En sy is ook werklik my suster; sy is my vader se dogter, maar nie my moeder se dogter nie; en sy het my vrou geword. GÉNESIS 20:12 AFR53
Sara se skande om onvrugbaar te wees word in sy eie vers genoem. Ons weet dat haar situasie op ‘n laat ouderdom sou verander, maar al wat sy weet is dat sy nie kan doen wat haar skoonsuster Milka kan doen nie - om swanger te word en kinders te kry.
En Sarai was onvrugbaar, sy het geen kind gehad nie. GÉNESIS 11:30 AFR53
God praat met Abram en beveel hom om te trek uit Ur van die Chaldeërs na ‘n land wat Hy nog sal aanwys. Abram trek met sy familie, maar stop eers by Haran tot die dood van sy vader Tera.
En Tera het sy seun Abram geneem en Lot, die seun van Haran, sy kleinseun, en Sarai, sy skoondogter, die vrou van sy seun Abram, en dié het saam met hulle uit Ur van die Chaldeërs getrek om na die land Kanaän te gaan. En hulle het tot by Haran gekom en daar gaan woon. GÉNESIS 11:31 AFR53
Tera sterf in Haran op ouderdom tweehonderd en vyf jaar.
En die dae van Tera was tweehonderd-en-vyf jaar, en Tera het in Haran gesterwe. GÉNESIS 11:32 AFR53
1 November 2024
GÉNESIS 12:4 AFR53
Toe het Abram weggetrek soos die Here hom gesê het, en Lot het saam met hom getrek. En Abram was vyf-en-sewentig jaar oud by sy vertrek uit Haran.
Abram is belangrik, want God het ‘n onvoorwaardelike verbond met hom gesluit wat vandag nog van krag is. God belowe vir Abram ‘n ontelbare nageslag en ‘n spesifieke stuk grond.
Hierdie kontrak of eensydige verbond is 'n ooreenkoms tussen twee partye, maar net een van die twee partye moet iets doen. Niks word van die ander party vereis nie. Die Abrahamitiese verbond is 'n onvoorwaardelike verbond en ons kry dit in Genesis 12:1–3.
En die Here het aan Abram gesê: Gaan jy uit jou land en uit jou familie en uit jou vader se huis, na die land wat Ek jou sal wys. En Ek sal jou 'n groot nasie maak en jou seën en jou naam so groot maak, dat jy 'n seën sal wees. En Ek sal seën diegene wat jou seën, en hom vervloek wat jou vervloek; en in jou sal al die geslagte van die aarde geseën word. GÉNESIS 12:1-3 AFR53
Genesis 15 gee vir ons die seremonie wat die onvoorwaardelike verbond bekragtig. Abram moet verskillende diere bymekaar maak, dit in die helfte sny en die helftes teenoor mekaar neerlê.
En Hy antwoord hom: Neem vir My 'n driejaaroud vers en 'n driejaaroud bokooi en 'n driejaaroud ram en 'n tortelduif en 'n jong duif. En hy het dit alles vir Hom gebring en dit middeldeur gedeel en die helftes teenoor mekaar gelê; maar die voëls het hy nie verdeel nie. Toe kom daar roofvoëls op die dooie diere af, maar Abram het hulle weggejaag. GÉNESIS 15:9-11 AFR53
Abram raak aan die slaap nadat hy die voorbereiding gedoen het.
En toe die son wou ondergaan, val daar 'n diepe slaap op Abram, en kyk, skrik en groot duisternis het hom oorval. GÉNESIS 15:12 AFR53
God se alleen optrede dui daarop dat die verbond hoofsaaklik Sy belofte is. God verbind Homself aan die verbond, en Abram hoef niks te doen nie.
En ná sononder, toe dit heeltemal donker was, gaan daar 'n rokende oond en vurige fakkel tussen dié stukke vleis deur. Op dié dag het die Here met Abram 'n verbond gesluit en gesê: Aan jou nageslag gee Ek hierdie land, van die rivier van Egipte af tot by die groot rivier, die Eufraatrivier: die Keniete en Kenissiete en Kadmoniete en Hetiete en Feresiete en Refaïete en Amoriete en Kanaäniete en Girgasiete en Jebusiete. GÉNESIS 15:17-21 AFR53
Abram se naam verander na Abraham wat nog ‘n bevestiging is van God se verbond met hom om Abraham die vader van ‘n menigte van nasies te maak.
Toe Abram negen-en-negentig jaar oud was, het die Here aan Abram verskyn en vir hom gesê: Ek is God, die Almagtige; wandel voor my aangesig, dan sal jy opreg wees. Daarom sal hulle jou nie meer Abram noem nie, maar jou naam sal wees Abraham, want Ek maak jou 'n vader van 'n menigte van nasies. En Ek sal my verbond oprig tussen My en jou en jou nageslag ná jou in hulle geslagte as 'n ewige verbond, om vir jou 'n God te wees en vir jou nageslag ná jou. GÉNESIS 17:1, 5, 7 AFR53
2 November 2024
GÉNESIS 17:16 AFR53
En Ek sal haar seën en jou uit haar ook 'n seun gee; ja, Ek sal haar seën, sodat sy tot nasies sal word; konings van volke sal uit haar voortkom.
Na Abram se intog in Kanaän het God hom 'n erfgenaam deur sy vrou Sarai belowe. Sarai se naam word verander na Sara, want sy sal vir Abraham ‘n seun gee, en konings van volke sal uit haar voortkom. Abraham het nie geglo dat hy en Sara op hul oudag nog kinders kon baar nie, maar God het ander planne gehad, en Isak is gebore.
Toe antwoord God: Voorwaar, jou vrou Sara sal vir jou 'n seun baar, en jy moet hom Isak noem; en Ek sal my verbond met hom oprig as 'n ewige verbond vir sy nageslag ná hom. GÉNESIS 17:19 AFR53
‘n Hele paar jaar later word Abraham getoets. Die toets was baie werklik: Abraham moes vir Isak aan God teruggee. As ‘n toets was dit ontwerp om Abraham se geloof te beproef. Ismael is weggestuur, en nou na ‘n lang gewag moes Isak aan God teruggegee word …..
Na hierdie dinge het God Abraham op die proef gestel en aan hom gesê: Abraham! En hy antwoord: Hier is ek! Toe sê Hy: Neem jou seun, jou enigste, wat jy liefhet, Isak, en gaan na die land Moría en offer hom daar as brandoffer op een van die berge wat Ek jou sal aanwys. GÉNESIS 22:1-2 AFR53
Neem jou seun, jou enigste, wat jy liefhet en offer hom as ‘n brandoffer! – hierdie woorde hoor ons weer in die Nuwe Testament, en is ‘n mooi prentjie van wat vêr in Abraham se toekoms gaan gebeur.
Want so lief het God die wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê. JOHANNES 3:16 AFR53
Die verhaal van Isak wat geoffer moet word is ‘n prentjie of ‘n kleedrepetisie van Jesus se dood en opstanding.
Abraham het teen dié tyd al ‘n paar lesse geleer en hy wikkel nou wanneer God met hom praat. Die volgende oggend vroeg maak hy klaar, saal sy esel op en neem Isak en twee dienaars saam met hom. Abraham het hout gekap vir die brandoffer wat hy moet uitvoer en die groepie pak die reis aan na die plek wat God vir hom aanwys.
Daarop het Abraham die môre vroeg klaargemaak en sy esel opgesaal en twee van sy dienaars en sy seun Isak saam met hom geneem; en hy het hout gekloof vir ‘n brandoffer en opgestaan en na die plek gegaan wat God hom aangewys het. GÉNESIS 22:3 AFR53
Drie dae stap hulle en Abraham sien die plek van vêr af. Hy beveel die dienaars om met die esel te bly en te wag dat hy en Isak terugkom.
Op die derde dag toe slaan Abraham sy oë op en sien die plek van ver af. GÉNESIS 22:4 AFR53
Op die derde dag ………. waar in die Nuwe Testament gebeur iets op die derde dag!
Toe open Hy hulle verstand om die Skrifte te verstaan. En Hy sê vir hulle: So is dit geskrywe, en so moes die Christus ly en op die derde dag uit die dode opstaan, LUKAS 24:45-46 AFR53
Ons geloofsbelydenis sê ook vir ons: ……… ek glo in Jesus Christus, Sy enig gebore seun, onse Here. Wat ontvang is van die Heilige Gees, gebore is uit die maagd Maria, wat gely het onder Pontius Pilatus, gekruisig is, gesterf het, en begrawe is en neergedaal het na die hel. Wat op die derde dag weer opgestaan het uit die dode ………
3 November 2024
GÉNESIS 22:5-6 AFR53
En Abraham sê aan sy dienaars: Bly julle hier met die esel; ek en die seun wil daarheen gaan om te aanbid en dan na julle terugkom. En Abraham het die hout vir die brandoffer geneem en dit op sy seun Isak gesit, en die vuur en die mes in sy hand geneem. So het hulle twee dan saam geloop.
Abraham sê vir sy twee dienaars om te bly en met die esel vir hulle te wag.
Net so het Jesus se disippels ‘n esel gekry wat vir hulle gewag het, en dit na Jesus gebring.
En toe hulle naby Jerusalem gekom en Bétfagé aan die Olyfberg bereik het, stuur Jesus twee dissipels uit en sê vir hulle: Gaan na daardie dorp reg voor julle, en dadelik sal julle ‘n eselin vind wat vasgemaak is, en ‘n vul by haar. Maak haar los en bring hulle vir My. MATTHÉÜS 21:1-2 AFR53
Isak was op die stadium nie meer ‘n kind nie, hy was heel moontlik in sy dertigs. Die twee, Abraham en Isak loop saam in ooreenstemming. Abraham sit die hout vir die brandoffer op Isak, en hyself dra die vuur en die mes.
En Hy het sy kruis gedra en uitgegaan na die sogenaamde Hoofskedelplek, in Hebreeus Gólgota, JOHANNES 19:17 AFR53
Isak praat met sy pa want daar is iets wat hom pla. Hy vra vir Abraham, ons het die vuur en die hout, maar waar is die lam vir die brandoffer. Goeie vraag, want ‘n brandoffer het ‘n dier nodig om te offer.
Abraham antwoord: God sal vir Homself die lam vir ‘n brandoffer voorsien, my seun. Sy antwoord is dat God sal voorsien, en die twee loop vêrder saam, einde van storie?
Toe spreek Isak met sy vader Abraham en sê: My vader! En hy antwoord: Hier is ek, my seun! En hy sê: Hier is die vuur en die hout, maar waar is die lam vir ‘n brandoffer? En Abraham antwoord: God sal vir Homself die lam vir ‘n brandoffer voorsien, my seun. So het hulle twee dan saam geloop. GÉNESIS 22:7-8 AFR53
Kom ons kyk bietjie dieper na Abraham se antwoord. God sal vir Homself – Homself word met ‘n hoofletter geskryf. God self sal die brandoffer wees, deur Sy Seun Jesus, vêr in Abraham se toekoms, te voorsien!
Abraham het geweet dat hy besig is om ‘n profesie uit te beeld. Hy het geweet dat God sy seun Isak vir hom sal teruggee, selfs al moet hy uit die dode opgewek word, want hoe anders sal hy ‘n groot nageslag he. So Abraham het net geglo en gedoen wat God hom beveel het.
Deur die geloof het Abraham, toe hy op die proef gestel is, Isak geoffer; ja, hy wat die beloftes ontvang het, het sy eniggeborene geoffer, aan wie gesê is: In Isak sal jou nageslag genoem word — want hy het gereken dat God mag het om selfs uit die dode op te wek; daaruit het hy hom ook, om so te spreek, terug ontvang. HEBREËRS 11:17-19 AFR53
Abraham doen soos hy beveel is. Hulle is op die plek wat God aangewys het, en Abraham bou die altaar en lê die hout reg. Ons kry hier net die feite, nie die emosie nie.
Abraham bind sy seun Isak, sit hom op die altaar, bo-op die hout, en hy steek sy hand uit met die mes om sy seun te slag……..
Toe hulle kom op die plek wat God hom aangewys het, het Abraham daar die altaar gebou en die hout reggelê; daarna het hy sy seun Isak gebind en hom op die altaar bo-op die hout gesit. Toe steek Abraham sy hand uit en neem die mes om sy seun te slag. GÉNESIS 22:9-10 AFR53
4 November 2024
ROMEINE 8:32 AFR53
Hy wat selfs sy eie Seun nie gespaar het nie, maar Hom vir ons almal oorgegee het, hoe sal Hy nie saam met Hom ons ook alles genadiglik skenk nie?
Maar, die engel van die Here roep vanuit die hemel en sê: Abraham, Abraham! Moenie jou hand na die seun uitsteek nie, en doen hom niks nie.
Maar die Engel van die Here het na hom van die hemel af geroep en gesê: Abraham, Abraham! En hy antwoord: Hier is ek! En Hy sê: Moenie jou hand na die seun uitsteek nie, en doen hom niks nie; want nou weet Ek dat jy God vrees en jou seun, jou enigste, van My nie teruggehou het nie.” GÉNESIS 22:11-12 AFR53
Abraham is getoets en hy slaag die toets met ere kleure! Die engel van die Here sê vir hom: want nou weet Ek dat jy God vrees en jou seun, jou enigste, van My nie teruggehou het nie.
En toe Abraham sy oë opslaan, sien hy meteens ‘n ram wat agter in die bos met sy horings vasgeraak het. En Abraham het gegaan en die ram geneem en dit as brandoffer in die plek van sy seun geoffer. En Abraham het dié plek genoem: Die Here sal voorsien! Sodat vandag nog gesê word: Op die berg van die Here sal dit voorsien word. GÉNESIS 22:13-14 AFR53
God voorsien! Abraham slaan sy oë op en sien die plaasvervanger vir sy seun – ‘n ram wat agter in ‘n bos met sy horings vassit. Abraham neem die ram, offer dit in die plek van sy seun as ‘n brandoffer vir God, en hy noem die plek: Die Here sal voorsien!
Die naam is gepas, want Abraham het geweet hy het ‘n profetiese uitbeelding gemaak van iets soortgelyk wat vêr in die toekoms gaan gebeur.
Nou kyk ons kortliks na Isak se lewensgeskiedenis. Abraham gee vir sy dienskneg opdrag om vir Isak ‘n vrou te gaan haal in sy geboorteland. Hy doen so en bring Rebekka terug wat Isak ontmoet by die put van Lagai-Roï.
dit is die geskiedenis van Isak, die seun van Abraham: Abraham was die vader van Isak. En Isak was veertig jaar oud toe hy Rebekka, die dogter van Bétuel, die Arameër uit Paddan-Aram, die suster van Laban, die Arameër, vir hom as vrou geneem het. GÉNESIS 25:19-20 AFR53
Rebekka word swanger met tweeling seuns wat erg in haar woel, so erg dat sy God raadpleeg.
En die kinders het teen mekaar gestoot binne-in haar. Toe sê sy: As dit so gaan, waarvoor leef ek dan? Daarop het sy gegaan om die Here te raadpleeg. En die Here het haar geantwoord: Twee nasies is in jou skoot, en twee volke sal van mekaar gaan uit jou liggaam; en die een volk sal sterker wees as die ander volk; en die oudste sal die jongste dien. GÉNESIS 25:22-23 AFR53
Rebekka gee toe geboorte aan twee seuns. Die oudste en eersgebore met sy rooi hare het hulle Esau genoem.
En toe haar dae vervul is dat sy moes baar, was daar 'n tweeling in haar skoot. En die eerste is gebore — rooi, geheel en al soos 'n mantel van hare. Daarom het hulle hom Esau genoem. GÉNESIS 25:24-25 AFR53
Daarna is sy broer Jakob gebore terwyl hy Esau se hakskeen vashou.
En daarna is sy broer gebore, terwyl sy hand die hakskeen van Esau vashou. Daarom het hulle hom Jakob genoem. En Isak was sestig jaar oud by hulle geboorte. GÉNESIS 25:26 AFR53
5 November 2024
GÉNESIS 25:27 AFR53
En die seuns het opgegroei: Esau het ‘n ervare jagter geword, ‘n man van die veld; maar Jakob was ‘n vredeliewende man wat in tente gewoon het.
Esau was ‘n jagter en kom eendag moeg en honger terug huis toe. Jakob het heerlike lensiesop gemaak en Esau vra om daarvan te eet. Jakob is slinks en sê Esau kan ‘n bord lensiesop kry as hy sy eersgeboortereg aan hom verkoop.
Toe sê Esau vir Jakob: Laat my tog sluk van die rooigoed daar, want ek is moeg. Daarom het hulle hom Edom genoem. En Jakob antwoord: Verkoop eers jou eersgeboortereg aan my. GÉNESIS 25:30-31 AFR53
Esau is te moeg en honger om te dink of om te gee oor sy besluit, en verkoop sy eergeboortereg aan sy broer.
En Esau sê: Kyk, ek gaan sterwe, en wat baat die eersgeboortereg my dan? Toe antwoord Jakob: Sweer eers vir my. En hy het vir hom gesweer en sy eersgeboortereg aan Jakob verkoop. GÉNESIS 25:32-33 AFR53
So begin die ratte draai om Rebekka se profesie in plek te kry – die oudste sal die jongste dien!
En Jakob het aan Esau brood en die kooksel lensies gegee; en hy het geëet en gedrink en opgestaan en weggegaan. So het Esau dan sy eersgeboortereg verag. GÉNESIS 25:34 AFR53
Net soos in Abraham se tyd beleef Isak ook ‘n droogte en wil trek na Egipte, maar God sê vir hom hy moet woon in die land wat Hy hom sal aanwys.
Vertoef as vreemdeling in hierdie land, en Ek sal met jou wees en jou seën; want aan jou en jou nageslag sal Ek al hierdie lande gee: Ek sal die eed bevestig wat Ek vir jou vader Abraham gesweer het. GÉNESIS 26:3 AFR53
Verder gee God vir Isak al die beloftes wat ook aan sy vader Abraham gegee was.
En Ek sal jou nageslag vermeerder soos die sterre van die hemel en aan jou nageslag al hierdie lande gee, en in jou nageslag sal al die nasies van die aarde geseën word; omdat Abraham na my stem geluister en my ordening, my gebooie, my insettinge en my wette onderhou het. GÉNESIS 26:4-5 AFR53
God gee vir Isak die volgende beloftes:
- vertoef as vreemdeling in hierdie land,
- Ek sal met jou wees en jou seën,
- hierdie land word aan jou en jou nageslag gegee,
- Ek sal die eed bevestig wat Ek vir jou vader Abraham gesweer het,
- Ek sal jou nageslag vermeerder soos die sterre van die hemel,
- jou nageslag sal al hierdie land ontvang,
- in jou nageslag sal al die nasies van die aarde geseën word!
Hoekom? Omdat Abraham vir God geluister het en omdat Abraham God se ordeninge, gebooie, insettinge en wette onderhou het!
6 November 2024
MATTHÉÜS 1:2b AFR53
Isak die vader van Jakob,
Jakob loop dieselfde pad as Isak. Jakob mag nie vir hom ‘n vrou neem uit die dogters van Kanaän nie, hy moet teruggaan na die huis van sy moeder en uit die dogters van Laban (Rebekka se broer) vir hom ‘n vrou gaan haal.
Toe het Isak Jakob geroep en hom geseën; en hy het hom bevel gegee met die woorde: Jy mag geen vrou neem uit die dogters van Kanaän nie. Maak jou klaar, gaan na Paddan-Aram, na die huis van Bétuel, jou moeder se vader, en gaan haal vir jou daar ‘n vrou uit die dogters van Laban, jou moeder se broer. GÉNESIS 28:1-2 AFR53
En Jakob het uit Berséba vertrek en na Haran gegaan. GÉNESIS 28:10 AFR53
Teen sononder besluit Jakob om te oornag en gebruik ‘n klip vir ‘n kopkussing en gaan slaap.
Daarop kom hy by ‘n plek waar hy die nag oorgebly het, want die son was al onder. En hy neem een van die klippe van die plek en sit dit onder sy hoof, en hy gaan lê en slaap op dié plek. GÉNESIS 28:11 AFR53
Die nag droom hy van ‘n leer wat strek van die aarde tot by die hemel en die engele van God klim op en af met die leer.
En hy het gedroom — daar is ‘n leer op die aarde opgerig waarvan die spits tot aan die hemel reik, terwyl die engele van God daarlangs opgeklim en daarlangs neergedaal het. GÉNESIS 28:12 AFR53
God praat met Jakob in sy droom en identifiseer Homself: Ek is die Here, die God van jou vader Abraham en die God van Isak. God bevestig aan Jakob die beloftes wat aan Abraham en Isak gemaak is, en begin met die belofte van land – die land waarop jy lê en slaap, sal Ek aan jou en jou nageslag gee.
En kyk, die Here het bo-aan gestaan en gesê: Ek is die Here, die God van jou vader Abraham en die God van Isak. Die land waar jy op lê en slaap, sal Ek aan jou en jou nageslag gee; GÉNESIS 28:13 AFR53
Vêrder bevestig God dat Jakob se nageslag sal wees soos die stof van die aarde en dat hy sal uitbrei na die weste en die ooste, en die noorde en die suide. En in Jakob se nageslag sal al die geslagte van die aarde geseën word.
en jou nageslag sal wees soos die stof van die aarde, en jy sal uitbrei na die weste en ooste, en na die noorde en suide; en in jou en jou nageslag sal al die geslagte van die aarde geseën word. GÉNESIS 28:14 AFR53
God belowe ook dat hy Jakob sal bewaar, hom sal terug bring na hierdie land, en hom nooit sal verlaat nie.
En kyk, Ek is met jou, en Ek sal jou bewaar oral waar jy heengaan, en Ek sal jou terugbring in hierdie land; want Ek sal jou nie verlaat nie, totdat Ek gedoen het wat Ek jou gesê het. GÉNESIS 28:15 AFR53
Jakob noem die plek Bet-el en rig ‘n gedenksteen op vir God met die klip waarop hy geslaap het.
Toe staan Jakob die môre vroeg op en neem die klip wat hy onder sy hoof gesit het, en rig dit as ‘n gedenksteen op; en hy het olie daaroor uitgegiet. En hy het die plek Bet-el genoem; maar die naam van die stad was tevore Lus. GÉNESIS 28:18-19 AFR53
7 November 2024
MATTHÉÜS 1:2c AFR53
en Jakob die vader van Juda en sy broers;
Wat jy saai sal jy maai! Jakob het bedrieg om sy eersgeboortereg te kry, en nou word hy bedrieg deur sy oom Laban. Laban het twee dogters, Lea (die oudste) en Ragel (die jonger en mooier sussie). Jakob is lief vir Ragel en kom ooreen met Laban om sewe jaar verniet vir hom te werk om met haar te trou.
Toe Jakob Ragel sien, die dogter van Laban, sy moeder se broer, en die vee van Laban, sy moeder se broer, loop Jakob nader en rol die klip weg van die opening van die put, en hy laat die vee drink van Laban, sy moeder se broer. GÉNESIS 29:10 AFR53
Na die sewe jaar verby is vra Jakob dat Ragel na hom gebring moet word, maar die aand neem Laban sy dogter Lea en bring haar vir Jakob. Jakob kom eers die volgende oggend agter dat hy gekul is en die ‘verkeerde’ sussie is nou sy vrou.
Toe Jakob vir Laban vra hoekom hy hom bedrieg het, is sy antwoord dat dit hul gewoonte is dat die oudste eerste sal trou. Die woorde moes hom terugneem na die dag toe hy sy oudste broer se eersgeboortereg ontvang het.
En Laban antwoord: Dit is hier by ons nie die gewoonte om die jongste voor die oudste weg te gee nie. Hou die volle bruilofsweek met haar; dan sal ons jou die ander een ook gee vir die diens wat jy nóg sewe jaar by my moet volbring. GÉNESIS 29:26-27 AFR53
Laban sê vir Jakob dat hy die volle bruilofsweek met Lea moet hou. In daardie tyd het die huwelikseremonie ‘n week lank geduur wat begin het by die huweliksnag, en Jakob moet die week met Lea, nou sy vrou, deursien. Die wortel wat vir hom voorgehou word is dat hy Ragel as vrou sal kry na die huweliksweek met Lea, en dan sal hy nog sewe jaar vir Laban moet werk.
En Jakob het so gedoen: hy het die volle bruilofsweek met haar gehou. Toe gee hy sy dogter Ragel aan hom as vrou. En Laban het aan sy dogter Ragel sy slavin Bilha gegee as slavin vir haar. En hy het ook by Ragel ingegaan en Ragel ook meer liefgehad as Lea. En hy was by hom nóg sewe jaar in diens. GÉNESIS 29:28-30 AFR53
Lea is in ‘n liefdelose huwelik met Jakob, maar die Here sorg vir haar. Lea word swanger met Jakob se eerste seun Ruben, terwyl Ragel op die stadium onvrugbaar is. Lea kry nog drie seuns vir Jakob: Simeon, Levi en Juda.
Ragel het jaloers geraak en haar slavin Bilha vir Jakob as vrou gegee om namens haar kinders te kry. Bilha die slavin het twee seuns: Dan en Naftali.
Ragel en Lea is skynbaar in ‘n kompetisie, en Lea gee haar slavin Silpha vir Jakob as vrou om namens haar kinders te kry. Silpha se twee seuns is: Gad en Aser.
Lea se seun Ruben pluk vir sy ma liefdesappels wat Ragel graag wil he. Ragel onderhandel met Lea en sê dat Jakob vir die aand by haar kan slaap in ruil vir die liefdesappels. God het Lea se gebede verhoor en sy kry nog drie kinders by Jakob: Issaskar, Sebulon en ‘n dogter Dina.
God het ook aan Ragel gedink en sy het swanger geraak en haar eerste seun se naam is Josef.
8 November 2024
GÉNESIS 35:9-10 AFR53
Toe verskyn God weer aan Jakob, by sy terugkoms uit Paddan-Aram, en Hy seën hom; en God sê vir hom: Jou naam is Jakob; jy sal verder nie Jakob genoem word nie, maar Israel sal jou naam wees. En Hy het hom Israel genoem.
Terug in Kanaän verskyn God vir die vyfde keer in sy lewe aan Jakob en bevestig Sy beloftes met hom. God self seën vir Jakob en sê vir hom sy naam is nie meer Jakob nie maar Israel.
Israel (Jakob) word nie net geseën nie, maar God se beloftes aan Abraham en Isak word nou vir Israel (Jakob) bevestig. Israel (Jakob) moet vrugbaar wees en vermeerder, en ‘n nasie, ja menigte nasies sal van hom afstam. Selfs konings sal van Israel (Jakob) afstam.
Verder sê God vir hom: Ek is God, die Almagtige. Wees vrugbaar en vermeerder. ‘n Nasie, ja, ‘n menigte van nasies, sal van jou afstam, en konings sal uit jou lendene voortkom. GÉNESIS 35:11 AFR53
Dan die groot belofte van land. Die land wat God aan Abraham en aan Isak belowe het, word nou ook vir Israel (Jakob) en sy nageslag na hom gegee. Die land waaroor vandag nog baklei word is Israel (die nasie) se land, want dit is wat God belowe het.
En die land wat Ek aan Abraham en Isak gegee het, sal Ek aan jou gee; en aan jou nageslag ná jou sal Ek die land gee. GÉNESIS 35:12 AFR53
God is klaar met sy beloftes aan Israel en vaar op na die hemel.
Toe het God van hom af opgevaar op die plek waar Hy met hom gespreek het. GÉNESIS 35:13 AFR53
Ragel is swanger met haar laaste kind en dit is ‘n baie moeilike bevalling.
Daarna het hulle van Bet-el af weggetrek. En toe daar nog ‘n kort ent pad was om by Efrat te kom, moes Ragel baar; en sy het dit swaar gehad by die bevalling. GÉNESIS 35:16 AFR53
Ragel lewe lank genoeg om te sien dat sy ‘n seun vir Jakob gekry het en sy noem hom Ben-oni wat beteken ‘seun van my smart’. Maar Israel het hom Benjamin genoem wat beteken ‘seun van my regterhand’
En terwyl sy dit swaar het by die bevalling, sê die vroedvrou vir haar: Wees nie bevrees nie, want dit is ook ‘n seun vir u. En toe haar siel uitgaan — want sy het gesterwe — noem sy hom Ben-Oni. Maar sy vader het hom Benjamin genoem. GÉNESIS 35:17-18 AFR53
Die seuns van Israel was altesaam twaalf:
Die seuns van Lea was: Ruben, die eersgeborene van Jakob, daarna Símeon en Levi en Juda en Íssaskar en Sébulon.
Die seuns van Ragel: Josef en Benjamin.
En die seuns van Bilha, die slavin van Ragel: Dan en Náftali.
En die seuns van Silpa, die slavin van Lea: Gad en Aser.
Dit is die seuns van Jakob wat vir hom in Paddan-Aram gebore is.
GÉNESIS 35:23-26 AFR53
9 November 2024
GÉNESIS 38:2 AFR53
En Juda het daar die dogter van 'n Kanaänitiese man gesien met die naam van Sua; en hy het met haar getrou en by haar ingegaan.
Heel anders as sy voorvaders, het Juda met ‘n vrou uit Kanaän getrou. Hierdie huwelik met 'n
Kanaäniet het Juda se familie amper verwoes. Ondertrouery met die Kanaäniete is vroeër vermy, maar nie hier nie. Juda se vrou Sua, het vir hom drie seuns gegee, Er, Onan en Sela. Er het met Tamar getrou, maar hy het sleg gedoen in God se oë, en daarom het hy gesterf.
En Juda het vir Er, sy eersgeborene, 'n vrou geneem, en haar naam was Tamar. Maar Er, die eersgeborene van Juda, het die Here mishaag. Daarom het die Here hom laat sterwe. GÉNESIS 38:6-7 AFR53
Volgens die gebruik van die Levitiese Wet van die huwelik moes die tweede seun, Onan,
met Tamar, die weduwee van sy broer trou om ‘n nageslag vir sy broer groot te maak. Onan het egter die wet herhaaldelik vir seksuele bevrediging gebruik en God het toe ook sy lewe geneem.
Maar Onan het geweet dat die nageslag nie syne sou wees nie; daarom het hy, elke keer as hy by die vrou van sy broer ingaan, dit op die grond verderwe om vir sy broer geen nageslag te gee nie. GÉNESIS 38:9 AFR53
Volgens die Levitiese Wet moes Tamar nou met die volgende seun trou, maar omdat Sela nog jonk was het Juda geweier om hom aan sy skoondogter, Tamar, te gee. Hy het selfs geweier nadat Sela groter was.
Toe sê Juda vir Tamar, sy skoondogter: Bly 'n weduwee in die huis van jou vader totdat my seun Sela groot is. Want hy het gedink: Anders sterwe hy ook soos sy broers! So het Tamar dan gaan woon in die huis van haar vader. GÉNESIS 38:11 AFR53
Tamar het gevoel sy sal die reg in eie hande moet neem as sy die regte van die Levitiese Wet wou benut. Sy het voorgegee dat sy een van die godsdienstige prostitute is, en het Juda mislei om onwettige verhoudings met haar te hê.
Toe trek sy die klere van haar weduweeskap uit en bedek haar met 'n sluier en draai haar toe; en sy het gaan sit by die ingang van Enaim wat op die pad na Timna lê. Want sy het gesien dat Sela groot geword het, maar sy was aan hom nie as vrou gegee nie. GÉNESIS 38:14 AFR53
Met die belofte dat hy 'n bok vir betaling sou stuur, het hy as pand sy seëlring (wat aan 'n koord om sy nek gehang het) en sy staf by haar gelos.
Weereens is daar skande in Jakob se familie - hierdie keer deur sy Kanaänitiese skoondogter!
Ná omtrent drie maande het hulle Juda laat weet en gesê: Tamar, jou skoondogter, het gehoereer, en sy is ook swanger deur hoerery! En Juda sê: Bring haar uit, dat sy verbrand kan word. GÉNESIS 38:24 AFR53
Tamar het egter die hef in die hand en toon haar bewyse aan haar skoonvader.
Terwyl sy uitgebring word, laat sy haar skoonvader dit weet: By die man aan wie hierdie dinge behoort, is ek swanger. En sy het gesê: Kyk tog mooi aan wie hierdie seëlring en bandjies en staf behoort. GÉNESIS 38:25 AFR53
Tamar het die reg gewen om die moeder van Juda se kinders te wees.
En Juda het dit herken en gesê: Sy het reg teenoor my, want ek het haar mos nie aan my seun Sela gegee nie. En hy het haar verder nie meer beken nie.GÉNESIS 38:26 AFR53
10 November 2024
GÉNESIS 49:1 AFR53
Daarna het Jakob sy seuns geroep en gesê: Kom bymekaar, dat ek julle kan verkondig wat julle aan die einde van die dae sal wedervaar.
Jakob is op sy sterfbed, en dit is tyd om sy seën aan sy seuns oor te dra.
Hy begin met Ruben, die eersgebore seun. Ruben het gemeenskap met sy pa se byvrou, Bilha, wat ook Ragel se slavin was. As gevolg hiervan verloor hy sy eersgeborereg.
Ruben, jy is my eersgeborene, my krag en die eersteling van my sterkte; die vernaamste in hoogheid en die vernaamste in mag! Opbruising soos van waters — jy sal die vernaamste nie wees nie, want jy het die bed van jou vader beklim; toe het jy dit ontheilig. Hy het my bed beklim. GÉNESIS 49:3-4 AFR53
Die volgende twee seuns in die rangorde van geboorte was Simeon en Levi. In Genesis 34 lees ons van 'n voorval waar Jakob se dogter, Dina, deur 'n man van Sigem verkrag is. Simeon en Levi het wraak geneem op die hele stad, al die mense doodgemaak en hul rykdom geplunder. Die insident het hul gediskwalifiseer om vir die eersgeboortereg in aanmerking te kom.
Símeon en Levi is broers. Hulle wapens is werktuie van geweld. Laat my siel nie kom in hulle raad nie, laat my eer nie eens wees met hulle vergadering nie. Want in hul toorn het hulle manne doodgeslaan, en in hulle moedswilligheid het hulle beeste vermink. Vervloek is hulle toorn, want dit is heftig; en hulle grimmigheid, want dit is hard. Ek sal hulle verdeel in Jakob en hulle verstrooi in Israel. GÉNESIS 49:5-7 AFR53
Juda is vierde in lyn en het nie juis ‘n voorbeeldige karakter nie. Hy het 'n winsmotief gehad om van Josef ontslae te raak. Hy het nie mooi met sy skoondogter Tamar gehandel nie. Maar, hy het goeie karakter getoon toe hy ingetree het om homself as plaasvervanger vir Benjamin aan te bied en oor die algemeen is hierdie seën 'n voorbeeld van die rykdom van God se genade aan die onverdiende.
Juda, jy is dit! Jou sal jou broers loof. Jou hand sal op die nek van jou vyande wees; voor jou sal die seuns van jou vader hulle neerbuig. GÉNESIS 49:8 AFR53
Die leeu en die septer verwys na die heersende posisie wat Juda sal hê onder sy broers. Hy het die leierskapaspek van die eersgeborene se erfporsie geërf. Hierdie leiersposisie onder sy broers het beteken dat die uiteindelike konings van Israel uit Juda sou kom en dat die Messias – God se uiteindelike leier – uit die stam van Juda sou kom.
Toe Jakob gesê het: Die septer sal nie van Juda wyk nie, het hy 'n goddelike profesie gegee van veral Een afstammeling wat uit die geslag van Juda sou kom. Jakob sê die stam van Juda sal die septer besit tot die koms van die Een aan wie dit behoort, die Een aan wie al die nasies gehoorsaam sal wees. Silo is 'n titel van die Messias.
Juda is 'n jong leeu; van die roof af het jy opgeklim, my seun. Hy buig hom, hy gaan lê soos 'n leeu en soos 'n leeuin; wie sal hom opjaag? Die septer sal van Juda nie wyk nie, nòg die veldheerstaf tussen sy voete uit totdat Silo kom; en aan Hom sal die volke gehoorsaam wees. GÉNESIS 49:9-10 AFR53
11 November 2024
MATTHÉÜS 1:3a AFR53
en Juda was die vader van Peres en Serag by Tamar,
God het aan Tamar ‘n tweeling gegee, en die geslag van Juda het voortgeduur as gevolg van haar.
En toe sy sou baar, was daar 'n tweeling in haar skoot. GÉNESIS 38:27 AFR53
Tydens die geboorte het die vroedvrou 'n skarlakenrooi draad aan die hand wat eerste uitgekom het gebind, as teken dat hy die eersgeborene was, wat sy met vertroue verwag het hy sou wees.
En terwyl sy baar, het een die hand uitgesteek; en die vroedvrou het dit gegryp en 'n rooi draad om sy hand gebind en gesê: Hierdie een is eerste gebore. GÉNESIS 38:28 AFR53
Maar die hand word toe teruggetrek en sy broer word eerste gebore. Die vroedvrou roep uit hoe kragtig het jy deurgebreek - en so kry die seun toe sy naam, Peres, wat deurbreek beteken.
Maar toe hy sy hand teruggetrek het, word sy broer gebore! En sy sê: Hoe kragtig het jy deurgebreek! En hulle het hom Peres genoem. GÉNESIS 38:29 AFR53
Die tweede van die tweeling is Serag genoem wat opstaan beteken, omdat hy probeer het om eerste te verskyn,
En daarna is sy broer gebore aan wie se hand die rooi draad was. En hulle het hom Serag genoem. GÉNESIS 38:30 AFR53
Die voorkoms van vroue name in die Jode se geslagsregisters was die uitsondering eerder as die reël.
In die geval van Tamar was daar presedente genoeg vir so 'n eervolle vermelding. In die dae van Rut was sy net so ‘n heldin van die stam van Juda as wat Ragel en Lea van die hele Israel was, en haar naam het in die formule van die huweliksseëning gekom.
En mag jou huis word soos die huis van Peres wat Tamar vir Juda gebaar het — uit die nageslag wat die Here jou uit hierdie jong vrou sal gee! RUT 4:12 AFR53
Dit wil uit die taal van die Joodse geskrifte voorkom asof die Jode haar vreemde, en vir ons opstandige geskiedenis, met heel ander gevoelens aanskou.
Vir hulle was Tamar soos een wat, ten spyte van die gevaar van skaamte, en miskien, die dood, die geslag van Juda van vernietiging bewaar het, en daarom waardig geag is om die moeder van konings en profete te wees.
Oor Peres self lees ons niks vêrder nie, maar sy nageslag word genoem onder krygsmanne.
Uit die seuns van Peres was hy die hoof van al die leërowerstes vir die eerste maand. I KRONIEKE 27:3 AFR53
En in Jerusalem het van die kinders van Juda en van die kinders van Benjamin gewoon. Van die kinders van Juda: Atája, die seun van Ussía, die seun van Sagaría, die seun van Amárja, die seun van Sefátja, die seun van Mehaláleël, van die seuns van Peres;
Al die seuns van Peres wat in Jerusalem gewoon het, was vierhonderd-agt-en-sestig, krygsmanne. NEHEMÍA 11:4, 6 AFR53
12 November 2024
MATTHÉÜS 1:3b AFR53
en Peres was die vader van Hesron, en Hesron die vader van Ram,
Geen inligting word gegee oor Hesron of Ram nie, behalwe dat hulle deel vorm van Jesus se stamboom.
MATTHÉÜS 1:4 AFR53
en Ram die vader van Ammínadab, en Ammínadab die vader van Nagson, en Nagson die vader van Salmon,
Geen inligting word gegee oor Ammínadab, Nagson of Salmon nie, behalwe dat hulle deel vorm van Jesus se stamboom.
MATTHÉÜS 1:5a AFR53
en Salmon die vader van Boas by Ragab, en
Nou raak die geslagsregister weer interessant. Salmon is die vader van Boas en dan word Boas se ma ook genoem, nl. Ragab.
Die boek Josua stel ons voor aan een van die mees verstommende heldinne van die Ou Testament. Ragab, die prostituut van die Kanaänitiese stad Jerigo, staan uit vir haar groot geloof en vir haar plek in die geslagsregister van Jesus Christus.
'n Nader ondersoek in die lewe van hierdie merkwaardige nie-Joodse vrou, lei tot dieper insigte in God se plan vir Sy kerk en Sy hantering van individuele gelowiges in genade en barmhartigheid.
Ragab se verhaal word in Josua 2–6 vertel. Hierdie gedeelte beskryf die verowering van die versterkte stad Jerigo deur die Israeliete. Jerigo was op sy dag die belangrikste Kanaänitiese vestingstad in die Jordaanvallei. Dit was 'n vesting direk in die pad van die Israeliete wat pas die Jordaanrivier oorgesteek het.
Voordat Josua die land wes van die Jordaan ingegaan het, het hy twee spioene uitgestuur om die land te ondersoek. Die koning van Jerigo het gehoor dat twee Israelitiese spioene in sy stad was en het beveel dat hulle na hom gebring moes word. Ragab, die vrou by wie die spioene geskuil het, het hulle beskerm deur hulle op haar dak weg te steek.
Sy het vir hulle vertel hoe die burgers van Jerigo bang was vir die Israeliete van die tyd dat hulle die Egiptenare deur die Rooi See wonderwerk verslaan het (sowat 40 jaar tevore). Sy het ingestem om hulle te help ontsnap, mits sy en haar gesin in die komende geveg gespaar word.
Die spioene het ingestem tot haar versoek en vir haar drie voorwaardes gegee om na te kom:
1) sy moet haar huis van die ander onderskei deur 'n skarlakenrooi tou by die venster uit te hang sodat die Israeliete kan weet watter huis om te spaar, 2) haar gesin moet binne die huis wees tydens die geveg en 3) sy mag nie later die spioene oorlewer nie.
Die twee spioene het veilig uit die stad ontsnap en na Josua teruggekeer en berig dat die hele land besig was om te smelt van vrees. Die Israeliete het die Jordaan oorgesteek na Kanaän waar hulle die stad Jerigo beleër het.
Die stad is heeltemal verwoes, en elke man, vrou en kind daarin is doodgemaak. Net Ragab en haar gesin is gespaar. Uiteindelik het Ragab met Salmon, 'n Israeliet uit die stam van Juda, getrou. Haar seun was Boas, die man van Rut. Josef, die wettige vader van Jesus, is haar direkte afstammeling.
13 November 2024
RUT 4:1 AFR53
En Boas het opgegaan na die poort en daar gaan sit. En toe die losser juis daar verbygaan van wie Boas gespreek het, sê hy: Vriend, kom nader, en sit hier! En hy het nader gekom en gaan sit.
Die stadspoort is die plek waar alle transaksies en regsake uitgevoer word en dit is hoekom Boas nou in die poort gaan sit. Hy wag vir iemand, die ander losser, wat toe juis daar verbygaan.
Boas roep die man nader en nooi hom om by hom te kom sit. Boas roep ook tien mans van die oudstes om by hulle te kom sit, natuurlik as getuies.
Die grond moet vir Naomi gekoop of gelos word. Boas vestig die aandag van hierdie man op die feit dat Naomi ‘n bloedverwant nodig het om die grond vir haar los te koop noudat sy terug is in Betlehem.
‘n Lossing transaksie het vier vereistes – Die losser moet:
1) ‘n bloedverwant wees;
2) kan presteer;
3) bereid wees om te presteer; en
4) moet al die betrokke verpligtinge aanvaar.
Die bloedverwant waarmee Boas praat sê hy is bereid om die grond te koop. Boas se moed sak in sy skoene en hy herinner die man dat die transaksie twee verpligtinge het. Die eerste is die grond, en die tweede is die Moabitiese vrou waarmee die man moet trou om so Elimeleg se nageslag voort te sit.
Die kind wat uit so ‘n huwelik gebore word is die wettige erfgenaam van die grond wat nou hier ter sprake is. So die losser staan net in vir die pa wat dood is, en hy betaal vir die grond, maar dit is nooit sy eiendom nie. Gelukkig vir Boas besluit die man toe daarteen.
En die losser sê: Ek kan dit nie vir my los nie, anders bederf ek my erfdeel; neem jy my lossingsreg oor, want ek kan nie los nie. RUT 4:6 AFR53
Die verhaal het ‘n goeie einde met Boas en Rut wat met mekaar trou.
So het Boas Rut dan geneem, en sy het sy vrou geword; en hy het by haar ingegaan, en die Here het vir haar swangerskap gegee, en sy het ‘n seun gebaar. RUT 4:13 AFR53
Die seun wat hier gebore word se naam is Obed. Die einde van die hoofstuk gee vir ons die geslagsregister en toon dat Dawid uit hierdie bloedlyn gebore word. Dit gee natuurlik ook vir ons Jesus se bloedlyn, en dit is een van die redes hoekom die verhaal van Rut belangrik is.
En die buurvroue het hom ‘n naam gegee en gesê: Vir Naómi is ‘n seun gebore! En hulle het hom genoem Obed; hy was die vader van Ísai, die vader van Dawid. RUT 4:17 AFR53
14 November 2024
OPENBARING 3:20 AFR53
Kyk, Ek staan by die deur en Ek klop. As iemand my stem hoor en die deur oopmaak, sal Ek ingaan na hom toe en saam met hom maaltyd hou, en hy met My.
Die boek Rut is profeties in sy geheel en die karakters in die verhaal het elkeen sy eie rol te speel.
– Rut is ‘n prentjie van die kerk,
– Naomi is ‘n prentjie van Israel, en
– Boas is ‘n prentjie van Jesus.
Lees die onderstaande en vervang elke keer die karakter met dit wat hulle voorstel!
Om Rut na Naomi te bring, moes Naomi uit haar land verban word.
– Die Joodse volk is op meer as een geleentheid uit hul land verban (diaspora) en die wêreld ingestuur, en daar het hulle die wêreld ontmoet en ook die kerk.
Wat die wet nie kon doen nie, het genade gedoen.
– Rut besluit om haar rug op haar gode te draai, en Naomi se God te volg.
– Boas besluit om met ‘n vrou van Moab te trou, al word dit deur die wet verbied.
Rut vervang nie Naomi nie.
– Die kerk vervang nie vir Israel nie (vervangings teologie), elke groep het sy eie lot.
Rut leer Boas se weë deur Naomi.
– Rut het ‘n paar van die Joodse wette en gewoontes geleer deur haar ontmoeting met Boas, bv: die wet om vir die armes sorg deur gars op die lande te los en die wet wat voorsiening maak vir ‘n weduwee om weer te trou, met ‘n losser in hierdie geval.
Naomi ontmoet Boas deur Rut.
– Naomi het van Boas geweet, maar hom eers persoonlik ontmoet deur Rut wat hom eerste geleer ken het.
Maak nie saak hoe lief Boas vir Rut was nie, hy moes vir haar wag om die eerste skuif te maak.
– Jesus klop aan die deur, maar Hy wag vir jou om die deur oop te maak.
Boas, en nie Rut nie, konfronteer die Losser.
– Daarom kan Hy ook volkome red die wat deur Hom tot God gaan, omdat Hy altyd leef om vir hulle in te tree. HEBREËRS 7:25 AFR53
15 November 2024
MATTHÉÜS 1:5b AFR53
Boas die vader van Obed by Rut,
Obed was Boas en Rut, die Moabiet, se seun, en hy was Isai se vader en Dawid se oupa. Geen ander inligting word van hom gegee nie.
En die buurvroue het hom 'n naam gegee en gesê: Vir Naómi is 'n seun gebore! En hulle het hom genoem Obed; hy was die vader van Ísai, die vader van Dawid. RUT 4:17 AFR53
MATTHÉÜS 1:5c AFR53
en Obed die vader van Ísai,
Isai se vader was Obed! sy ouma en oupa was Rut en Boas, en sy oumagrootjie was Ragab, die Kanaäniet.
Hy word algemeen aangewys as Isai die Betlehemiet,
Daarna sê die Here aan Samuel: Hoe lank sal jy treur oor Saul, terwyl Ek hom verwerp het om koning te wees oor Israel? Vul jou horing met olie en gaan heen: Ek stuur jou na Ísai, die Betlehemiet, want Ek het onder sy seuns vir My 'n koning uitgesoek. I SAMUEL 16:1 AFR53
maar sy volle titel is die Efratiet van Betlehem Juda.
En Dawid was die seun van dié Efratiet, uit Betlehem-Juda, met die naam van Ísai; hy het agt seuns gehad, en die man was in Saul se dae oud, op jare gekom onder die manne. I SAMUEL 17:12 AFR53
Hy is 'n ou man wanneer ons hom vir die eerste keer ontmoet, met agt seuns en woonagtig in Bethlehem. Dit lyk asof Isai se rykdom bestaan het uit 'n trop skape en bokke wat onder die sorg van Dawid was.
Daarop sê Dawid aan Saul: U dienaar het vir sy vader die kleinvee opgepas, en as daar 'n leeu of 'n beer kom en 'n stuk kleinvee uit die trop wegdra, I SAMUEL 17:34 AFR53
‘n Seun van Isai sou koning word en uit sy nageslag sal ‘n ewige Koning voortspruit.
Maar daar sal 'n takkie uitspruit uit die stomp van Ísai, en 'n loot uit sy wortels sal vrugte dra; JESAJA 11:1 AFR53
En Jesaja sê ook: Die wortel van Ísai sal daar wees, en Hy wat opstaan om oor die nasies te heers, op Hom sal die nasies hoop. ROMEINE 15:12 AFR53
Na Dawid se breuk met Saul het hy sy vader en sy moeder na die land Moab geneem en hulle na die koning gebring, en daar verdwyn hulle uit die rekords van die Skrif. Wie Isai se vrou was, word ons nie vertel nie.
Vandaar gaan Dawid toe na Mispe in Moab en sê aan die koning van Moab: Laat my vader en my moeder tog uitkom by julle totdat ek weet wat God met my wil doen. En hy het hulle voor die koning van Moab gebring, en hulle het by hom gebly al die dae wat Dawid in die bergvesting was. I SAMUEL 22:3-4 AFR53
16 November 2024
MATTHÉÜS 1:6a AFR53
en Ísai die vader van koning Dawid,
Dawid se verhaal is te omslagtig om hier uiteen te sit, so ek gaan kyk hoe Dawid ‘n tipe of voorstelling van Jesus was.
Wanneer ons na Mattheus se geslagsregister kyk leer ons die volgende.
Jesus, ‘n Jood, is ‘n afstammeling van Dawid en Abraham.
Die geslagsregister van Jesus Christus, die seun van Dawid, die seun van Abraham: MATTHÉÜS 1:1 AFR53
Dawid is die enigste persoon in Mattheus se geslagsregister wat as koning aangespreek word, alhoewel hy nie die enigste koning in die geslagsregister is nie. As ‘n afstammeling van ‘n koning gaan Jesus self eendag Koning wees.
Die Here het aan Dawid gesweer in waarheid (Hy sal daarvan nie terugkom nie): Van die vrug van jou liggaam sal Ek laat sit op jou troon. PSALMS 132:11 AFR53
Daar sal Ek vir Dawid 'n horing laat uitspruit; Ek het vir my gesalfde 'n lamp toeberei. Ek sal sy vyande met skaamte beklee, maar op hom sal sy kroon skitter. PSALMS 132:17-18 AFR53
Twee blindes volg Jesus om genesing te ontvang en hulle spreek Hom aan as Seun van Dawid.
En toe Jesus daarvandaan verder gaan, het twee blindes Hom gevolg, terwyl hulle uitroep en sê: Wees ons barmhartig, Seun van Dawid! MATTHÉÜS 9:27 AFR53
Seun van Dawid is ‘n Messiaanse koningstitel. Jesus is juis gekruisig omdat Hy die Koning van die Jode was.
En Pilatus het Hom gevra: Is U die Koning van die Jode? En Hy het geantwoord en vir hom gesê: U sê dit. MARKUS 15:2 AFR53
En dit was die derde uur toe hulle Hom gekruisig het. En die opskrif van sy beskuldiging was bokant Hom geskrywe: DIE KONING VAN DIE JODE. MARKUS 15:25-26 AFR53
Met Jesus se inttog in Jerusalem roep die skare uit: Hosanna vir die Seun van Dawid!
En die skare wat voor geloop en die wat gevolg het, het uitgeroep en gesê: Hosanna vir die Seun van Dawid! Geseënd is Hy wat kom in die Naam van die Here! Hosanna in die hoogste hemele! MATTHÉÜS 21:9 AFR53
Elke Joodse geleerde het geweet dat net die Messias aan die regterhand van God kan sit. Jesus het geglo in die inspirasie en akkuraatheid van die Ou Testamentiese Skrifte, want Hy het gesê dat Dawid hierdie woorde in die Gees gespreek het. As God, is die Messias, Dawid se Here en as mens is Hy Dawid se Seun. Hy is beide die wortel en die nageslag van Dawid.
En toe die Fariseërs saamgekom het, vra Jesus hulle en sê: Wat dink julle van die Christus? Wie se seun is Hy? Hulle antwoord Hom: Dawid s'n. Hy sê vir hulle: Hoe is dit dan dat Dawid Hom in die Gees Here noem as hy sê: Die Here het tot my Here gespreek: Sit aan my regterhand totdat Ek u vyande gemaak het 'n voetbank van u voete? As Dawid Hom dan Here noem, hoe is Hy sy seun? En niemand kon Hom 'n woord antwoord nie; ook het geeneen van daardie dag af dit meer gewaag om Hom vrae te stel nie. MATTHÉÜS 22:41-46 AFR53
17 November 2024
I SAMUEL 16:13 AFR53
Samuel neem toe die horing met olie en salf hom te midde van sy broers, en die Gees van die Here het van dié dag af en verder oor Dawid vaardig geword. En Samuel het klaargemaak en na Rama gegaan.
Dawid word as koning gesalf en die Gees van die Here was met Hom van daardie dag af.
Met Jesus se eerste koms is Hy gedoop, en die Gees van God het soos ‘n duif op Hom gekom.
En nadat Jesus gedoop was, het Hy dadelik uit die water opgeklim, en meteens gaan die hemele vir Hom oop, en Hy sien die Gees van God soos 'n duif neerdaal en op Hom kom. MATTHÉÜS 3:16 AFR53
Met Jesus se tweede koms, is Hy die Koning van die konings en die Here van die here.
En Hy dra op sy kleed en op sy heup die Naam wat geskrywe is: Die Koning van die konings en die Here van die here. OPENBARING 19:16 AFR53
Dawid was ‘n skaap en bok herder vir sy pa Isai.
Verder het Samuel aan Ísai gevra: Is dit al die seuns? En hy sê: Die kleinste is nog oor, en kyk, hy pas skape op. Toe sê Samuel aan Ísai: Stuur en laat hom haal, want ons mag nie om die tafel gaan sit voordat hy hier kom nie. I SAMUEL 16:11 AFR53
Jesus is die goeie Herder wat Sy lewe vir Sy skape aan die kruis afgelê het.
Ek is die goeie herder. Die goeie herder lê sy lewe af vir die skape. JOHANNES 10:11 AFR53
Dawid is in Betlehem Efrata gebore.
En Dawid was die seun van dié Efratiet, uit Betlehem-Juda, met die naam van Ísai; hy het agt seuns gehad, en die man was in Saul se dae oud, op jare gekom onder die manne. I SAMUEL 17:12 AFR53
Jesus is gebore in Betlehem Efrata soos deur die profete uitgespreek is en soos dit gebeur het.
En jy, Betlehem Éfrata, klein om te wees onder die geslagte van Juda, uit jou sal daar vir My uitgaan een wat 'n Heerser in Israel sal wees; en sy uitgange is uit die voortyd, uit die dae van die ewigheid. MIGA 5:1 AFR53
En Josef het ook opgegaan van Galiléa, uit die stad Násaret, na Judéa, na die stad van Dawid, wat Betlehem genoem word, omdat hy uit die huis en geslag van Dawid was, LUKAS 2:4 AFR53
Toe Absalom in opstand gekom het, het Dawid by die Olyfberg opgegaan en geween en daarna het hy in ballingskap weg gegaan.
En Dawid het die hoogte van die olywe opgeklim, terwyl hy aldeur loop en ween; en sy hoof was bedek, en hy het kaalvoet geloop; en al die mense wat by hom was, hulle het elkeen sy hoof bedek en opgegaan en aldeur geween. II SAMUEL 15:30 AFR53
Op die aand wat Jesus deur Judas verraai is, het hy op die Olyfberg opgegaan. Sy siel was diep bedroef tot die dood toe, en omdat hy in angs was, het hy baie vurig gebid met harde krete en trane.
En Hy het vertrek en volgens gewoonte na die Olyfberg gegaan. En ook sy dissipels het Hom gevolg. En toe Hy op die plek kom, sê Hy vir hulle: Bid dat julle nie in versoeking kom nie. En Hy het Hom van hulle afgesonder omtrent so ver as 'n mens met 'n klip kan gooi, en neergekniel en gebid en gesê: Vader, as U tog maar hierdie beker van My wil wegneem! Laat nogtans nie my wil nie, maar u wil geskied! LUKAS 22:39-42 AFR53
18 November 2024
I SAMUEL 17:49 AFR53
en Dawid steek sy hand in die tas en neem 'n klip daaruit en slinger, en hy tref die Filistyn in sy voorhoof, sodat die klip in sy voorhoof indring en hy op sy gesig teen die grond val.
Dawid het Goliat die reus oorwin.
So het Dawid dan die Filistyn oorweldig met 'n slinger en 'n klip. En hy het die Filistyn verslaan en hom gedood alhoewel daar geen swaard in Dawid se hand was nie. I SAMUEL 17:50 AFR53
Jesus het die duiwel (owerhede en magte) oorwin en deur die kruis oor hom geseëvier.
Dawid was die gesalfde van die God van Jakob.
En dit is die laaste woorde van Dawid: Dawid spreek, die seun van Ísai, en die man wat hoog geplaas was, spreek, die gesalfde van die God van Jakob en die lieflike in die sange van Israel: II SAMUEL 23:1 AFR53
Jesus is die gesalfde, die Messias.
Maar Jesus het stilgebly. En die hoëpriester antwoord en sê vir Hom: Ek besweer U by die lewende God dat U vir ons sê of U die Christus, die Seun van God, is? Jesus antwoord hom: U het dit gesê. Maar Ek sê vir u almal: Van nou af sal u die Seun van die mens sien sit aan die regterhand van die krag van God en kom op die wolke van die hemel. MATTHÉÜS 26:63-64 AFR53
God het deur Jesaja die profeet gespreek oor die een op wie se skouer Hy die sleutel van die huis van Dawid sou sit.
En Ek sal die sleutel van die huis van Dawid op sy skouer lê; en hy sal oopmaak, en niemand sal sluit nie; en hy sal sluit, en niemand sal oopmaak nie. JESAJA 22:22 AFR53
Jesus hou die sleutel van Dawid vas.
En skryf aan die engel van die gemeente in Filadelfía: Dít sê die Heilige, die Waaragtige, wat die sleutel van Dawid het, wat oopmaak en niemand sluit nie, en Hy sluit en niemand maak oop nie: OPENBARING 3:7 AFR53
Dawid het geprofeteer dat die Here vir die Here gesê het om aan sy regterhand te sit.
Van Dawid. 'n Psalm. Die Here het tot my Here gespreek: Sit aan my regterhand, totdat Ek u vyande maak 'n voetbank vir u voete. PSALMS 110:1 AFR53
Jesus is aan die regterhand van God verhoog as beide Here en Christus.
Nadat die Here dan met hulle gespreek het, is Hy opgeneem in die hemel en het gaan sit aan die regterhand van God. MARKUS 16:19 AFR53
Nadat Hy dan deur die regterhand van God verhoog is en van die Vader die belofte van die Heilige Gees ontvang het, het Hy dít uitgestort, wat julle nou sien en hoor. HANDELINGE 2:33 AFR53
In ons studie van Dawid as 'n tipe van Christus, het ons die parallelle tussen hulle lewens op soveel maniere gesien. Hulle was beide konings, herders, gebore in Bethlehem, gesalfdes, krygers, magtige manne en veroweraars van reuse.
Albei is vervolg en albei was genadig teenoor hul vyande. Baie van die Psalms is gerig op die Duisendjarige Koninkryk, wat beteken dat hulle uitsien na die koms van Christus, soos Psalms 2, 22, 69, 72, 89, 100, 110, ens. Daar is miskien meer verbande tussen Dawid en Christus as enige ander persoon in die Hebreeuse Geskrifte.
19 November 2024
MATTHÉÜS 1:6b AFR53
en koning Dawid die vader van Salomo by die vrou van Uría,
Daar word nog steeds na Dawid verwys as koning, omdat Jesus as ‘n afstammeling van ‘n koning self eendag Koning gaan wees.
Kyk, daar kom dae, spreek die Here, dat Ek vir Dawid 'n regverdige Spruit sal verwek, en as Koning sal Hy regeer en verstandig handel en reg en geregtigheid doen in die land. JEREMIA 23:5 AFR53
Uria se vrou was Batseba. Selfs die geslagsregister herinner aan Dawid se sonde. Batseba was die mooi vrou wat Dawid van sy dak af gesien het en omdat sy vir hom so mooi was het hy met haar geslaap en sy het swanger geword. Uria was een van Dawid se beste krygers en Dawid het allerhande slim planne probeer maak om die swangerskap nie op hom te wys nie, maar als tevergeefs.
Op die ou einde het Dawid vir Uria teruggestuur na die gevegsveld en hom laat plaas waar die gevegte op hul felste was sodat hy moes sterf aan die hand van die vyand. Uria die Hetiet is doodgemaak, en saam met hom 'n paar ander van Dawid se leër.
Dawid en Batseba het na die routyd verby was, met mekaar getrou en sy het geboorte gegee aan ‘n seun.
Nadat die routyd verby was, het Dawid gestuur en haar in sy huis opgeneem; en sy het sy vrou geword en vir hom 'n seun gebaar. Maar die ding wat Dawid gedoen het, was verkeerd in die oë van die Here. II SAMUEL 11:27 AFR53
'n Vinnige opsomming van Dawid se lewe word in 1 Konings gegee.
omdat Dawid gedoen het wat reg was in die oë van die Here, sonder om af te wyk van alles wat Hy hom beveel het, al die dae van sy lewe, behalwe in die saak van Uría, die Hetiet. I KONINGS 15:5 AFR53
Dawid se bose plan teen die eerbare Uria was 'n klad op 'n andersins skoon rekord. Uria was 'n slagoffer van iemand anders se sonde. Hy dien as 'n voorbeeld van lojaliteit en eer en 'n herinnering dat ons sondes, gevolge buite onsself het.
As gevolg van Dawid se sonde, het God die kind laat siek word, en hy het gesterf.
Toe gaan Natan na sy huis. En die Here het die kind wat die vrou van Uría vir Dawid gebaar het, getref, sodat dit ernstig siek geword het. II SAMUEL 12:15 AFR53
Dawid het groot berou gehad en Psalm 51 is sy belydenis aan God en 'n pragtige gebed vir ons almal wanneer ons sondig.
God het Dawid vergewe, net soos Hy bereid is om ons te vergewe.
As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig. I JOHANNES 1:9 AFR53
Dawid en Batseba het ‘n tweede seun gehad, en hulle het hom Salomo genoem.
Daarna het Dawid sy vrou Bátseba getroos en by haar ingegaan en by haar geslaap. En sy het 'n seun gebaar, en hy het hom Salomo genoem. En die Here het hom liefgehad, II SAMUEL 12:24 AFR53
20 November 2024
I KONINGS 1:46 AFR53
En ook het Salomo op die koninklike troon gaan sit.
Salomo was die derde en laaste koning van die Verenigde Koninkryk van Israel, na hom sou die koninkryke verdeel in Noord (Israel) en Suid (Juda).
Salomo het die boeke Hooglied, Prediker en baie van die boek Spreuke geskryf, en het veertig jaar lank oor Israel regeer.
En die dae wat Salomo in Jerusalem oor die hele Israel geregeer het, was veertig jaar. I KONINGS 11:42 AFR53
Toe Salomo koning word, het hy na God gesoek, en God het hom die geleentheid gegee om te vra wat ook al hy wou hê. Salomo het sy onvermoë om goed te regeer nederig erken en God onselfsugtig gevra vir die wysheid wat hy nodig het om die volk regverdig te regeer. God het dit en as ‘n bonus ook eer en rykdom aan hom gegee.
Ja, selfs wat jy nie begeer het nie, sal Ek jou gee, rykdom sowel as eer, sodat onder die konings niemand soos jy sal wees al jou dae nie. I KONINGS 3:13 AFR53
God het ook aan Salomo vrede gegee van alle kante gedurende die grootste deel van sy heerskappy.
Want hy het geheers oor alles wes van die Eufraat, van Tifsag af tot by Gasa, oor al die konings wes van die Eufraat, en vrede gehad aan alle kante rondom; I KONINGS 4:24 AFR53
Een algemene illustrasie van Salomo se wysheid is sy beoordeling van 'n dispuut oor die identiteit van die ware moeder van 'n babakind (1 Konings 3:16-28). Salomo het voorgestel om die lewende kind in die helfte te deel, wetende dat die ware moeder sou verkies om haar seun eerder aan 'n ander vrou te gee as om hom te laat vermoor.
Toe antwoord die koning en sê: Gee haar die lewendige kind en maak hom in geen geval dood nie: sy is die moeder. I KONINGS 3:27 AFR53
Salomo was nie net wys in sy heerskappy nie, maar het ook groot algemene wysheid gehad. Sy wysheid was in sy dag bekend. Die koningin van Skeba het 1 900 km gereis om die gerugte van sy wysheid en grootsheid te verifieer.
En Salomo het haar al haar woorde verklaar; geen woord was vir die koning te diepsinnig om haar dit te verklaar nie. I KONINGS 10:3 AFR53
Salomo se belangrikste bouprojek was die voltooiing van die Joodse Tempel volgens die instruksies en bepalings van sy vader, Dawid.
En in die vierhonderd-en-tagtigste jaar ná die uittog van die kinders van Israel uit Egipteland, in die vierde jaar van Salomo se regering oor Israel, in die maand Sif — dit is die tweede maand — het hy die huis vir die Here gebou. I KONINGS 6:1 AFR53
Salomo het 700 vroue en 300 byvroue gehad, baie van hulle vreemdelinge wat hom op sy oudag tot openbare afgodery gelei het, wat God baie kwaad gemaak het. God het vir Salomo gesê dat Hy die koninkryk van Hom sou verwyder, maar ter wille van Dawid dit nie gedurende Salomo se leeftyd sou doen nie. Hy het ook belowe om nie die hele koninkryk weg te skeur nie. Intussen het God teëstanders opgewek teen Salomo wat die res van Salomo se lewe moeilikheid veroorsaak het.
Daarna het Salomo met sy vaders ontslaap en is begrawe in die stad van sy vader Dawid; en sy seun Rehábeam het in sy plek koning geword. I KONINGS 11:43 AFR53
21 November 2024
MATTHÉÜS 1:7a AFR53
en Salomo die vader van Rehábeam,
Rehabeam en Jerobeam was albei konings wat in Israel se verdeelde koninkryk regeer het. Rehabeam was een van Salomo se seuns en koning van Juda in die suide. Jerobeam was een van Salomo se voormalige amptenare, 'n Efraimiet, en koning van Israel in die noorde.
Terwyl Salomo nog gelewe het en Jerobeam vir hom gewerk het, het ’n profeet met die naam Ahia vir Jerobeam gesê dat God tien van die twaalf stamme van Israel van Salomo se seun Rehabeam sou wegneem en dit aan Jerobeam sou gee. Hierdie oordeel teen Salomo se huis het gekom omdat hulle God verlaat en afgode aanbid het.
Toe gryp Ahía die nuwe mantel wat hy aangehad het, en skeur dit in twaalf stukke, en hy sê vir Jeróbeam: Neem vir jou tien stukke, want so spreek die Here, die God van Israel: Kyk, Ek gaan die koninkryk uit die hand van Salomo afskeur en aan jou die tien stamme gee; maar die een stam sal syne wees ter wille van my kneg Dawid en ter wille van Jerusalem, die stad wat Ek verkies het uit al die stamme van Israel — I KONINGS 11:30-32 AFR53
Toe Salomo hoor dat God Jerobeam gekies het om te regeer, het die koning probeer om Jerobeam, wat na Egipte gevlug het, dood te maak. Nadat Salomo gesterf het, het sy seun Rehabeam koning geword, en Jerobeam het uit Egipte teruggekeer. Waar Rehabeam 'n ydele en dwase man was, was Jerobeam, ’n magtige dapper man. Jerobeam het Rehabeam gewaarsku om nie dieselfde foute te maak wat sy pa gemaak het deur die volk te swaar te belas om ’n luukse leefstyl te finansier nie. Rehabeam het die raad van die oudstes uitgedaag om die juk van verdrukking te verlig.
en met hulle gespreek volgens die raad van die jongmanne en gesê: Het my vader julle juk swaar gemaak — ék sal by julle juk nog byvoeg; het my vader julle met die sweep getugtig — ék sal julle met gésels tugtig. I KONINGS 12:14 AFR53
Die volk het gereageer op Rehabeam se hardheid deur teen die nuwe koning in opstand te kom en Jerobeam koning oor Israel te maak. Net die stamme van Juda en Benjamin het Rehabeam, seun van Salomo, gevolg. Die ander tien stamme het hulle by Jerobeam geskaar.
Koning Rehabeam het 180 000 krygers bymekaargemaak in ’n poging om die tien stamme terug te neem, maar God het dit verhoed.
So spreek die Here: Julle mag nie optrek en teen julle broers, die kinders van Israel, oorlog voer nie; julle moet omdraai, elkeen na sy huis; want van My het hierdie saak gekom. Hulle het toe geluister na die woord van die Here en weer teruggetrek volgens die woord van die Here. I KONINGS 12:24 AFR53
Koning Rehabeam het toe teruggekeer na Jerusalem, die hoofstad van Juda en Jerobeam het uit Sigem en later van Tirsa in Israel regeer, en so het dit wat die profeet Ahia deur God gespreek het tot vervulling gekom.
Net soos Jerobeam sy mense in die Noordelike Koninkryk van God laat wegdraai het, het Rehabeam sy mense in die Suidelike Koninkryk van God laat wegdraai.
En koning Rehábeam het hom versterk in Jerusalem en geregeer; want Rehábeam was een-en-veertig jaar oud toe hy koning geword het, en het sewentien jaar geregeer in Jerusalem, die stad wat die Here uit al die stamme van Israel verkies het om sy Naam daar te vestig; en die naam van sy moeder was Naäma, die Ammonitiese. En hy het gedoen wat verkeerd was, want hy het nie sy hart gerig om die Here te soek nie. II KRONIEKE 12:13-14 AFR53
En Rehábeam het ontslaap met sy vaders en is begrawe in die stad van Dawid; en sy seun Abía het in sy plek koning geword. II KRONIEKE 12:16 AFR53
22 November 2024
MATTHÉÜS 1:7b AFR53
en Rehábeam die vader van Abía, en Abía die vader van Asa,
Abia het slegs drie jaar in Juda regeer voordat hy gesterf het. Ongelukkig was Abia 'n goddelose koning en het soos sy vader gedoen wat sleg is in die oë van God.
En Abía het ontslaap met sy vaders, en hy is begrawe in die stad van Dawid; en sy seun Asa het in sy plek koning geword. I KONINGS 15:6, 8 AFR53
Asa was Abia se seun en die derde koning van die Suidelike Koninkryk van Juda. Hy het een-en-veertig jaar lank regeer en het gedoen wat goed en reg was in die oë van die Here sy God.
En Asa het ontslaap met sy vaders en gesterwe in die een-en-veertigste jaar van sy regering. II KRONIEKE 16:13 AFR53
MATTHÉÜS 1:8a AFR53
en Asa die vader van Jósafat, en Jósafat die vader van Joram,
Josafat was die seun en opvolger van Koning Asa en hy het sy koningskap reg begin en gedoen wat goed was in God se oë.
En Jósafat het ontslaap met sy vaders en is begrawe by sy vaders in die stad van Dawid; en sy seun Joram het in sy plek koning geword. II KRONIEKE 21:1 AFR53
Joram die seun van Josafat was 32 jaar oud toe hy begin regeer het. Hy het vir vier jaar saam met sy vader regeer en nog agt jaar op sy eie – altesaam twaalf jaar.
Joram het nie in sy pa se voetspore gevolg nie. Hy het met Atalia getrou, die dogter van koning Agab, en hy het 'n bose heerser geword. Maar, ten spyte van koning Jehoram se boosheid, het God sy verbond met Dawid gehou en hom daarvan weerhou om Juda te vernietig.
Joram ontslaap en word begrawe in die stad van Dawid.
En Joram het ontslaap met sy vaders en is by sy vaders begrawe in die stad van Dawid; en sy seun Ahásia het in sy plek koning geword. II KONINGS 8:24 AFR53
Tussen Joram en Ussia laat die stamboom drie name weg:
1) Ahasia die seun van Jeroham was twee en twintig toe hy koning word, en hy regeer vir slegs een jaar. Hy volg Agab na en doen wat verkeerd is in die oë van die Here.
2) Joas word op slegs sewejarige ouderdom die volgende koning, en hy regeer vir veertig jaar. Joas doen wat reg is in die oë van die Here maar ook net terwyl die priester Jojada lewe.
3) Amasia, die seun van Joas van Juda, word koning en hy regeer vir nege en twintig jaar. Hy doen wat reg is in die oë van die Here, maar hou die hoogtes soos sy voorvaders.
As ons 'n rede soek waarom hierdie presiese name weggelaat word, kan ons dit waarskynlik vind in die feit dat hulle van Isebel afstam. Die tweede gebod bepaal dat tot die vierde geslag die kinders van daardie nageslag sou ly vir die sondes van hul ouers.
Jy mag jou voor hulle nie neerbuig en hulle nie dien nie; want Ek, die Here jou God, is 'n jaloerse God wat die misdaad van die vaders besoek aan die kinders, aan die derde en aan die vierde geslag van die wat My haat; EXODUS 20:5 AFR53
Alhoewel hierdie konings se geskiedenis in die Ou Testament weergegee word, word hulle nie in Jesus se geslagsregister opgeneem nie.
23 November 2024
MATTHÉÜS 1:8b AFR53
en Joram die vader van Ussía,
Asarja (ook genoem Ussia) word op sestienjarige ouderdom die volgende koning en regeer vir twee en vyftig jaar. Hy doen wat reg is in die oë van die Here, maar net soos sy pa breek hy ook nie die hoogtes, waar die volk vir God aanbid, af nie.
En Asárja het ontslaap met sy vaders, en hy is begrawe by sy vaders in die stad van Dawid; en sy seun Jotam het in sy plek koning geword. II KONINGS 15:7 AFR53
MATTHÉÜS 1:9 AFR53
en Ussía die vader van Jotam, en Jotam die vader van Agas, en Agas die vader van Hiskía,
Jotam word op die ouderdom van vyf en twintig die koning van Juda, en hy regeer vir sestien jaar. Net soos sy pa en al die konings voor hom skaf hy ook nie die hoogtes af nie, maar vêrder doen hy wat reg is in die oë van die Here.
En Jotam het ontslaap met sy vaders, en hy is begrawe in die stad van Dawid; en sy seun Agas het in sy plek koning geword. II KRONIEKE 27:9 AFR53
Jotam se seun Agas is die volgende koning van Juda. Hy regeer vir sestien jaar en doen wat verkeerd is in die oë van die Here. Net toe ons dink dit gaan goed in Jerusalem!
En Agas het ontslaap met sy vaders en is by sy vaders begrawe in die stad van Dawid, en sy seun Hiskía het in sy plek koning geword. II KONINGS 16:20 AFR53
Hiskia, die seun van Agas, is die volgende koning van Juda en hy regeer vir nege en twintig jaar. Hy doen wat goed is in die oë van die Here net soos sy vader Dawid.
Die tempel in Jerusalem, wie se deure deur Hiskia se eie vader vasgespyker was, is skoongemaak en heropen en die Levitiese priesterskap word heringestel.
Hý het in die eerste jaar van sy regering, in die eerste maand, die deure van die huis van die Here oopgemaak en dit herstel, en die priesters en die Leviete laat inkom en hulle versamel op die Oosplein. II KRONIEKE 29:3-4 AFR53
Die Pasga is ook heringestel as 'n nasionale vakansiedag. Onder Hiskia se hervormings het herlewing na Juda gekom.
En die koning en sy owerstes en die hele vergadering het in Jerusalem besluit om die pasga in die tweede maand te hou, want hulle kon dit op sy tyd nie hou nie, omdat die priesters hulle nie voldoende geheilig en die volk in Jerusalem nie saamgekom het nie. En die saak was reg in die oë van die koning en in die oë van die hele vergadering. II KRONIEKE 30:2-4 AFR53
Omdat koning Hiskia God eerste gestel het in alles wat hy gedoen het, het God hom voorspoedig gemaak. Later word Hiskia baie siek. Jesaja het vir hom gesê om dinge reg te stel en om homself voor te berei om te sterf. Maar, Hiskia het gebid en God gesmeek om hom barmhartig te wees en om te dink aan al die goeie dinge wat hy gedoen het - Hiskia se lewe word met vyftien jaar verleng.
En Ek sal vyftien jaar by jou dae byvoeg en jou en hierdie stad uit die hand van die koning van Assirië red, en ook hierdie stad beskut ter wille van My en my kneg Dawid. II KONINGS 20:6 AFR53
Koning Hiskia sterf en word begrawe in die stad van Dawid.
En Hiskía het ontslaap met sy vaders, en sy seun Manasse het in sy plek koning geword. II KONINGS 20:21 AFR53
24 November 2024
MATTHÉÜS 1:10 AFR53
en Hiskía die vader van Manasse, en Manasse die vader van Amon, en Amon die vader van Josía,
Manasse is die volgende koning, en hy regeer vir vyf en vyftig jaar. Hy doen wat verkeerd is in die oë van die Here en bou weer die hoogtes wat sy vader Hiskia afgebreek het.
Hy het altare gebou vir die hele leër van die hemel en dit in die twee voorhowe van die tempel geplaas. Die slegte koning het ook een van sy seuns lewendig vir Baäl geoffer, en homself opgehou met goëlery, waarseêrs, toordery en die oproep van geeste. Om alles te kroon het hy ‘n gesnede beeld van Asjera gemaak en in die tempel gesit. Manasse het gemaak dat Juda meer kwaad gedoen het as die heiden nasies wat die Here in hul hande gegee het.
Elke aksie het ‘n reaksie! God laat nie met Hom speel nie, en Sy volk gaan wel gestraf word vir die gruwels wat hul gepleeg het. Manasse sterf, maar word nie in die stad van Dawid begrawe nie. Hy word sommer in sy eie tuin begrawe.
En Manasse het ontslaap met sy vaders en is begrawe in die tuin van sy huis, in die tuin van Ussa; en sy seun Amon het in sy plek koning geword. II KONINGS 21:18 AFR53
Amon is die volgende koning en regeer vir slegs twee jaar. Hy doen net soos sy vader wat verkeerd is in die oë van die Here. Amon word saam met sy pa Manasse in die tuin van sy huis begrawe - ook hy het nie ‘n plek in die stad van Dawid nie.
En hy is begrawe in sy graf, in die tuin van Ussa; en sy seun Josía het in sy plek koning geword. II KONINGS 21:26 AFR53
Josia is die volgende koning van Juda en hy regeer vir een en dertig jaar. Josia doen wat goed is in die oë van die Here, en wandel in die weg van sy vader Dawid.
Josia was een van Juda se beste konings. Vrede, voorspoed en hervorming kenmerk sy heerskappy en tydens sy bewind het die wêreldmag se leierskap oorgegaan van Assirië na Babilon.
Koning Josia het soos Hiskia geld ingesamel en die tempel tot sy vorige glorie herstel. Al die heidense beelde en gruwels is uit die tempel verwyder. In die proses om die tempel skoon te maak is ‘n boek gevind wat die sekretaris of skrywer aan die koning voorgelees het. Hiskia het die volk versamel en hulle het Pasga gehou soos beskryf is in die verbondsboek.
Toe gee die koning die hele volk bevel en sê: Hou pasga vir die Here julle God soos geskrywe is in hierdie verbondsboek. Want soos hierdie pasga is daar nie een gehou van die dae van die Rigters af wat Israel gerig het, en gedurende al die dae van die konings van Israel en die konings van Juda nie; II KONINGS 23:21-22 AFR53
Maar, die Here hou by Sy Woord, en bepaal dat Jerusalem wel nog tot ‘n val gaan kom net soos Israel geval het, dit is onafwendbaar.
En die Here het gesê: Ek sal Juda ook van my aangesig verwyder soos Ek Israel verwyder het; en Ek sal hierdie stad Jerusalem verwerp wat Ek verkies het, en die huis waarvan Ek gesê het: My Naam sal daar wees. II KONINGS 23:27 AFR53
Koning Josia is doodgemaak deur die koning van Egipte by Megiddo. Sy dienaars het hom na Jerusalem teruggebring en hom daar begrawe.
“In sy dae het Farao Nego, die koning van Egipte, teen die koning van Assirië opgetrek na die Eufraatrivier; en koning Josía het hom tegemoetgetrek, maar dié het hom gedood by Megíddo net toe hy hom sien. En sy dienaars het hom dood vervoer van Megíddo af en hom in Jerusalem gebring en hom in sy graf begrawe; en die volk van die land het Jóahas, die seun van Josía, geneem en hom gesalf en hom in die plek van sy vader koning gemaak. II KONINGS 23:29-30 AFR53
25 November 2024
MATTHÉÜS 1:11 AFR53
en Josía die vader van Jegónia en sy broers in die tyd van die Babiloniese ballingskap.
Hier is weer 'n ontbrekende skakel tussen Josia en Jegonia of Jojagin. Hier het ons die koning wat saam met die volk in ballingskap ingaan.
Josia het vier seuns gehad. Joahas was die middelste seun en is deur die mense gekies om Josia op te volg. Hy was 23 jaar oud toe hy koning word, maar hy regeer slegs vir drie maande en in die kort rukkie doen hy wat verkeerd is in die oë van die Here.
Toe Farao Nego vir Josia in Megiddo verslaan het, het Juda onder Egiptiese beheer geval en dit is duidelik dat Farao Nego nie vir Joahas as koning materiaal gesien het nie.
Farao Nego maak nou vir Josia se ander seun Eljakim koning en verander sy naam na Jojakim. Die feit dat Nego die konings aanstel en hul naam kan verander, wys dat hy in beheer van Juda is. Joahas word na Egipte geneem en hy sterf daar.
En Farao Nego het Éljakim, die seun van Josía, koning gemaak in die plek van sy vader Josía en sy naam verander in Jójakim, maar Jóahas saamgeneem. So het hy dan in Egipte gekom en daar gesterwe. II KONINGS 23:34 AFR53
Jojakim het elf jaar lank regeer en het gedoen wat verkeerd is in die oë van die Here.
Nebukadneser verower eers Egipte, en in 605 v.C. beleër hy Juda en die eerste van drie groepe mense word in ballingskap na Babilon geneem. Daniel en sy vriende is deel van die eerste groep en ons lees in die boek Daniel van die gevangeneskap.
In die derde jaar van die regering van Jójakim, die koning van Juda, het Nebukadnésar, die koning van Babel, na Jerusalem gekom en dit beleër. DANIËL 1:1 AFR53
Jojakim sterf en sy seun Jojagin word in sy plek koning.
En Jójakim het ontslaap met sy vaders, en sy seun Jójagin het in sy plek koning geword. II KONINGS 24:6 AFR53
Jojagin is Juda se volgende koning, hy regeer vir drie maande en tien dae en hy doen wat verkeerd is in die oë van die Here.
Agttien jaar was Jójagin oud toe hy koning geword het, en drie maande en tien dae het hy in Jerusalem geregeer; en hy het gedoen wat verkeerd was in die oë van die Here. II KRONIEKE 36:9 AFR53
Koning Nebukadneser neem Jojagin gevange en bring hom na Babel saam met die kosbare voorwerpe van die tempel.
Jojagin is die Jegonia wat Mattheus in 1:11 noem. Hy was nie, soos daar gesê word, die seun van Josia nie, maar van Jojakim, en hy het ook nie broers gehad nie, maar dit was sy vader se broers.
Die koning van Babel het in die 37ste jaar van die ballingskap Jojagin uit die gevangenis vrygelaat, en hy het sy laaste dae rustig deurgebring.
En in die sewen-en-dertigste jaar van die ballingskap van Jójagin, die koning van Juda, in die twaalfde maand, op die vyf-en-twintigste van die maand, het Evil-Meródag, die koning van Babel, in die jaar van sy troonsbestyging die hoof van Jójagin, die koning van Juda, verhef en hom uit die gevangenis uitgebring. JEREMIA 52:31 AFR53
26 November 2024
MATTHÉÜS 1:12a AFR53
En ná die Babiloniese ballingskap het Jegónia die vader geword van Seáltiël,
Na die Babiloniese ballinskap is die eerste persoon in Jesus se geslagsregister Sealtiël. Ons weet niks van hom behalwe dat hy die vader van Serubbabel was. Die inligting kry ons in die boeke van Esra, Nehemia en Haggai.
En Jésua, die seun van Jósadak, met sy broers, die priesters, en Serubbábel, die seun van Seáltiël, met sy broers, het klaargemaak en die altaar van die God van Israel gebou om daar brandoffers op te offer soos geskrywe staan in die wet van Moses, die man van God. ESRA 3:2 AFR53
En dit is die priesters en die Leviete wat saam met Serubbábel, die seun van Seáltiël, en Jésua opgetrek het: Serája, Jeremia, Esra, NEHEMÍA 12:1 AFR53
In die tweede jaar van koning Daríus, op die eerste dag van die sesde maand, het die woord van die Here deur die diens van die profeet Haggai gekom tot Serubbábel, die seun van Seáltiël, die goewerneur van Juda, en tot Josua, die seun van Jósadak, die hoëpriester, en gesê: HAGGAI 1:1 AFR53
MATTHÉÜS 1:12b AFR53
en Seáltiël was die vader van Serubbábel,
Serubbabel was die kleinseun van koning Jojagin van Juda, en dus 'n afstammeling van Dawid. Serubbabel, wat tydens die ballingskap in Babilon gebore is (tussen 587 en 539 v.C.), het na Juda gereis nadat koning Kores II die Judese gevangenes toegelaat het om na hul vaderland terug te keer om die tempel te herbou.
Die profeet Haggai identifiseer Serubbabel as die goewerneur van Juda ná die ballingskap. Serubbabel is 'n Babiloniese naam wat nageslag van Babilon beteken. As goewerneur van Juda is Serubbabel aangestel as een van die aanvanklike leiers wat toesig gehou het oor die herbou van die tempel in Jerusalem met die hulp van Josua, die hoëpriester.
Na 'n seisoen van ongeveer veertien maande om gevestig te word, het die Joodse volk in alle erns begin herbou. Dit was nie lank voordat daar teenstand van omliggende teëstanders losgebreek het nie, en uiteindelik is die werk op bevel van koning Artasasta tot stilstand gebring. Slegs die fondasie van die tempel was voltooi.
Die Joodse volk het Serubbabel begin sien as hul groot hoop vir die herlewing van die Dawidiese koningskap en die bevryding van die Perse.
Alhoewel die tempel wat Serubbabel help bou het, klein was in vergelyking met die grootte van Salomo se tempel, het dit Salomo se tempel ver oortref. Trouens, Serubbabel se tempel het 500 jaar later nog gestaan toe die beloofde Messias, Jesus Christus, op die toneel verskyn het.
Serubbabel se tempel was miskien kleiner as dié van Salomo, maar God het 'n groter heerlikheid vir die tempel belowe.
Die toekomstige heerlikheid van hierdie huis sal groter wees as die vroeëre, sê die Here van die leërskare; en op hierdie plek sal Ek vrede gee, spreek die Here van die leërskare. HAGGAI 2:9 AFR53
Die heerlikheid wat aan Serubbabel se tempel geskenk is, was Jesus Christus, die Seun van God, wat in die tempelhowe gepreek het.
27 November 2024
MATTHÉÜS 1:13 AFR53
en Serubbábel die vader van Abíud, en Abíud die vader van Éljakim, en Éljakim die vader van Asor,
Ons betree nou die tydperk van 400 stil jare tussen die Ou en die Nuwe Testamente. Dit bring natuurlik mee dat daar min tot niks geskryf is van die volgende nege geslagte wat in die tydperk gelewe het nie.
MATTHÉÜS 1:14-15
en Asor die vader van Sadok, en Sadok die vader van Agim, en Agim die vader van Elíud, en Elíud die vader van Eleásar, en Eleásar die vader van Mattan, en Mattan die vader van Jakob,
Josef, die man van Maria, uit wie Jesus gebore is, se vader was Jakob.
MATTHÉÜS 1:16.
en Jakob die vader van Josef, die man van Maria uit wie gebore is Jesus wat Christus genoem word.
En nou kom ons tot die einde van Mattheus se geslagsregister met Josef - die aardse vader van Jesus Christus, die Seun van God. Josef was 'n afstammeling van koning Dawid, hy het in Nasaret in Galilea gewoon, en hy het onderneem om met Maria te trou, die maagd wat aan Jesus geboorte gegee het.
na 'n maagd wat verloof was aan 'n man met die naam van Josef, uit die huis van Dawid; en die naam van die maagd was Maria. LUKAS 1:27 AFR53
Die Bybel sê vir ons dat Maria swanger geword het deur die Heilige Gees en nie deur Josef nie. Josef was Jesus se aardse, aanneem vader maar nie Sy biologiese vader nie.
Die geboorte van Jesus Christus was dan só: Toe sy moeder Maria verloof was aan Josef, voordat hulle saamgekom het, is sy swanger bevind uit die Heilige Gees. MATTHÉÜS 1:18 AFR53
Die Bybel dui ook aan dat Josef 'n vriendelike, selfopofferende man was. Alhoewel hy 'n wettige reg gehad het om van Maria te skei toe hy uitgevind het sy is swanger, was hy van plan om dit stilweg te doen omdat hy geen openbare skande oor Maria of haar gesin wou bring nie.
En Josef, haar man, omdat hy regverdig was en onwillig om haar openbaar te maak, het hom voorgeneem om in die geheim van haar te skei. MATTHÉÜS 1:19 AFR53
‘n Engel van die Here verskyn egter aan hom in ‘n droom en sê dat sy nog ‘n maagd is en dat dit wat in haar verwek is, van die Heilige Gees kom.
Maar terwyl hy dit in die gedagte gehad het, verskyn daar 'n engel van die Here in 'n droom aan hom en sê: Josef, seun van Dawid, wees nie bevrees om Maria, jou vrou, by jou te neem nie, want wat in haar verwek is, is uit die Heilige Gees; MATTHÉÜS 1:20 AFR53
Die engel sê verder dat ‘n seun gebore sal word en hulle moet Hom Jesus noem.
en sy sal 'n seun baar, en jy moet Hom Jesus noem, want dit is Hy wat sy volk van hulle sondes sal verlos. MATTHÉÜS 1:21 AFR53
28 November 2024
MATTHÉÜS 1:22 AFR53
En dit het alles gebeur, sodat die woord vervul sou word wat die Here deur die profeet gespreek het:
Mattheus verklaar uit en uit dat profesie vervul is in die geboorte van Jesus Christus.
Kyk, die maagd sal swanger word en 'n seun baar, en hulle sal Hom Emmánuel noem, dit is, as dit vertaal word: God met ons. MATTHÉÜS 1:23 AFR53
Jesaja was die profeet wat hierdie profesie uitgespreek het.
Daarom sal die Here self aan julle 'n teken gee: Kyk, die maagd sal swanger word en 'n seun baar en hom Immánuel noem. JESAJA 7:14 AFR53
Na Jesus se geboorte verskyn ’n engel vir ‘n tweede keer aan Josef om hulle te waarsku om Jesus te neem en na Egipte te vlug – Herodes was van plan om alle manlike kinders onder die ouderdom van 2 jaar dood te maak en so te verseker dat geen toekomstige koning sal lewe nie.
En toe hulle teruggegaan het, verskyn daar 'n engel van die Here in 'n droom aan Josef en sê: Staan op, neem die Kindjie en sy moeder en vlug na Egipte, en bly daar totdat ek jou sê; want Herodes gaan die Kindjie soek om Hom dood te maak. MATTHÉÜS 2:13 AFR53
Weereens sien ons die getrouheid van Josef toe hy dadelik doen wat die engel van die Here hom beveel het om te doen.
Hy het toe opgestaan, die Kindjie en sy moeder in die nag geneem en na Egipte vertrek. En hy was daar tot die dood van Herodes, sodat die woord vervul sou word wat die Here gespreek het deur die profeet: Uit Egipte het Ek my Seun geroep. MATTHÉÜS 2:14-15 AFR53
Die profesie wat hier vervul was is deur Hosea gespreek.
Toe Israel 'n kind was, het Ek hom liefgehad, en uit Egipte het Ek my seun geroep. HOSÉA 11:1 AFR53
Vir ‘n derde keer verskyn ‘n engel van die Here aan Josef om te sê dat Herodes dood is en dat dit nou veilig was om Jesus terug te bring na Israel.
En ná die dood van Herodes het daar 'n engel van die Here in 'n droom aan Josef in Egipte verskyn en gesê: Staan op, neem die Kindjie en sy moeder, en gaan na die land van Israel; want hulle is dood wat die lewe van die Kindjie gesoek het. MATTHÉÜS 2:19-20 AFR53
Josef is weer getrou en doen wat die engel van die Here hom beveel.
En hy het opgestaan, die Kindjie en sy moeder geneem en in die land van Israel gekom. Maar toe hy hoor dat Archeláüs oor Judéa koning was in die plek van sy vader Herodes, was hy bevrees om daarheen te gaan. En hy het 'n goddelike waarskuwing in 'n droom ontvang en na die streke van Galiléa teruggekeer. En hy het gaan woon in 'n stad met die naam van Násaret, sodat vervul sou word wat deur die profete gespreek is, dat Hy Nasaréner genoem sou word. MATTHÉÜS 2:21-23 AFR53
Die profesie van ‘n Nasarener is gespreek deur Jesaja. Die Loot was ’n algemene term vir die Messias. Hebreeus word slegs met konsonante geskryf, en netser (loot) sou as NZR geskryf word — dieselfde konsonante vir Nasaret.
Maar daar sal 'n takkie uitspruit uit die stomp van Ísai, en 'n loot uit sy wortels sal vrugte dra; JESAJA 11:1 AFR53
29 November 2024
MATTHÉÜS 1:17 AFR53
Al die geslagte dan van Abraham tot Dawid is veertien geslagte, en van Dawid tot die Babiloniese ballingskap veertien geslagte, en van die Babiloniese ballingskap tot Christus veertien geslagte.
Die geslagsregisters van Mattheus in vergelyking met die van Lukas.
Mattheus gaan deur die koninklike lyn tot by Josef, die wettige vader van Jesus Christus. In die eerste 17 verse van Mattheus maak hy die saak uit dat Jesus die wettige titel op die troon van Dawid het.
Die probleem: Die Messias, die koninklike geslag, sou uit die stam van Juda wees, en uit die geslag van Dawid. Die opvolging van die konings van Juda was, met slegs enkele uitsonderings, 'n somber klomp. Ons ontmoet uiteindelik Jogonia wat so sleg is dat God uiteindelik 'n vloek oor hom uitspreek.
Die vloek van Jegonia: Jegonia, ook genoem Jegónja,
En die seuns van Jójakim was: Jegónja, sy seun, Sedekía, sy seun. I KRONIEKE 3:16 AFR53
en ook genoem Gonja,
So waar as Ek leef, spreek die Here, al was Gonja, die seun van Jójakim, koning van Juda, 'n seëlring aan my regterhand, tog sal Ek jou daar afruk, JEREMIA 22:24 AFR53
was 'n koning van Juda wat as deel van die Babiloniese ballingskap gedeporteer is.
wat uit Jerusalem weggevoer was onder die ballinge wat in ballingskap moes gaan saam met Jegónja, die koning van Juda, wat Nebukadnésar, die koning van Babel, weggevoer het. ESTER 2:6 AFR53
Hy word ook gelys in die geslagsregister van Jesus, in Josef se familielyn.
En ná die Babiloniese ballingskap het Jegónia die vader geword van Seáltiël, en Seáltiël was die vader van Serubbábel, MATTHÉÜS 1:12 AFR53
Die vloek van Jegonia word gevind in Jeremia.
So sê die Here: Skryf hierdie man op as kinderloos, 'n man wat nie voorspoedig sal wees in sy dae nie; want dit sal niemand van sy geslag geluk om te sit op die troon van Dawid en nog oor Juda te heers nie. JEREMIA 22:30 AFR53
Die probleem is dat die vloek van Jegónia blykbaar Jesus se reg op die troon van Dawid ongeldig maak. Die Dawidiese Verbond het belowe dat die Messias, die Seun van Dawid, vir ewig op Jerusalem se troon sal regeer. As Jesus ’n afstammeling van Jegónia is, hoe kan Hy dan die Messias wees, aangesien die vloek enige van Jegónia se nageslag verbied om Dawid se troon op te neem?
'n Moontlike oplossing vir die geslagslyn het betrekking op die maagdelike geboorte. Jesus het net een menslike ouer gehad, Maria. Sy ma was van Dawid se geslag deur Dawid se seun Natan en nie Salomo nie, wat Jegónia dus uitsluit.
Josef was Jesus se wettige vader, maar nie Sy fisiese vader nie. Jesus was dus van koninklike bloed deur Maria, en die vloek van Jegónia het by Josef opgehou en is nie aan Jesus oorgedra nie.
Comentarios